#فوبيا_الحب❤
الحلقة[19]
احمد : اوووي نبو نروحو نحن
عمر : روح واحد ماسكك حسن خوك يبي يسكر
حسن : لالا قمعز في شباب يسهرو
باسم : شن جوك احمد قال صار مع اسامه قصه
عمر : اها والله رن عليا قالي تعال في #### ضروري عديت شوي لقيته قصه علي قطعة ارض هو شراها توا يبي يبيعها وشباب منطقه قالوله ماتبيعهش للواحد برا منطقه قاللهم اشروها قالوله لالا طحناها معاهم بكلام بعدها نحس في جو منطقه مش تمام رنيت علي انس وشباب جونا قربعوها لهم خافو وفي شباب من كتيبه انس يسكنو في منطقه حلوها وباعها وتمت قصه
باسم : باهي اللي انحلت
احمد تلفونه رن : اسكت شوي نشوف عبد الرحمن
احمد : ايو ارحومه
شاب : ايوووه يا خويا
احمد صبي : تفضل من معايا
شاب : نا صاحب عبد الرحمن وانس انت خوه انس
احمد تفلوج : اها تفضل نا خوه انس
شباب كلهم صبو
شاب : تعال لحق علي خوك قالب ام المستشفي
احمد : شنووووووو امتي هذه امبدري كاين يكلم فيا
عمر : كان امك شن في
شاب : تي عبد الرحمن في عمليات هو يعيط قالب ام المستشفي كملها تهديد للدكاتره وتفريغ سلاح
احمد : حالته خطيره هو
شاب : مش عارف
شباب : تي ادوي ازف
احمد عيط : اسكتو ااززف في اي مستشفي انس صارتله حاجه باهي
شاب : لا كويس تعال في جلاء اوكي
احمد : هيا ي شباب
عمر كره احمد : تي تعال هنا ندوي نااا
احمد يمسح علي وجه : انس انس قالب مستشفي وعبدالرحمن مصاب في عمليات
باسم : لالاااا
فارس : نمشو معاك
احمد : هيا بس بسرعه انس قالب مستشفي
عمر : هيا
حسن : باسم رن علي محمود
باسم : محمود ماسك غادي هيا يا أحمد
ركبو باسم واحمد في سياره باسم
وعمر وفارس وحسن في سياره فارس خلو سياراتهم جنب كافي طلعو يجارو
..............
انس يعيط : ##### يا ##### نا مانعرفش حد نا مجنون مطرشق مانفهمش تي طلعوه يمشي علي كرعيه
شاب 1 : تي وسع بالك يا راجل فلوجت الدكاتره
شاب 2 : خوذ منه سلاحه يا راجل هذا مجنون عصبي
ممرض : تي رن علي اقاربه خلوهم يجو يتفاهموا معه
انس مسك ممرض من قميصه : تعرف تسكر #### تعرف ولا نفرغ ام مخزن كله في رأس #### هلك
ممرض يدافع علي روحه ويدف فيه انس تي حول يا راجل نا شن دخني بيكم ان شاء الله تنحرقو كلكم ما قالنلكمش عدو للجبهه نحنا
شاب2 دف الممرض لعند وخر انفك من يد انس : نحن انديرو فيه لله وللوطن ي ### مش عقاب فرخ نفسك يقيمنا
ممرضه طلعت تجري : نبو دم نبو دم بسرعه المريض حالته خطيره
انس جاء قدم عليها : عطيني فصيله بسرعه
شاب3 : فصيله A موجب بعد انصبت انت انا و هو ماطلعنش نفس فصيلتك ماقدرنش نتبرعو
ممرضه : باهي هيا تعالو اي حد Aموجب يجي
أحمد يضبح بصوت عالي : انس
انس برم : عبدالرحمن يا احمد في عمليات
احمد جاء ومسكه انس معش قدر يمسك روحه اضبطه دغري لكن مابكش : حاله خطيره يا احمد
باسم : وسع بالك يا انس ادعيله
الدكتور طلع : احم شباب
شباب برمو كلهم مع خشت هل عبدالرحمن باته وعمامه وخواله
انس : طمني الله يستر بيتك
دكتور : يأسفني نقوللكم ماقدرنش ننقضو مريض عظم الله اجركم
انس😳 : كيف كيف
شباب قعدو يبكو وبات عبدالرحمن انهار وطاح عليهم قلبو مستشفي بكاء و ممرضات ودكتورات قعدن يتباكن
احمد : إن لله وإنا إليه راجعون
انس قعد يدف في دكتور : تي لالا غير رد تأكد رد رد
باسم : وسع بالك يا انس قول الله يرحمه
انس طلع يجري ولحقه احمد ما طقش فيه تلاقي هو عمر وحسن وفارس انس ركب سياره عسكريه وطلع يجري
احمد داهش : تي كنكم ما وقفتوه
عمر : شن صار شن العياط هذا
احمد حط يديه علي ركبيه ومنزل رأسه داهش : توفي الله يرحمه
شباب : لالاااا
فارس حسن : إن لله وإنا إليه راجعون
احمد : عدو شوفو هله ونا نلحق انس
عمر : رن عليه قبل كان هذا خليه براحته
احمد قعد يرن يعطي فيه مقفل
ردو كلهم للمستشفي
بات عبد الرحمن يبكي : كسرتي ي وليدي حتي انت عديت للخيك
عمه : وسع بالك يا خويا شهداء هذوما شهداء
شباب وخوال عبد الرحمن قعدو يجارو علي إجراءات دفن وسبب وفاه
شاب1 : ايوه.. كييف... تي هبل هذا ولا شن ..... تمام اهو جاين... توفى اها ..الله يرحمه ...هيا سلام
شاب1 : شباب نص يقعد يعاون حاج ونص يطلع معايا للمحور
احمد : عليش
شاب : والله خوك هلكنا قالبها غادي مقتحم عليهم
احمد : نبي نعدي معاكم
عمر : ونا نبي نمشي
شاب : لالا وين غادي مكان خطير مش اي حد يخش
احمد : نا قلت نمشي يعني نمشي عمر خليك مع حاج بلكي يحتاج حاجه
طلعو شباب ركب معاهم احمد بس
..............
الاء : خويله شن صوت العياط وتفريغ هذا
خالتها : اكيده من شباب جبهه واستشهاد
الاء : ياناري وجعني هيا ننزلو
خالتها : لالا قمعزي هنا هذوما نقشاتهم بيد وسلاح بس
الاء : مش كلهم يا خويله
..............
هبه : تعرف غريبه احمد لعند توا مازال ما جاء ساعه 4
عصام : يبي يفضيلي جو بيش نهدرز
هبه : مسمطك والله شغلني
عصام : بكرا الاحد جايا
هبه : اها اكيده
نا نضت بحتت فيها لقيتها تدوي صبيت خشيت للحمام وعديت للمربوعه مالقيتش احمد رديت للهبه : وين احمد
هبه : خلاص حبيبي تصبح على خير
عصام : وانتي بخير يا عيوني
هبه سكرت وبحتت فيا : مازال ما جاء انشغلت عليه
نا : واضح أنك مشغوله
خذيت تلفوني رنيت مابش يرد عليا كالعاده قعدت في صاله نرجى نا وهبه بعدها نعست خشت
...............
أحمد خذا سلاح من انس قمعز هو وياه في سياره
احمد : انس صحصح خلاص قول الله يرحمه ويسامحه
انس : قالي دير بالك علي هلي خليك كيف ولدهم يقولي امي يا انس دير بالك منها وخواتي كيف خواتك
احمد : باهي كنك ماسكها يا راجل ابكي فش غلك قول الله يرحمه ويحطه في احسن مكان في جنه
انس قعد يبكي ويضرب في دومان : هو يبي خوه اصلا قالي مرايف عليه عارفتها نا من كلامه أول ما انصاب دمه بين ايديا ومبتسم
احمد كر انس يضبط فيه : فشها ابكي ماتخليهش في قلبك
انس بكاء بكاء لعند هدا احمد كلم واحد من شباب وصلوهم للحوش واحمد رن علي عمر قاله ردو كان كملتو روحنا نا وانس
...............
نا : وينك هيي انس كنك
احمد : جعان
انس هز رأسه بلا
احمد : خش للحمام واغسل وتعال تريح
عدا انس للحمام
احمد : شن سهرك انتي وكنك ترني
نا : رقدت ونضتت انشغلت عليك مالقيتكش في مرقدك
احمد : خلاص خشي ارقدي قبلها اطرحي للانس
نا : باهي كنه هو هكي منظره متبهدل وشكله باكي
احمد : صاحبه استشهاد خشي اطرحي واسكتي
نا : ياناري يا عيوني الله يرحمه
احمد : امشي اطرحي
طلع انس عزق روحه علي فراش احمد وطرحت للاحمد قعدت نسمع فيه كيف يدوي علي صاحبه وخنقاته العبره احمد يهدي فيه وجعني الحق خشيت رقدت
...............
عصام : صباح خير وينك
هبه : صباح ورد نضت متأخر نكمل بس
عصام : بسرعه مرايف عليك
هبه : ههه باهي وين قاعد
عصام : مع ابله سميه
هبه ساكتت
عصام : ههههه نبصر معاك في سياره
هبه : سلام
منتصر يدق : هيا يا هانم كان انتي ابله نا طالب توا يخليني نسيق حمامات
هبه طلعت : باهي نفطر
منتصر : افطري في مدرسه اطلعي
...........
عصام : صباح الورد والياسمين
هبه : صبح خير استاذ عصام
عصام : كيف حالك يا ابله هبه
سميه : خير يا عصومه
هبه : عن اذنكم عندي حصه
عصام : احم. خوذيني معاك حتي نا عندي حصه عن اذنك يا ابله سميه
سميه تنرفزت : كيف حضرت شياطين ذهبت ملائكه
عصام : لا حشاك بس عندي حصه
هبه : شن تسجيل غياب وين يا ابله سميه
سميه : اهو قدامك
وقعت هي وعصام وركبت وهو لحقها
عصام : بست انت يا حلو غير عبرنا
هبه تمشي مش معبرته
عصام : تي ناعليا من مؤدب رقم باتك باهي نجي نطلب طول
هبه : خش حصتك ممكن
عصام : لا مش ممكن اليوم الوحيد اللي نحقك فيه حصصنا مع بعضهن شن جو شين هذا
هبه : عليش تدوي معاها
عصام : دويت نا حبيبي بلاش منا جو نكد خلينا في مهم قالتلي امك
هبه : اليوم نبي نقوللها توا نرن عليك
عصام : نعليا نا نرجا شن ورايا
طالب قعد يكر في هبه : يا ابله يا ابله قوليلهم
عصام : أطلق يدك يا حيوان خش حصتك
هبه : خلاص خش سكتهم نا راسي مش راقده
خش عصام سكتهم وحصل كم واحد جلده وعطو حصصهم وروحو
...........
ماما : خيك بات هنا يا ايلاف
نا : اها يا ماما
ايمان : باهي كنه طلع من فجور
نا : تي اسكتن امس صاحبه استشهاد وجعععني
بنات : يا قلبي
ماما : كلمي واحد منهم يجي نمشي نعزي
نا : اكيده كلهم عدو للدفينه عشان من امس ميت
هبه : ياناري تلقي خواته يبن يطرشقن
ماما : مينته هي اللي توا تخوخم
نا : عارفات اي منهم انتم
ماما : من
نا😔 : امس سمعته قال عبد الرحمن هذا خوه علي اللي استشهاد سنه اللي فاتت اللي اخته احلام مدادي البنت
ماما : ياناري علي خديجه مارله والعه فيها نار جن هنا في اصابت خوكن
ايمان : اها جن الحق هي وبناتها الاثنين
ماما تبكي : يا ناري والله وليه طيبه كسرتها في عويلها
نا : خلاص يا ماما اهدي توا يخش بابا يشيلنا
هبه : تبي تعدي مش تخافي منهن الايام عزاء وقت خباره
نا : وجعني يا خيا كان سمعتي انس كيف يدوي عليه امس ببككل متأثر
باب يدق
هبه : ايوه اهلا خش
ايوب : شن جو
هبه : تمام خش
ايوب : لالا مستعجل غير احمد رن عليا قالي جيب امي للعزاء
هبه : ماما اهو ايوب يبي يشيلك هيا
ماما : هيا نوضي امشي معايا
ايوب : هياااا يا خالتي تبي تلبسي عربي
نا طلعت من دار : اهلين
ايوب : أهلا
نا : عادي تراجيني نبي نمشي مع ماما
ايوب : عليش ماشيه
ماما طلعت : نا قلتلها
نا : كان مستعجل خلاص اربح عادي
ايوب : لالا نرجاك هيا
خشيت بدلت بنطلون أسود سوريتي سوده كويش أسود وشاح كريمي
هبه : مقنطه أمور عزاء أسود في أسود
نا : يا بارده خزي
طلعنا نا ركبت من لاورء وماما من قدام ويبحت فيا من مرايا أول ما خشينا للشارع نسمعو في صوت العياط
ماما : يانعليا اكيده خيته
نا قعدت نبكي : ياناري لنقانها واعره
ايوب : كان تبي تبكي مش لازم تنزلي
نا : لا نبي ننزل زعمه دفنوه ولا خلوها علي عصر
ايوب : لا دفنوه علي ظهر لكن زحمه بكل
ماما : وين عويل وحاج
ايوب : روحو احمد وعمي انس بس قاعد نا برا لعند عشيه ونكلملكن حد تطلعن هيا انزلن
نزلنا وخشينا للخيمه ونلقاهن يتمحمسن علي تراب نا معش شديت روحي قعدت نبكي ماما عدت للام المرحوم ونا عديت للاحلام وانتصار خواته
احلام اضبطتني : يانعليا يا ايلاف خيي عدا وسيبني يانعليا ظهري انكسر وووه علي ووه عليا من بينا حي علينا من لنا بعد غيبته
قعدت تخبط علي ظهري ونا نهدي ونطبطب عليها ونبكي لكن معش قدرت انهرت من كلامها
احلام : يانعليا صغير مازالنا مافرحنا بيه يانعليا وووه عليا ديما شن نديرو بعدك ياغالي لحقت علي مرايف عليه يقولي فيها ي نعليا مازلنا محروقين من موتت علي تحرقنا في رحومه ليش ياربي ليش من بينا نحن حي علينا
نا نبكي : خلاص اهدي يا احلام قولي لالله الا الله وحدي الله الله يرحمه
احلام تبكي وتعيط :موعرها موعرها فقدت خوه نار والعه فيا نار حي عليا شن يبي يطفيها نعليا يانعليا هم الاثنين يانعليا ما عاد عندنا واللي
نا نبكي : خلاص اسكتي انتي كبيره توا من يبي يصبي جنب باتك وامك وانتصار
احلام تبكي : نبي خويا نا نبي خويا نبي سندي كسروله ظهرنا معش عندنا علي من ننسندو من يبي يدافع علينا من يبي يقول خواتي خط أحمر من بس قولولي من
جت انتصار خشت في نصنا
انتصار تبكي : خلاص يا احلام معش تعددي عليه مش كويس
احلام قعدت تشحط في نفس بسيف معش قدرت وبعدها طاحت من بين يديا وتلمدن عليها صبايا كلهن
نا : بسم الله بعدن لو سامحتن جيبن ميه
عميمه خديجه تبكي : ناعليا بنيتي تبي تريح من بين يديا يا فوزيه دونك الها كرعيا رقدن
ماما : ايلاف واعي بنت
نا نبكي ونرعش ونرش عليها في ميه : احلام احلام انتصار كلمي عويل عمامك يجو يسعفوها جيبن عبايه يا بنات
طلعت انتصار تجري قابلها عمها و ولده خشوه رفعوها وطلعو بيها دغري قعدت مع انتصار ساعه وبعدها ايوب كلم قال هيا مسكت فيا انتصار
انتصار تبكي : خليك يا ايلاف
نا نبكي : توا نجيك بكرا حبيبتي سلميلي علي احلام
سلمت علي عميمه خديجه شدت فيا بكيت معاها طلعنا
..............
