🌸✴عشقي المشوه ✴🌸(كرونيك باللهجة التونسية : مكتملة )

part 1

عشقي المشوه
(1)
على صوت فيروز الحلو ، مع نسمة الصباح ااباردة ،ريحة القهوة الفايحة..حلت الشباك وطلت براسها ع الشارع ...الحركة متاع الكراهب ، صوت الموتورات الغاصة ...تصويرة كل يوم تتعاود قدام عينها .... صوت  الشادلي النجار يعارك في الصانع متاعو ، حسيبة المجنونة تنادي لكنتها باش تلم الحوسة ، مبارك العطار يجري ع الصغار باش يلعبو بعيد...ملت من ها الروتين ومن شوفة نفس الشارع ونفس الوجوه ...ومن سمعان نفس الاصوات ...لازمها حاجة تخرجها من ها الخنقة ،جاها صوت مرت خوها "للا ...كان كملت تأملت يلا خليني نلم ها  الوسخ ...نرمالمون تعاوني وتمد يدك في عوض تحسب في الماشي والجاي "
تنهدت وهي تبعد من بلاصتها ، لبست فاست في الكرمال وتفقدت صاكها قبل ما تخرج  " ياااا...خوك قالك شوف تركينة غير ها التركينة ...وانت ماكلة راقدة لا صنعة لا خدمة ....ع الاقل اخدم ونطر الفرنك ..."
سكتت و خذات طريق للخروج " زيد ابلع لسانك ...صدقني ماترجع تلقى دبشك في الباب ...وانت كي كدس  العزاء ،لاتبل لا تعل ..."
غمضت عينها تحاول تتحمل قد ماتنجم ،رغم انو ضاق بيها الحال ، لفحتها النسمة وتفكرت انها ما لفتش رقبتها بالكاشكول متاعها ، موش لازم ترجع للدار وتسمع زرارق مرت خوها ....
رسيل ....هو اسمها ...عمرها في الخمسة والعشرين ...عاشت طفولتها ومراهقتها مع بو وام وخو ...كيف الحلم ...احلى ايامات عمرها ...من بعد موت بوها في اكسيدون تقلب كل شي ...وزيد قرر خوها يعرس ويبعد عليها هي وامها ...امها ايلي فاقت بروحها مريضة بسرطان الرئة في اخر مرحلة منو ...حاولت تقاوم وتداوي لاخر النفس اما الموت كان اقرب منها ...لقات روحها وجه لوجه مع الدنيا بقسوتها وبالخايب متاعها ...فمة كاس شربت منو الحلو ...وجاء الوقت ايلي لازم تشرب منو المر ...قرر خوها يهزها معاه لدارو في عوض يخليها وحدها ...لكن مرتو كان عندها راي اخر ...ماكانتش تحملها ولا تطيق نهار تقعدو كامل معاها ...وكل ما يزيد يوم كل ماتزيد المشاكل ...عبارة نار و ڨاز بحذا بعضهم.  .ها المشاكل خلات خوها يتيقر من الوضع ويتقلق. ....جاتو صعيبة يقلها شوف خدمة والا دبر مصروفك ...اما مرتو ماقصرتش وين تلقى فرصة تسمعها الكلام بلا حساب ....الكلام كان هابط عليها كيف السكاكن....ياويلها تلقف ايلي مازال من كرامتها والا تعدي وتصبر بحكم ماعندهاش وين تمشي .