မနက်ခင်းမိုးမလင်ခင် သုံးနာရီအချိန် ၊ ကျိုးကျင်းဇယ်၏လက်မောင်းပေါ် အိပ်နေဆဲဖြစ်သည့် ရွှီဆွေသည် အိပ်မက်ဆိုးတစ်ခုကြောင့် ရုတ်တရက်လန့်နိုးလာရသည်။ အိပ်မက်ထဲတွင် ဟူချန်ရှီးသည် သူမ၏မျက်စိရှေ့၌ပင် တောင်ကမ်းပါးစွန်းမှ ခုန်ချသွားခဲ့ပြီး ရွှီဆွေ ဘယ်လိုပင်လက်လှမ်းဖမ်းလိုက်ပါစေ မမှီတော့သည့်မြင်ကွင်းကြောင့် အသက်ရှူမြန်လွန်းရင်း နိုးလာခဲ့သည်။
ကျိုးကျင်းဇယ်လည်း ရွှီဆွေကြောင့်နိုးလာခဲ့ကာ ညအိပ်မီးအိမ်ကိုဖွင့်ပြီး ရေနွေးနွေးတစ်ခွက်ငှဲ့ပေးလိုက်သည်။ ချွေးစေးများပြန်ပြီး လည်ချောင်းတစ်လျှောက်လုံး ခြောက်ကပ်နေရခြင်းကြောင့် ဖန်ခွက်နားသို့နှုတ်ခမ်းတေ့ကာ တစ်ခွက်လုံးနီးပါးမော့ချလိုက်၏။
ကျိုးကျင်းဇယ်က ရွှီဆွေ၏နဖူးကိုစမ်းကြည့်ရင်း မျက်နှာပေါ်ကပ်နေသည့်ဆံပင်တို့ကိုလည်း နားရွက်နောက်သို့ပို့ပေးလိုက်၍
"ဘာဖြစ်လို့လဲ"
ရွှီဆွေ ; "ရှီးရှီး တစ်ခုခုဖြစ်တယ်ဆိုပြီး အိပ်မက်မက်လို့"
ရွှီဆွေ၏ပုခုံးကိုလှမ်းထိန်းပေးထားသည့် ကျိုးကျင်းဇယ်၏လက်တစ်ဖက်မှာ တင်းခနဲဖြစ်သွားပြီး တစ်စုံတစ်ရာစကားဆိုမြည်အပြုတွင် အိပ်ရာဘေး၌ထားထားသည့်ဖုန်းသံမြည်လာခဲ့ရာ စူးစူးရဲရဲမြည်လောင်သွားသည့်အသံမှာ အေးချမ်းဆိတ်ငြိမ်နေသည့်ညကို ထိုးဖောက်လာသည့်အလားပေ။
ရှန့်နန်းကျိုးထံမှ ဖုန်းခေါ်ဆိုမှု။
ကျိုးကျင်းဇယ် လက်ခံဖြေဆိုပြီးစကားတစ်ခွန်းမဆိုရသေးခင် တစ်ဖက်လူထံမှ ကြားလိုက်ရသည့်စကားလုံးတို့ကြောင့် မျက်နှာအမူအရာရော မျက်ခုံးမျက်လုံးတို့ကပါ ချက်ချင်းပြောင်းလဲသွားလေသည်။
"ငါတို့ ချက်ချင်းလာခဲ့မယ်"
ကျိုးကျင်းဇယ်က တစ်ဖက်သို့စောင်းငဲ့ကြည့်၍
"ရှီးရှီး ဆေးရုံရောက်နေတယ်..အခြေအနေက နည်းနည်းစိုးရိမ်ရတယ်တဲ့"
YOU ARE READING
ဖွင့်ဟဝန်ခံခြင်း [ ဘာသာပြန် ]
Romance--ကောင်းကင်ပြင်ကြီး ခြားနားထားမှန်း သိနေတာတောင် ချစ်ခြင်းမေတ္တာတွေကို နေ့တိုင်း စာအိတ်လေးထဲ ထည့်ထားတုန်းပါပဲ--