خطوة نحو الجحيم 3 ( باللهجة التونسية)

الحلقة 102

الحلقة 102 :
بعد شوي ...غزرتلوا ..
أمير؛ أكبر غلطة عملتها في حياتي ... كانت اني نخليك ... من يومها لتوا و انا ندفع غالي عليها .. خاطر كيف وصلتلك بعد ما حبيتك اكا السنين الكل ...من اللي كنتي صغرونة و تهرب عندي وقت تخاف ...لنهار اللي وليت طبيبك ... و لتوا نحبك .. غلطت غلطة باش تخليني نتعذب طول ما انا حي ... نحسد أوس عليك صدقني نحسدوا ... كان انا في بلاصتوا نخطفك بعيد على هاذ الشي الكل ... اما لا ميعرفش قيمتك انا زادة معرفتهاش ... على اذاكا وصلنا لليوم هذا ... اليوم بالذات تحرقت و تحرق اكا الأمل اللي كنت حاطوا تعرف علاش ..
غزرتلوا في عينيه ...
اليف؛ علاش!!
حط صبعوا على كرشي .. غزرتلوا و طلعت راسي جات عيني في عينو ...
أمير؛ خاطر ولدو هوني
على كلمتوا التالية تصدمت .. رجعت بخطوة للتالي نهز في راسي لا ..
اليف؛ أمممير لااا تفددلك قولي موش صصصح !!!
أمير؛ نبان نفدلك
اليف؛ لا لا مستحيل ... منجمش لااااااااا
نزلت على ركايبي نبكي ... هذا آخر شي توقعتوا يصرا ... تي موش وقتوا جملة .. تعدا وقت اكاكا ... عينيا تنفخوا من البكا ... قعد قدامي لف يديه عنقني .. كبشت فيه كثر .. تعداو ساعات ...كنت نبكي و مرات نسكت ... منجمت نحكي حتى حرف ... خطوة محسبتلهاش ... توا بالذات منعرش شنوة باش يصير... اصلا جامي خممت في حكاية متاع الصغار .. طلعت راسي غزرت لأمير .. يغزر للبعيد هادي علخر ... اصلا نفسوا دوب يتسمع ...من عينيه يبان تاعب ... هزيت يدي عديتها على وجهو ... غزرلي
اليف؛ سامحني
أمير؛ لا سامحني انتي تعديت حدودي معاك .. كثرت فالشراب و
اليف؛ متبررش أمير
أمير؛ ارتحت ؟
اليف؛ لا مهدودة و دخلت فحيط أمير ... توا بالذات منعرش شباش نعمل
أمير؛ لازم تخمم مليح فالحل اللي يرضيك و اللي متندمش توا انتي حامل من شهر و يومين
غزرتلوا و نزلت راسي ... يعني توا ولدي ولا بنتي في عمروا شهر ..هاذ الفكرة خلات قلبي يخبط .. ضرب في راسي اوس زعما كان توا رانا كيف كيف ..وكنت نخبروا زعما كان باش يفرح ولا لا .. تي توا راهو لاهي مع سيرين و انا نحلم بيه ...تقعدت شوي .. و غزرتلوا..
أمير؛ تحب ترقد
هزيتلوا براسي اي ...قام مدلي يدو .. و دخلنا دوب ما دخلتي لبيتي قتلوا بونوي ..ترميت عالسرير ...شعور غريب انتابني خلاني نحط يديا على كرشي ..يعني توا فما روح هوني ... غمضت عينيا فكرة غريبة عليا ...كلشي توقعتوا و اسخايلت روحي فيه كان انو نحمل بصغير ... غمضت عينيا ..،جات صورتوا بين عينيا توا انا حامل بولدوا ..توا فهمت علاش نحب عالڨلاس اكا الوقت .. و الحوت و التاج الي في رقبة أمير... الوحم شكون كان باش يقول انو نحمل منو ... مخي تحرق من التخمام الخطوة اللي باش نعملها ... باش تكون مهمة برشا...كي العادة هزني النوم و ماعاد حسيت بشي ...
...................
تعداو جمعتين على الليلة الي خبرني فيها امير على حملي ... متكية عالبلار نغزر لبرا ... منجمتش نأمن كيف كنت باش نطيح البيبي .. أصلا  فاكا الوقت خممت كان في روحي ... كنت انانية برشا ... اما توقفت خاطر ولدي منجمش نعاقبوا على شي عملتوا انا ... تكيت للتالي كون توا كل شي نتشهاه يجيبو أوس ...كان موش أمير كون منجمتش نتقوا على روحي ... هزيت الكاس متاع الشكلاط شربت منو .. الفكرة اللي قاعدة دور فراسي توا ... هي آخر خطوة باش نعملها ..موش خاطري ولا خاطرو هو ... اما خاطر ولدي ... منحبش وقت يكبر يسالني بعينيه ...وين باباه وعلاش مفماش .. زادة ضميري يرتاح .. تلفتت حطيت الكاس فوق التابل ... هزيت سطوشتي ...ريقلت الشوميز متاعي و نزلت .. لقيت أمير يستنا فيا .. دوب ما خرجت .. علق على التيليفون و تلفتت غزرلي
أمير؛ حاضرة ؟
اليف؛ اممم هيا
ركبنا الطيارة ... الديراكسيون إيطاليا ...قلبي يخبط عاللخر ... بعد الفترة هاذي الكل باش نشوفوا ... و نكونوا وجه لوجه ... باش نخبرو على ولدوا .. اما الشي اللي مستحيل ننجم نحكيه ..سرنا انا و الين ... منجمش نضحي باختي ما صدقت كي طلعت عايلتي حية .. خايفة من اللي باش يصير ... شي قوي يقولي ارجع اليف ... اما ضميري يحب يرتاح كهو ...أمير يغزر من البلار ... نعرف متغشش باز موجوع ... وقت نخمم فالفكرة نضيع .. امير اكثر حد وقف معايا ،،، حياتي كانت بين يديه برشا مرات .. و جامي خذلني  .. على اذيكا باش نروح معاه لإيطاليا ..منعرش شباش يصير اما نحب يروح .. حطت الطيارة نزلنا ..
أمير؛ متأكدة من قرارك ؟
اليف؛ اممم هكا كهو نرتاح من ضميري ..
أمير؛ باهي تلقاني فالأوتيل كيف ما تفاهمنا كي تحكي خبرني شيصير معاك
اليف باهي ..
هزيت راسي خطوات كهو تفصلني عليه ... وين باش يكون فما هدرة تقلب كلشي
⏩⏩⏩⏩⏩⏩⏩⏩⏩⏩⏩⏩⏩⏩⏩⏩⏩
#يسرى_أمجوج
#خطوة_نحو_الجحيم