كل يوم نتعلقو ببعضانا و تطورت علاقتنا لحب عاد الهواء الي نتنفسو .
بصح الفرحة ما تكملش في أغلب الأحيان هذيك المصيبة الي إسمها سارة كانت تعشق في جليل و تكرهني و لكن تلقى الموت تشريهالي كانت دير في تحرياتها عليا و عرفت كل شي من النهار الي جيت فيه من دارنا.
نهار كنا كامل قاعدين في لافاك أصحاب جليل و صحاباتهم تقريبا كنا 10 و من بينهم سارة حتى تسقسيني
سارة :واش أحلام الخدمة في السيام مليحة راهم يخلصوك مليح؟
و ماتت بالضحك أنا تمنيت تتحل الأرض و تبلعني .
جليل مسكين يقلها راهي بنت المدير موش تخدم ثم ...!!
القروب كامل حبس الهدرة و يسمع في حكاية التشرد تاعي و انا غير نقفل في وذنيا و هذيك اليهودية تاع سارة تحكي فيها كأنها قصة هزلية و الغاشي كامل يضحك و يشوف فيا على أني كذابة .
رحت نجري و انا متمنية نرجع لدوارنا نلبس قشابية بابا و نسرح غنماتي كيما كنت واحد ما يعرفني .
جليل يسقسي فيا أحلام الي سمعتو صح ؟ أنا قتلو هيه صح كنت عايشة في دار العجزة و نخدم فام دوميناج في السيام هذي هي انا فرات الي بناتنا فض .
ليلة كاملة نبكي على زهري الي كيما نديرلو ما يتسقم علاه الحاجة الي نحبها تروح مكتوبي نعيش وحدي كرهت لافاك و لقراية .
نهار بعد نهار نروح عند أنسة رقية نحكيلها الي يصرالي و نبكي شوي و نروح
أنت تقرأ
أحلام (باللهجة الجزائرية)
Romanceطفلة عانات بزاف في حياتها فقدت شرفها و أهلها واش اللي راح يتبدل اقراو و تعرفوا . . . 08/04/2018
