المراهقة و الأربعيني

95

الحلقة ٩٥

رغم ما سمعت من بيبيتهم زلوف فد يوم كلمة حلوة بس انقهرت عليها من ماتت، بقينا بس اني و نور بالبيت، كلتلها :- هم زين الفاتحه مو عدنا هناك جان انخبصنا
- وشالفايدة هسه نبدل ونروح نفس الشغل و نفس الكراب
-لا اشتغل ولا اتعبلهم ابد منو يستاهل واتعبلو خيولون
-على اساس انت هينا شلون مشرمتها بالشغل، شو ساعه و وكت معتكفه بغرفتج
-اي وليش اشتغل عجل جاب اخلاص المن يدحك بطولها مو هي اللزكت وكالتلو حتى لو خدامه ابيتك بس خلي اسم بضل اسمك، خليها هي تخدم عود وكت اليطلكها تعالو طالبوني بشغل
..معجب نور الكلام دارت وجها وهي رافعه حواجبها و عاوجه حلكها

شويه و منحس الا الهوسه فاتت ع البيت والناس تتوافد للأستقبال، هبط گلبي و سألت :- شنو شكو ؟

-الحجي و صراع قرروا الفاتحه هينا تصير
-ليش مو عد بيت عزام
-طاكه عدهم الميزانيه و محتارين بالكهرباء فصراع كاللهم خلي الفاتحه عدنا
-جان سووها بالجامع
-هسه انت شنو اطردين بالعالم شو راعي البيت هو العزم بعد شكو
يبوووه شكد حقدت على صراع ، بكل عزا لطام ولازم يعزب بروسنا و تعالو عندي ميكول ننهلك و البيت ينداس اهم شيء يصير هو المعزب بالعشيره.

و كالعادة شغل و هوسه وتنضيف وجر و عر ووكفه تكسر الظهر و اليكتلك تجي وحدها حلكها جايف و تمدح بأخلاص وتكول هذا الياخذ وحده منه و بيه تلم عزايمو و ترفع راسو ما مثل الغريبه كلاص تتمايع و تشيلو

و اخلاص هيج يكولولها لو صارت حشى السامع ثور حراثه، لحظه متكعد عود البيت بيتها و هي تعزب، و الناس تمدح بيها، اني ما ذنبي ما متعودة على شغلهم لو اعيش عدهم سنين هم شمرت اجسادهم تختلف ضخمسن و سريغين بالشغل و ايدهم خفيفه، اني جنت اتعشى ويا امي قشطه و جاي و لو كالتلي غسلي ماعونج اتلوى و اتنحنح و كوه اكوم بألف يا الله، من وين لي هالشغل و هالهوسه ويردون اصير ثور حراثه مثلها

جا صراع بالليل من صدك طكيت وياه و تكاونت على هالطلات اليطلعها و مو اول مره كل ما تصير سالفه يعزمها ابيتها يا خطبه يا فصل يا فاتحه كلشي يعزب بيها وتالي تكع بروسنا

هو جان تعبت و تكاونا عاد عافني و طلع ما اجا للغرفه بعد حتى نوم نام بالجادر ما فات للبيت لما خلصت الفاتحه و احنه منحجي ويا بعض

سوو الفاتحه يومين ما تلاثه و فضوها، ثاني يوم مكعدت ابد صراع بالدوام و اني كعدت ب١٢ تريد تصير بال١

نزلت جوا شفت عمتي كاعدة بالهول و نور ماخذه جهالها و هاجه لاهلها و اخلاص بالمطبخ بيدها جدر الضغط اتركب الغدا، والمواعين مكومة ع السنك،
اخذت القوري اسوي جاي حجت اخلاص
- والله شمسج عالية جان صيحتيني اطلعلج الريوك فوك
جاوبتها :- لا حياتي ميحتاج اني نزلت اتريك
-دحكي ولج والله اذا اخلي سيرتج بحلك عمتي اخليها تكلب عليج واخلي صراع يهججج بليلة مابيها ضو