لو تعرفين وش يعني قهر الرجال ما ابتسم ثغرك لغيري رجل - بحروف #هـدوئي_كـارثة

البآرت الثلاثون :-

دامك زرعت الحب في داخلي ورد ..
انا ما ابي غيرك من الناس يسقي ..

>> عند سمى وهادي ...

من أول ما وصلوا لمكان هادي المفضل تركته على راحته ما قالت ولا كلمة وتركته يفرغ كل غضبه ويطلع كل قهره ، كان يضرب بأي شي يشوفه ويصارخ بكل ما عنده ، بلعت ريقها وهي تشوفه جالس بسكون غريب قدام الحافة ، قربت منه وجلست جنبه ، التفت عليها وكأنه توه يستوعب وجودها ، رفع يده لمؤخرة راسه ليقول بحرج واضح :- خوفتك ؟
هزت رأسها بالنفي لتقول بإبتسامة هادية :- متعودة على نوبات ناصر
تنحنحت بشويش بعد ما شافت نظراته عليها بشكل غريب عليها لتقول :- تبي تتكلم ...
تنهد بضيق ليقول بغضب واضح :- وش اقولك ، اختي قدامي كل هالوقت وانا حمار ما قدرت افهم ، اقولك اني عندي ايام قليلة واذا ما خلصت الي جيت عشانه ...
قطع كلامه بضيق وهو يتذكر الكلام الي وصله من رؤسائه ، شدت على جوالها لتقول بتوتر :- بترجع أمريكا خلاص
هز راسه بهدوء مرعب لها ، كيف يقدر يتركها الحين ، كيف يقدر يكون هادي بالطريقة المخيفة هذه ، لتقول بضيق :- مو ملاحظ هدوئك يخوف ؟ كيف تقدر تكون كذا
رفع اكتافه بعدم معرفة ليبتسم بسخرية :- يمكن لو ما عشت الي عشته ما كنت كذا
لتقول بغضب :- وش عشت هادي ؟ علمني شاركني ..
ليرد بذات الحدة :- ليه عشان تعلمين اخوانك وعبدالمجيد والعايلة كلها بعد ..
صمتت ثواني وهي تحس بإرتباك ليكمل :- سمى انا مو غبي ، جيتك لبيت ضاري معروفة لوش وروحتك لبيت اهلك معروفة ليه ، انتي الوحيدة الي تحسبين محد يعرف وش تسوين لكنك مكشوفة ، ولا تفكريني مضايق ولا زعلان لا والله ، اساسا كل شي قاعد يصير غلط ، من وجود اريام معانا وانتي وكل شخص دخل بهالدوامة ...
لترد بضيق وتعب :- ليه ما تكون صريح معاي وتقولي عن كل شي وخلاص نخلص من هالسالفة
ليرد بغضب :- لأني لو قلت لك بتروحين ، ما عاد بكون في سبب تبقين عشانه ، بعد ما تعرفين كل شي بتروحين وانا برجع مثل اول ..
نظرت له بضياع لتقول بتوتر :- هادي ...
ليصد بضيق وكمل :- مستحيل انك تبقين معاي بعد كل شي بصير ، ابوك واخوانك ما رح يسمحون لك اساسا ، رغم اني عارف انه روحتك وابتعادك هو القرار الصح لكن مو قادر ، مو قادر ابعد ...
لتقول بتسرع :- لا تبعد طيب ..
التفت لها لتكمل وهي تشد على يدها :- وقف كل شي ، لا تروح ولا تبعد
ناظر فيها بهدوء ، كيف يشرح لها الي يمر فيه ، كيف يقول لها انه شخص اساسا ميت ، شخص مجرد اسم ، كيف يقول لها انه ايامه باتت معدودة وهادي قريبا بيختفي ...
قطع عليهم صوت سيارة رائد الي وصلت للمكان ليقف هادي ويأشر لها عالسيارة :- لا تطلعين منها مهما صار ..
بلعت ريقها بخوف ترجع للسيارة وهي تشوف تقدم رائد وهجوم هادي العنيف عليه يمسكه من ياقة بدلة ويصرخ عليه بكل ما عنده من قوة تحت نظراتها ، كان هادي يصرخ ويشتم ورائد مستسلم تماما له لأن يدري بحجم غلطه ...
رمى هادي بقوة ليتراجع رائد خطوات بسيطة ورفع سبابته :- لا تسكت لا تسكت رائد قول اي شي ، ريح راسي من التفكير
ليرد رائد بثقة :- ما عندي شي ابرره ، الي سويته كان عشان أحميك واحميها ، لو عرفت من زمان بهالحقيقة كنت بتكشف نفسك بدري ، انت منتبهه لنفسك الحين لو ضاري واقف قدامك الحين ...
ليقاطعه هادي بغضب وحقد :- بذبحه ... لو ضاري واقف قدامي الحين بذبحه صدقني
ليهز راسه رائد بهدوء :- عشان كذا كان من الأفضل انك ما تدري عن هالشي ...
رفع رجله يضرب الكفرات بكل قوته :- لو ذبحها بسببي ، لو سوا لها شي ، الحين وين ألقاها وين ألقاها...
قرب منه رائد يشده له ويحضن راسه ويهدي :- هي بخير ، شامل معاها ، صدقني هي بخير لا تشيل هم ، عيوني عليها ...
تنهد هادي بضيق ليقول بشعور بكاء مكبوت :- تعبت يا رائد تعبت اشيل حمل انا مو قده ، تعبت
شد رائد على راسه بقوة ليقول :- انت قدها ، وهي ايام ايام صدقني وينتهي كل شي وترتاح وتجتمع باختك ...
رفع راسه يمسح على وجهه ، ويبتعد عنه لسيارته بدون ما يقول شي ، توجه رائد أيضا لسيارته ورفع جواله يكلم الفريق حقه :- اجتماع طارئ الحين الكل يتواجد ، حتى شامل ...
قفل جواله ...