Someone Like You (Completed)

2

"ARE YOU KIDDING me?" ang nayayamot na sabi ni Caine kay Terri, ang kanyang nobya na kasalukuyan niyang kausap sa telepono. "Do you know how hard it is to get a reservation in this place? I have this reservation for months. Months! Dahil sinabi mo na gusto mong dito mag-celebrate ng birthday mo. Ngayon ay sasabi—"

"Will you shut up already?" ang nayayamot ding sabi sa kanya ni Terri. "Dalawang beses na akong nag-a-apologize. Hindi ko naman plinano ito. Bakit hindi mo maintindihan?!"

"Hindi mo nga plinano pero mayroon kang choice! I look stupid here!"

"Iyan naman ang mahalaga sa 'yo, hindi ba? Not looking stupid to other people. Hindi mahalaga na birthday ko ngayon."

"Do not try pinning this on me. This is on you."

"What is 'this' exactly, Caine? It's my day. I should be happy. I should be treated special. Hindi ganito."

"Kung narito ka at wala sa yate ng boss mo, makikita mo kung gaano kaespesyal ang inihanda ko for you. Mararanasan mo kung paano ko ipaparamdam sa 'yo na espesyal ka."

"Nand'yan ka lang naman kasi pinilit kita sa reservation na iyan.

Kahit na alam ni Caine na totoo rin ang sinabing iyon ni Terri ay labis pa rin siyang naiinis. "That is not the point, Terri. Ang point ay wala ka rito. Dapat ay narito ka."

"Sinabi ko na rin sa 'yo kanina, hindi ko naman alam na mag-o-organize ng surprise party ang mga kasama ko sa trabaho. Kasama sa nagplano ang mismong boss ko. Hindi ko alam na may naghihintay na party nang pumunta kami sa yate niya. Boss ko 'to, Caine. CEO ng kompanya. Ano na lang ang sasabihin ko? Na hindi ako makapag-stay sa party para sa akin dahil nagpa-reserve ng table sa isang restaurant ang boyfriend ko?"

"Yes!"

"You are unbelievable!"

"No, you're the one who's unbelievable! You could've called me earlier. You could've told me your boss had something special for your birthday and you can't leave just yet because he's your boss. Puwede ko naman iurong ang reservation kung ginawa mo lang 'yon. Or I could've cancelled and joined you in the yacht. You could've invited me. Because I am your boyfriend. Pero hindi. Ano ang ginawa mo? Wala. Kung hindi pa ako tumawag ngayon dahil kalahating oras na akong naghihintay ay hindi mo pa maaalala ang date na ito. You were so caught up in your party and probably to your boss also to remember about me. I brought your favorite flowers, damn you!"

"You are ruining my special day, Caine!"

"Well, you've ruined my night!"

"This is not working anymore."

"You think?" ang sarkastiko niyang balik. Parang alam na niya kung saan patungo ang usapan na iyon at sa totoo lang ay wala na siyang gaanong pakialam. Hindi siya natatakot. Alam niya ang dapat na gawin bago pa man sila humantong sa ganitong pag-uusap sa telepono, pero sa hindi niya malamang dahilan ay hindi niya gusto na siya ang mauna. Hindi niya gustong sa kanya manggaling ang mga salita na mangangahulugan ng pagtatapos. Alam niya na hindi siya nagiging gentleman. Hindi rin naman yata siya nagiging duwag. Siguro mas na hindi niya gustong isipin na sumuko siya. Hindi isang quitter si Caine Riva.

"Sa palagay ko ay mas maigi na maghiwalay na lang tayo. Wala rin namang kinapupuntahan ang relasyon na ito. Walang nangyayaring maganda sa atin lately. Panay ang away natin. Hindi na tayo nagkikita. Madalas kong naiisip na hindi ikaw ang lalaki para sa akin."

Ibinuka ni Caine ang bibig at akmang sasabihin na madalas na rin niyang naiisip na hindi si Terri ang babaeng para sa kanya pero itinikom niya ang bibig sa huling sandali.