اديك البغلة نوضي باركة من النعاس
واماما واحرام عليك واش حتى فالعطلة منرتاحش
انوضي تكعدي ياك قلتي باغة تخرجي نتي وديك زطيونح ديال حنان دابا تم جاية تصدع ليا مخي راه نجمعك نتي وياها
وصافي هاني نايضة
نايضة مالك سكوتر تهزي تفطري باش نجمع الماعن
_ أعتذر على هاد الدخلة هدا هو فياقي مع نبع الحنان
نعرفكم براسي:
زينب الناجي في عمري 21 عام وطالعة في 22 وهاد العام الأخير ديالي في كلية الهندسة عندي حقي من الزين 🙈بشرة قمحية حروفي كحلين نويف صغير والفم غوز واهم حاجة شعري طويل واسود ومكنطلقوش طويلة وفورمتي هي هاديك كل حاجة في بلاصتها انحدر من اسرة ميسورة الأب ديالي العربي الناجي عندو محل ديال الذهب والأم ديالي الباتول ربة بيت أنا بوحدي لي عندهم شخصية شعبية عزيز عليا الضحك والتقشاب فيما كانت شي زبلة تلقاني مخشية فيها عندي جوج ديال الصحاب علي وحنان على ذكر حنان ويلي ويلي بقيتو ملاهيني حتى نسيتها اليوم تقجني 🏃🏃
زينب: ماما هانا خرجت راه تعطلت على حنان
الباتول:سيري وبقاي دايعة حتال نصاصات الليل كي زوفري
خرجت هزيت ببوشتي(الطوموبيل) وغادية حتى كنسمع تيليفوني كيصوني هذا صديقي علي من الكلية ديما منوضينها فديك الكلية عزيز عليا ديما كنصوفيه في الدروس والفروض بلا ميعيقو الأساتذة الحاصول ناجح على ظهري وصافي
زينب:أفين البغل
علي:الفلبيين العوجة فين شاداها
زينب: غادية عند حنان طلباتني نمشي معاها للمول تاخد شي لعبات
علي: ايااه الناس ديال المول بالصحة الالة اممم
زينب: امالك تمتم علي طلق اش فيها
علي : وااع كتطيريها في السما المهم دابا مريم عيد ميلادها قرب وحنا مخاصمين بغيت ناخد ليها شي حاجة وبغيتك تختاري معايا
زينب: خود ليها شي نص فيه الطون ولاشي بيتزا راها كاتحماق على كرشها 😂
علي: واااااع البقرة داوي من نيتي وراه مخاصمين شوفي ليا شي كادو ارضيها
"علي خاطب بنت خالتو مريم وديما مخاصمين وزينب دايرة مصلح اجتماعي وكتعاونو"
زينب: وصافي مني نرجع نالدار نهضرو واتساب ونحلو قضية الكادو وقضية الخصام نقسو شوية راكم قهرتوني ياك كنقوليك شد معاها الخاطر.
علي: يحفظك اتيتيزة ديالي امتى يجي نهار لي نولي حتى أنا نصحك ونعاونك
زينب: أودي نصح غير راسك خليني من صداع الراس راك عارفني آخر حاجة كنفكر فيها هي الزواج والإرتباط أنا عندي المستقبل اولا طموحي وأحلامي والسفر ثانيا 😍😍😍
علي: وايييه غاتمشي بعيييد وتديري جولة حول العالم وترجعي حفيانة
زينب: كل شيئ ممكن ياعزيزي المهم باش نكونو مفاهمين راه منعقلش عليك من نحقق أحلامي وطموحاتي
علي: اجي على ذكر طموحاتك اش درتي في الستاج
زينب: سكت متفكرنيش غادي نمشي غدا إن شاء الله واااع شاداني القفقافة من صبعي صغير أكبر مجموعة شركات هندسية وعمارة في البلاد وخارج البلاد باينة غادي يحطوني في الأرشيف نشوف إنجازاتهم
علي: ياريت يديروها باش نتشفى
زينب: بحال إيلا داروها غادي نقولها ليك صافي تلاح راه شي واحد ورايا صدع ليا مخي بالكلاكصون
قطعت وهزيت راسي نشوف
YOU ARE READING
صفقة زواج من متعجرف
Humorقصة مغربية زوينة ..قريتها عجباتني وبغيت نشاركها معاكم ..كتجمع مابين الحب الرومنسية الكوميديا،وأكيد شي حوايج خرين تعرفو عليهم اثناء القراءة.... بقلم مينو_كيم
