عند زينب خرجت عند حنان لقيتها شاعلة
حنان: اوا بغيت ندعي عليك ولكن حالتك تشفي العدو
زينب: امالك شاعلة
حنان: واحد الهور ضربني لايدي بالطوموبيل
زينب: و الطوموبيل ماطرا ليها والو بعدا
حنان: تفووو عليك 😠😠😠 نتي وياه
زينب: دابا نتي مالك شاعلة انا متأكدة انه سمع خل وذنيه وجمعتي عليه الناس والغادي والجاي تفرج فيه
حنان: ماشي حتال ديك الدرجة راه تيتيز 😍😍 داكشي نقصت لادوز
زينب: ماشي من عوايدك طحتي الصكعة
حنان: هاهاها باسلة زيدي قدامي باقي تابعنا مايدار
ركبنا في الطوموبيل و تحركنا
زينب: فين نمشيو دابا
حنان: نمشيو عند الخياط خدينا تكاشطنا لقيناه وجدهم طلعو شي حاجة واو 😍😍
ومن بعد مشينا ناخدو الكادو ضرنا حتى عيينا باش نلقاو شي حاجة كتعجب سي علي ولالة مريم
خدينا داكشي لي بغينا و مشينا جلسنا في واحد الكافي
حنان: و هانتي البعلوك حتى هو سبقني بقيت غير انا البايرة فيكم
(بس: انا وعلي وحنان ومريم كنا ديما كنخرجو مع بعضياتنا داكشي باش حتى حنان كتعرفو)
زينب: اوا شوفي ليك مع التيتيز ديال قبيلة
حنان: قلبي عليا مالكي باسلة أمم
زينب: بلا متبقاي تمتمي تما غير سولي
حنان: ياسين مكاينة حتى خبار عليه
زينب: معرفتش و مبغاش نعرف متبقايش تسوليني عليه
حنان: زينب راك صاحبتي وكنعرفك علاش كتعاندي و مباغاش تعتارفي
زينب: باش غادي نعتارف انا حنان واش كتضحكي عليا
حنان: انك معجبة براجلك
زينب: قلتي راجلي ياك راجلي لي مكنعرف عليه والو من غير سميتو وكنيتو راجلي لي 15 يوم و هو غابر معرفتش فين راجلي شخصيته لحد الان مقدرتش نحددها كلها غموض راجلي لي كيكون فرحان حتى كيقلبها معصب ومكنعرف حتى علاش
حنان: صافي سمحي ليا مقصدتش نعصبك
زينب:حنان مبقيتش كنعرف راسي واش انا هي زينب لي كان همها غير الخدمة والأحلام و الطموحات والسفر مشا هادشي كامل وليت نفكر غير في هاد الشخص اللي مكنفهم فيه والو
حنان: واجهيه
زينب: معنديش استعداد نواجهو خايفة ومعارفاش اش ندير
حنان: اوكي متفكري في والو دابا كل حاجة بوقتها
زينب: يالاه نوضي نوصلك باش تمشي راه غدا خدامة
مشينا وصلت حنان لدارهم و مشيت للدار دخلت لقيتها مضلمة عرفتو باقي مجاش كنحس بالدار خاوية و باردة مفهمتش اش هاد الاحساس طلعت حليت الباب ديال بيت ياسين كان عندي امل نلقاه ولكن والو مشيت جلست فوق ناموسيتو و تفكرت نهار كان مريض وكيهتهت قلبي مزير عليا و باغية نبكي علاش مبغاش يخرج من عقلي اش هادشي لي كتحسي بيه ازينب نسيتي راه هو نفسو ياسين المتعجرف نفضت راسي من هاد الأفكار ونضت لبيتي دخلت للدوش دوشت ولبست ييجامتي و نشفت شعري وخليتو مطلوق و مشيت صاوبت ليا سوندويش و جيت تقابلت مع التلفازة كنتفرج في فلم رعب وناكل و مع انا الصكوعية كتقول ليا خالتي هووووب تقطع الضو تخلعت واللقطات ديال فيلم الرعب باقين في بالي مشيت طليت مقطوع على الزنقة كاملة الخلعة شداتني من صبعي الصغير جميع سيناريوهات الرعب جات في بالي سمعت شي صوت كيلعب في الباب بحال إلى كيحاول يحلوا اويلي صافي اليوم يغتاصبوني ويقطعوني هنا مشيت كنجري هزيت الشطابة وتخبيت ورا الباب غير تحل وانا ننزل عليه ضرب ياما تضرب حتى سمعت صوتو و تسمرت
ياسين: امالكي تصطيتي حبسي ملقيا ليا بالعصا هادي هي توحشتك في بلادكم اه صوتو ريحتو هو طيحت الشطابة و دموعي خرجوا بلا منحس وبركت كنضرب في صدرو و صوت التنخسيس ديالي كيتسمع محسيت حتى خشاني في صدرو عنقني وكيدوز على شعري بقيت كنتنخصص حتى رجع الضو شدني ياسين من كتافي وقابلني معاه
ياسين بابتسامة: ساكنة وحدك في هاد الدار
حيدت ليه ايديه وتميت غادية وكنهضر تحت سناني
زينب: قربت ننسى راه ساكن معايا شي واحد في هاد الدار
سمعني ياسين وجرني رجعني قدامو باسني في حنكي وخربق ليا شعري تصدمت وكنقول في خاطري هدا مالو
ياسين: برهوشة وبكايا هه سيري غسلي خنونتك و خرجي عندي بغيت نهضر معاك فشي حاجة
طلعت نبيتي مدهشرة شكون هدا لي جا واش ياسين نيت بفففف هاد السيد اكيد عندو انفصام في الشخصية دخلت غسلت وجهي و نزلت عندو كيبان ليا كيخمم اممم هاز المغرب
زينب: ها أنا اش بغيتي
ياسين كيتمتم متردد: اممم لا لا والو بغيت غير ناقش معاك شي حاجة كتخص الخدمة( الله يجعلني نتيق)
زينب: من نيتك 😏
ياسين: اه علاش
زينب: زعما هادشي لي عندك
ياسين: هادشي لي كاين ياكما بغيتي تعرفي فين كنت😉
زينب عزت نفسي: ماشي سوقي
ياسين بضحك شريرة: اجي جلسي
مشيت جلست حداه وبقينا كناقشو الخدمة و خاشين راسنا في الأوراق و ياسين مرة مرة كيسها عقلو ممعاهش حتى داتنا عينينا
أصبحنا وأصبح الملك لله فقت لقيت راسي مخشية في ياسين و حاطة راسي اويلي كي درت ليها بقيت كنشوف فيه كيبان كيوت و هو ناعس 😍 زينب الرجوع الله نوضي اش كتقولي نضت و انا نسمعو
ياسين وكيماصي في كتفو: راسك تقيل كتفي طاح 😄
زينب مرضاتش: اولا الناس كيقولو صباح الخير وتانيا إلى كان راسي تقيل راه عامر كيتك
ياسين: هاهاهاها برهوشة
زينب: متعجرف 😜😜😜
دخلت لبست حوايجي سروال جينز و تركيو سخون شويا و سبرديلة وجمعت شعري و درت شويا الماكياج والريحة وخرجت لقيت ياسين قدامي
ياسين: إلى كنتي غادية للشركة تسناي نوصلك
زينب: لحسن الحظ غادية للوقع و زايدون بغيتي توصلني و يكثر القيل والقال
ياسين كيقرب: وخليهم يقولو و من بعد
زينب: كيفاش
كالاني مع الحيط وطبع بوسة طويييييييييلة على خدي وقال
ياسين: صباح الخير 😊
YOU ARE READING
صفقة زواج من متعجرف
Humorقصة مغربية زوينة ..قريتها عجباتني وبغيت نشاركها معاكم ..كتجمع مابين الحب الرومنسية الكوميديا،وأكيد شي حوايج خرين تعرفو عليهم اثناء القراءة.... بقلم مينو_كيم
