خطوة نحو الجحيم 3 ( باللهجة التونسية)

الحلقة 88

الحلقة 88 : 
دوب ما حطيت رجلي فإيطاليا تفكرت كلشي صرالي معاها .. من أول خطوة عملناها هوني ..خذيت نفس طويل ...كانت قوة كبيرة اني نتراجع في آخر دقيقة .. من أني نقتلها .. ما نجمش نعملها مهما تقويت على روحي ..اليف ولات قطعة مني بلا ما نحس ..كان نقتلها باش نقتل روحي كهو .. لازم الفترة هاذي نبعد عليها ...خذيت الكرهبة نسوق فيها ...تفكيري بعيد...شبيني منحبش نامن اللي هي عملت هاذ الشي ... و سيرين توا مزالها خطيبتي شباش نعمل... تخمام باش يقتلني هاذ ليام .. دخلت للفيلا هاذ الدار تفكرني فيها كل شبر ...فيه ريحتها ..فازاتها ...منعرش علاش منحب حتى وحدة تدخلها غيرها ...اما زادة سيرين معندها حتى ذنب ..منعرش شكون عندو الحق توا .. وشكون المظلوم اللي متأكد منو انو سيرين معندها حتى ذنب ...ركيت الكرهبة ...نزلت عارضتني سيرين  يالوقت ...
سيرين؛ أوس صافا !!
أوس؛ مليح سيرين انتي صافا
سيرين؛ حمد الله
أوس؛ جود وين
سيرين؛ راقد لفوق
أوس؛ كيم و هديل راحوا
سيرين؛ قالوا اللي مبعد يوليو
أوس؛ باهي هيا جو بارد برا باش تاخوا برد راك
وقفت نغزرلوا سنين تعداو .. اما مزالوا يحس بيا .. و يعرف اللي انا ناخو برد فيسع من الجو هذا .. للحظة سرحت كان مدخلوش لحياتي اكا الكلاب ...كنا توا عايشين مع بعض .. باز يكون جود ولدوا موش ولد اكا الساقط ...دخلنا للفيلا ..خبرني اللي هو باش ياخوا دوش .. دخلت للكوجينة نطيبلوا االبيتزا اللي يحبها ..
أوس يحكي :
خذيت دوش ..نحاول نحي عليا التعب ..عديت يدي على الخياطة متاع الكلية ...قلبي خبط بالوقت .. غمضت عينيا ..تفكرت وقت باستني هوني ...و هربت لبيتها ..تبسمت .. توحشتها و توحشت كلشي يخصها،..نحب نشوفها و تقولي اللي هي خاطيها اكا الشي ،،اما خايف تكون هي و كلشي صحيح ... رغم الدلائل .. أما قلبي نحسوا يوجع وقت نتفكرها ...نشفت شعري .. و خرجت بالكاب ...حليت الڨارد روب ...قابلني اكا ليزار متاع ليلتنا ..تنهدت ...هزيت مريول و شورت و قفلتوا ...بدلت دبشي ... و تكيت نحب نرقد ..ريحتها مزالت هوني ...عنقت المخدة ..و رقدت
..........
اليف تحكي :
فقت الصباح خلاقي دايرة دخلت للدوش ... قلبي خرجتوا ... حليت السبالة نغسل في وجهي ... تي وجهي صفر عاللخر .. دوب ما كملت نحيت اكا الخلعة أصلا ياسر مشبوحة و السخانة ..دوب ما نحيتها ...قابلوني للي تراس متاع يديه نقمت كثر ...كملت نحيت الشورت .. و دخلت خذيت دوش ... نغسل و ونكبس على اكا لي تراس نحبهم يتمحاو ..دموعي نزلوا كان مش أمير ...كون ...منجمتش حتى نكملها ... وهو كان لاتي مع سيرين ...تي شكوني باش نقارن روحي .. وحدة عدا معاها ليلة ... هزيت يدي لحت الكاب عليا ...لفيت روحي و خرجت ... رحت للتاقة ريت امير كيف واقف يحكي مع رجالوا مبين يحضرو في حفلة و لاندرا شنوة .. دورت راسي ...نحي فالورد اللي في النبتة اللي قدامي ... حطيتوا على شعري ... قداش نحب الياسمين من صغرتي غريبة كيف محطوط كان هو ...من دوم الورد كل ... هزيت راسي ريت أمير ... يغزرلي عملتلوا فازة بيدي متاع بونجور ...تبسملي و عملي فازة متااع انزلي تفطري .. هزيتلوا براسي باهي .. و دخلت ...حليت الڨارد روب بلاكشي نلقا شي نلبسوا ... اما تفآجأت البوردو ..الأديداس ... التي-شيرت الأبيض كلشي نحبوا هوني ...شخت  شكون حطهم هوني زعما سراج ... هزيت مريول بيض ربطتوا فوق السرة ...مع سروال بوي فراند و أديداس بيض .. شعري خليتوا مسيب اكاكا ..تو درجين يشيح ..كون أوس توا كان طيرلي جنبي من هاذ المريول ،. اما أوس توا لاهي ..تنهدت تنهيدة من عروش قلبي ...خرجت عارضني سراج بالوقت ..
اليف؛ بونجور
سراج؛ صافا؟؟
اليف؛ مليحة و انتا ؟
سراج؛ مليح فطرت ؟؟
اليف؛ لاا
سراج؛ تنزل ولا نوصيهم يجيبولك هوني
اليف؛ لا باش ننزل
سراج؛ باهي كان احتجت شي خبرني
اليف؛ مرسي سراج
نزلت للكوجينة... لقيت البون تحط فالفطور...گليت بردت قلبي ... حطيت النوتيلا فوق التوست .. و جيت خارجة عارضتني ماريا ... هزتني و حطتني ..
ماريا؛ هاك قمت
اليف؛ تحبني منقومش
ماريا؛ شنية الردود متاعك هاذي
اليف؛ اممم هاذي هدرتي دوماج  نخليك توا بصحتك الفطور ..
تعديتها ووخرجت ... منعرش شبيني منحملهاش حتى طرف ،. خرجت برا ..نفركس على أمير كان هو يخرجني من الملل متاع الدار هاذي ..
اليف؛ تي وين راح توا ...اسمع وين أمير
=خرج من خمس دقايق
اليف؛ اففف شنعمل توا
تبسمت على جنب تو ننرجع للحلول القديمة ..طلعت لبيتي .. احسن شي انهم حطولي تيليفون .. اما بلا بيس ...حطيت كيتمان ... نشطح و نعاود كل ما نتعب نتكا ... تعداو برشا ساعات ... تي حتى الغدا جابتهولي البون للبيت .. غزرت للساعة ..لقيتها الستة متاع العشية .. بدلت الغنية و لفيت ... تخبطت فيه ...شعرا لا طحت مزية لقفني من جنبي .. هز يدو نحالي الكيتمان ...باقي نتنفس بزربة .. باقي يغزرلي ندرا كيف ..جات بين عينيا اكا اليام لي فوتها معاه وقت كنت ...تاعبة تخربطت .. جبدت روحي ...
أمير؛ متعرفش تشطح بالشوي انتي شبي حالتك هكا
اليف؛ انا ا.....
نغزرلها كيف دوب تتنفس .. بدات تتمايل لين طاحت تغاشات .. طيشت الي فيدي و نطرت ليها هزيتها ...
⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم