المراهقة و الأربعيني

مستقبل روايه

مره شفت بكروب لزميلتي كاتبه ..مسابقه لمشهد روايه وهي تعطي الاسم.. ف اني اخذت عدة مشاهد من مستقبل الروايه.. وكتبتها للمسابقه بلهجه بغداديه..

وفازت الاولى.. حبيت اشاركم بيها..

ملاحظه(المشهد من عدة مشاهد.مو فقط مشهد.. ودمجتهم لاصنع منهم مشهد متكامل للمسابقه)

#اوجاع_قلبي

#بقلم Zainab Majed

هستوني دخلت للبيت جاي انزع الجبه.. جان تصيح سلفتي..

-يمعزايه رجلج اجه وسأل عليج.. كتله راحت وي عمتي  للدكتور

-وينه.. شوكت اجه..  صدك سأل عليه ؟؟؟

-اي والله هو صعد وانتو طبيتو .. صعدي شوفي يمعوده لا يكلبها علينه..

-شمرت الحجاب والجبه وصعدت طايره.. بين الخوف والفرح.. يوووه شكد مشتاقتله اسبوع صار ما شايفته..

دكيت الباب صاح تعال..  دخلت كاعد ينزع بحذائه.. كتلا هلا هسه نور البيت.. ما اهتملي كلعاده.. وحجه وكأن ما سمع ترحيبي

-وين جنتي..  ؟

-مشيت يمه ودنكت اريد انزع حذائه عنه.. وجاوبته وي عمتي بالدكتور.. دا امد ايدي لحذائه كال

-لا تتكلفيين بويه انه انزعه..  بس ليش ما عندي خبر بطلعتج..

-ما رديت.. يحجي وهو مدنك.. من ما رديت عليه.. رفعلي عينه وي رفعت حاجبه.. بقيت اطمش بوجه والخوف ماكلني خفت لا يعصب

اخذ نفس وكال:- روحي جهزيلي الحمام بسرعه..

-اي تدلل... رحت طلعتله تراك  وشورت وفانيله.. ورحت علكتهم بالحمام..

ورجعت للغرفه خبرته.. راح يسبح واني بقيت اعدل بالغرفه وشغلتله المكيف حتى يرتاح.. وعطرت الغرفه  واخذت ملابسه

جاي اطلع.. ضربت بيه.. يااا عزا شو طالع بس بالخاولي عجل اني المن طلعتله هدوم.. خجلت منه وهو هيج .. ودرت بساع ردت اروح..

صاح وراي تعاي.. يا ربي شلون ارجع وهو مصلخ ميكول عيب.. اخذ من محفظته فلوس وانطاني.. كتله لا ما احتاج عمتي ما مقصره..

-انه رجلج لو عمتج.. ؟

-يماااي شكد فرحت بهلكلمه من يكلي انه رجلج..

-اخذي باباتي.. مصرفج هذا.. واخر مره اسمع طالعه بدون علمي فهمتي..

-من كالي بابا كسر كل واهسي حتى بعد نسمعت شكال اخ كلبي بالله هذا شسويله ويحبني يربي ..والله تعبت اوجاع قلبي كلها منه ..الى متى يعتبرني بنته..

نزلت  لكيتهم كلهم يتوضون يردون يصلون.. تركتهم.. ورحت للمطبخ بقيت اكمل بالعشى.. كملو وصبينا.. صاحت عمتي صعدي صيحي رجلج..

درت لحرب .. كتله روح صيح بابا حباب.. راح... حتى ما اريد اشوفه كله يعتبرني بنته واني كاتله روحي عليه.. بنته.. ماشي بنته بعد ولا اريده..

جاي احجي شفته نزل.. غير كلبي كام يركص مدري يرجف من شفته نزل بس هم مباوعلي.. اوف ربي ساعدني مليت..

كاعدين ناكل.. جان عمتي حجت وياي.. شفتي ام وليد شلون خطبتج... ما رديت خفت منه.. كملت حجيها وي عمي.. ياهو اليشوفها اليوم وياي عباله حفيدتي بنت صراع ويتخطبها. 

يمه اذا ما تريدها للبنيه طلكها وخل تتزوج وتروح بحال سبيلها حرام عايفها هيج معلكه..

اباوعله وعمتي تحجي عقد حواجبه ما عجبه الحجي ولا رد.. لحت وياه بالكلام شمر الخاشوكه بالماعون وصاح الحمدلله.. وباوعلي وحجه.. ثواني والجاي يصعدلي..

هزيت راسي وكلبي يرجف.. رحت اخذت الجاي من ع النار الهادئه وصبيتله وصعدت.. لكيته يفور بغرفته يروح منا يجي منا ونازع قميصه..

دنكت.. جاي احط الجاي صاح.  فرحانه موو.. يتخطبوج وجهج ورّد من امي تحجي.. مصرفلج الموضوووع مووو

-لا والله م م معليه  والله مالي شغل.  اجه تقرب مني.. وعصر الجاي الحار بيدي.. احسها انسلخت من الحراره وهو صاك على اسنانه   ويكول

-وكت الاريدج مره تكليلي شايب وكت اللازم اصير رجلج وتاخذين كلامي تعتبريني جاهل واطلعين وما اديرين باله..

-ااخ بس ايدي جاي تحترك اتركني..

-تحركج مووو .. هيج انه كلبي يحترك من اسمع واحد خاطبج... جر كوب الجاي من ايدي و ركعه بالكاع ودفعني وصرخ طلعي برااااا

هي دفع وهي وكعه للكاع .. بقيت ابجي وهو يصيح ما اريد اشوووووفج طلعييييي برااااااااا.....يتبع 😁😁

طبعا المشهد مأخوذ من روايه اليه للان ممطروحه..
متابعيني يعرفوها وكلمة اطمش تبين هذه الروايه من وين اصلها 😘