Singhot sa irong ka daw tawas nga daw bitsin
Paminsarun nagasala kon diin bala magahalin;
Nagalupad, sa hangin nagalotawlotaw
Nagatanga sa kon diin, may ginasagap bala ikaw?
Kanami lang ka pamatyag, blangko ang hunahuna
Hala padayon sa pagsuyup, problima mo madorora;
Dayon kang hinali, pamatyag mo ang kalibotan
Nagaogyon kanimo, tanan imo masarangan.
Tungud sa tigadlum nga imo gingamit
Wara mo naman-i pirwisyo nga imo ginhalit;
Kaogalingun mo kag pamilya ang imo ginguba
Ang kabohi nga gintapos mo, ikaw bala nagkabalaka?
Maghinulsul man ikaw, orihi dun ang tanan
Sa natabo kanatun, sin-o akun bangdanan?
Ikaw bala nga nagtiraw kag nag-adik sa droga?
Okon tanda nga nagbaligya kanimo para makakwarta?
Pamaan: Ginpoksi sa mga tinipon nga solat - Mga Dapli sa Kan-un kag ginbalhag sa http://dungugkinaray-a.com.
YOU ARE READING
Garagumu!
PoetryGintiriripon kag ginkoris-koris nga mga binalaybay sa Kinaray-a. Kon ikaw makaintindi kang ginawakal ko, dali kag maghapit anay! Note: All writings (published and unpublished) were both created by the owner of this account. Details are included o...
