Ano ayhan ang akun ibaylo?
Sa mga toro kang oran sa gisiun nga payong,
Samtang ginasarub ang nagadanaw nga aragyan.
Ano ayhan ang akun ibaylo?
Sa mga bakiras kag lanug sa butkun kag batiis,
Samtang nagalagsanay sa bag-ong garab nga taramnan.
Ano ayhan ang akun ibaylo?
Sa mga suyak kag sarubsub sa kahig kag alima,
Samtang gapamorot kang toway sa kanipaan.
Ano ayhan ang akun ibaylo?
Sa gakalamayo nga init ka sirak kang adlaw,
Samtang nagalibud kang tinanuk kag balulu sa kabaryohan.
Ano ayhan ang akun ibaylo?
Sa masapnut nga sabor kang kan-un,
Samtang sa asin ginasamo kag ginasabawan.
Ano ayhan ang akun ibaylo?
Sa korapun nga kingki kag nagaraboab nga moron,
Samtang nagabasa kag nagasolat kang mga tinon-an sa iskwilahan.
Mapin-ut nga inagyan, bisan budlay kag pigado
Wara it manggad nga makasokol, indi ko gid pag-ibaylo,
Ano man malab-ot ko, bahul nga parti ang sangka bes,
Ang akun kabataan.
Pamaan: Nabalhag sa http://dungugkinaray-a.com.
YOU ARE READING
Garagumu!
PoetryGintiriripon kag ginkoris-koris nga mga binalaybay sa Kinaray-a. Kon ikaw makaintindi kang ginawakal ko, dali kag maghapit anay! Note: All writings (published and unpublished) were both created by the owner of this account. Details are included o...
