🌸✴عشقي المشوه ✴🌸(كرونيك باللهجة التونسية : مكتملة )

🌸💛part 19 💛💚

مستحيل تشم ريحة البحر وما تمشيلوش ...هذا خطوة بحذاها ...لازم تتمشى شوية ع الرمل وتعمل تدوليشة...فاقت بكري وخرجت.... خممت تحوس شوية مادام مازالو راقدين هوما ...نسمة صباح نعوشتها ...فركت ذراعاتها لانو الطقس كان بارد في هاك الوقت ....قربت ساقيها للماء وخلتها تتبل ...حستو انو سرى في بدنها الكل ....ضربتها موجة مليانة رمل ...خلاتها توخر ناحية الحجر وتختار بلاصة تقعد فيها ...مدت ساقيها وسرحت بعيد ....فمة فلوكة ...بارشا فلوكات في وسط الماء ...صوت الصيادة من بعيد بعث فيها روح جديدة  ...اذا هوما هكا ناشطين ويسعو رزقهم علاش ماتعملش كيفهم....هي توا في نقطة الصفر...وقيت باش تخرج منها وتقدم...توا عندها عايلة صغيرة ...كتف تتكى عليه وماتخافش يخليها ....لازم تخلق من الدار هاكي جنة ...ماتخليهوش يندم نهار انو اختارها ...فيقها من سرحتها صوت راجل قريب منها ...يلوج في حاجة وموش لاقيها...خزرتلو تحب تفهم علاش يلوج بالضبط.... شافتو يهز يديه واكتافو مسلم ...قامت ناحية البلاصة ايلي كان فيها ....وقبل ماتوصللها ...بانت شبكة مغطيها الرمل "،يااا خويا ...اي "
خزرلها مستغرب "اذا تلوج ع الشبكة هاي هوني "
هبط يهرول ناحيتها "اوووه...والله هي ...الله يرحم والديك ...في بالي ضاعت "
جبدها وهزها في حملتو  وخزر لرسيل ممنون " يعيشك يالا ..." عقد حواجبو " انت ماكش من هوني ....اول مرة نراك...جيت تبحر قبل الوقت "
"انا نسكن هوني "
استغرب ، شاورتلو بصبعها للدار " انا نسكن فم "
بلع ريقو " ياخا شريتها ....في بالي ماهيش للبيع "
ضحكت " ايه ماهيش للبيع"
زاد دخل بعضو وخزر مرة اخرى لوين الدار " هاكي دار زكرياء"
"ايه...بالضبط "
قالتها فرحانة ...هذا يعني هي تابعتو ...باقل مشاكل مالا....تبسملها بربثة وجبد روحها منها ....ايلي يراه يقول هارب ...ضحكت عليه وعلى حالتو ...يظهرلي حتى هوني راعبهم ...اما موش مشكل تو كل تصلحو ، خذات الطريق مروحة ، عرضها نسيم يلهث وهو خارج ووراه زكرياء " ياخا وين كنت "
تبسمتلهم " نتمشى ...تسخايلوني تخطفت "
بعدتهم من الباب بيدها ودخلت "  حضرتو القهوة والا نحضرها انا "
خلط عليها زكرياء" المرة الجاية معادش تمشي وحدك خاصة وقت كي هكا ...وقت خروج الصيادة "
" وعلاه"
"ماتمشيش واكاهاو"
"لا نمشي"
"رسيل ماتصححش راسك "
"قلي السبب قبل "
غمض عينو بقلة صبر " صفا ...صفا ...احسبني ماقلت شي"
هزت اكتافها بلا مبالاات ودخلت للكوجينة ...لازمها قهوة توا فواحة تخلي عقلها يشد بلاصتو وهكا يكون صباحها بارفاي .
❇❇❇❇❇❇❇❇❇❇
 
ايامات من بعد تعدو كانت بالنسبة ليها خيال.... كانت هي عليها الدار وهوما الخدمة...لقاو اخيرا دار دافية يروحو يلقاو الفطور يستنى ...والنظافة والتنظيم...غير هذا الروح الخفيفة والقلب الحنين ...شي يخفف عليهم صعوبة رزقهم ...ليلتها  استحقت اوراق باش تقيد عليهم اوفر خدم ...لازمها تلقى حتى وحدة شدان يدين ...دخلت لبيت صغيرة ، في تركينة من التراكن المنسية ...قالولها فم تنجم تلقى اوراق ...لكن ايلي راتو ...حاجة اخرى...مكتبة مليانة كتب وارواق ...مجلات ...جرايد...كل حاجة مكتوبة لقات منها ....فمة غبرة مرصية فوقهم ...باين انو مااستعملهاش عندو مدة ...عدات صوابعها عليهم وهي تقرى في العناوين...كتب تعليم اللغات ...راويات تاريخية...كتب تنمية بشرية مجلات علمية قديمة  ... سطعت ساقها في كردونة كبيرة  ...هبطت تحل فيها لقاتها مليانة كتب هي زادا ...معقول هاذم الكل ليهم ....قعدت لوطة وبدات تورق في كتاب على برا  اسمو "250  مهارة ذهنية " ، قرات الصفحات لولانين ...لقات فيه لغة ساهلة ونصايح مزيانين يعاونوها هي بالذات ، طل عليها زكرياء ..." على اساس باش تجيب ورقة وترجع..تسيت روحك هوني  "
هزت راسها " هاذم لكل ليكم ، ماكنتش نعرف انكم تقراو كتب...مثقفين طلعتو  "
"بون موش الكل ...اما قرينا منهم "
عوجت فمها " باندي ويقرى ...حاجة موش كل يوم نشوفوها "
ضحك وهو يقعد على كردونة مسكرة مليانة كتب هي زادا " ممكن هاذي الحاجة الوحيدة ايلي ربحتها من الاصلاحية"
سكرت الكتاب" انجم نسأل "
"نعرف اش باش تسأل ...علاش دخلت للاصلاحية ..." تنهد " خاطر حرقت دارنا متعمد "
سكتت ومالقات ماتحكي ،استغل الفرصة باش يكمل " وقتها ...مراهق...حبيت نرجع الصاع صاعين ....بما انهم ...بعثوني لعايلة اخرى بعيد عليهم....نسوني من حياتهم....بلا سبب ...من غير مايكون عندي ذنب....في الوقت ايلي خواتي يعيشو معاهم ...كنت انا بين ناس مانعرفهمش...كنت بالنسبة ليهم عار ولازم يغطوه...هاكي علاه قررت نكون العار ايلي حبو عليه ونعمل العيب ايلي ستنوه مني  ..قررت نحاسبهم...فحرقت بيهم الدار "
هز حاحبو " شفت قداشني شراني "
حبات لين وصلتلو ، حطت يدها على ركايبو " مانعرفش شنوة نقلك...حابة نقلك عندك حق ...اما انت غلطتت...اما زادا خلصت سومها ....ممكن لو مادخلتش للاصلاحية كانت حياتك تكون غير هكا ....ممكن راك مع عايلتك توا "
خذا يديها بين كفوفو " عايلتي تخلات عليا  من قبل....و الاصلاحية كان مجرد سبة لقاوها باش يزيدو يبعدوني....هوما يكرهوني ...والشي هذا يقتلني " مدت يدها لوجهو وتلمست خدودو " ربما هي سبة باش احنا عرفنا بعضنا ...وحبينا بعضنا ...وهانا عايشين مع بعضنا... احنا زادا قادرين نكونو عايلة ....ماضاع شي..."
"صحبح....ماضاع شي ....مادام انت معايا موش باش يضيع شي "
✴✴✴✴✴✴✴✴✴✴✴
تفقد مالازمهم وشنوة يستحقو قبل مايخرجو للبحر ...هبطت من فوق وهي تتمايل وعلى راسها مظلة كيف ايلي يلبسوها الصيادة ،ضحك نسيم وهمز زكرياء" موش تقول عليها بنت بحر حرة "
دارت توري في ڨدها " شقولكم...تنجح والا لا "
نسيم " هااايل خلاص"
"ايا باهي انا زادا قلت ...هايلة و الناس باش يراوني يقولو باباب ملا بحارة "
زكرياء " وين باش يراووك ...معملة تخرج هكا للسوق"
"تي اما سوق ...ماشية معاكم "
فرد وقت " اه "
"كيما سمعتو ..."
زكرياء" مستحيل "
شدتو من ذراعو ورجتو " اماااان "
"لا يعني لا "
"يعيييشك "
"قلت لا راو " حاول يكون جدي وصعيب وكذا
"يعيش حبي "
حب يقلها لا ...اما الكلمة سكتتو ...خزرلها موش مصدق ايلي سمعو " معناها موافق"
تعنكشت فيه وباستو من خدو وخرجت تنط كي الارنب ، دوح نسيم راسو وهو يتمتم " وعامل فيها صعيب وسي السيد اوووو"
قعد فمو محلول وبدنو مخدر بكلو مع بوستها ، يا سعد الخد بشفايفها ...هاكي لازم مايتغسلش .
ركبت في الفلوكة وهي تتمايل ...شدت فيه باش ما اطيحش" راسي بدا يدور "
وقت مشاو بيها مسافة لقدام ، بدات خواطرها تدور وبارشا مرات تخيلت روحها تغرق ، بدات ترد ورمات الاربعة ، جرالها زكرياء وهو يمروح عليها و يغسللها في حالتها ..." بحارة وذني طلعت "
"انت تسكت ....ماقتليش انو انجم ندوخ "
"وانت خليتني نحكي حاجة "
الشي خلاهم يرجعو للشط ، ايلي اصطادوه فيه البركة ....اول حاجة عملوها هبطوها ...ماصدقت لربي باش ساقيها مست الرمل ، قعدت ومدت ساقيها ...قعدت تخزرلهم وهوما يربطو في الفلوكة و يفرغو في الحوت في الصنادق...الوقت كان غروب ....والشمس دوب ماسطعت فيه ...شعرو مبلول ولى سبلات سبلات هابطين ...بان وجهو قمحي...كل شي فيه مرسوم بدقة ..بدنو منحوت تحت التريكو...اخ يقتل ...ضرب قلبها بقوة ...ياسر مااحلاه...صاحت " يااااا ..انا تاعبة وانت لازم تهزني على ظهرك "
ضحك عليها وهو يكبس في الحبل مليح ، قامت ومشاتلو " نحكي معاك....موش تفاهمنا تعملي فازات رومنسية و تهزني على ظهرك ونجرو ع الشط هاي فرصة "
نسيم شد ضحكتو بالسيف " انت قلت اما انا قتلك ماانجمش شي صعيب عليا "
دار يتفقد مرة اخرى في الحبل ، لقات ظهرو مقابلها...تعنكشت فيه وشدت في رقبتو بكل قوتها " لازم الغورة "
حاول يهبطها اما هي كانت كيف العلقة ....ضحك عليهم صاحبو وهو يرى فيه يدور بيها وسط الماء وصوت ضحكها مالي الدنيا ، فشل انو يهبطها ...نجمت اطيحو وتغلبو ، قعد والماء غام شطرو وهي مازالت معنكشة فيه ....تالمون ضحكت معادش منجمة تتنفس ...ولات تشهق ،تفجع  وخاف تكون جراتلها حاجة ...دارلها مفجوع "لاباس"
ضحكت وشخرت " هههه قريب تقتلني بالضحك "
ضربها براسو " مجنونة "
اول مرة يشوفها تحت ضوء الشمس الخافت ...شطر وجها اظلم ...وفمها مليان ضحك ...عينيها لين تغمضت ...ويديها مازالت شادة فيه تمنى في هاك اللحظة لو كانو وحدهم في الكوكب الكل موش كان فم...تمنى يطعم شفايفها من غير مايتردد ...لكن الوعد مرة اخرى ياقف في طريقو وغير هذا.
✴❇❇🌺🌺✴⭐⭐❇
حلالها النوم...قعدت في بلاصتها تتململ وخيالها يتفكر فيلي صار امس ...الفرحة ايلي راتها بين يديه مستحيل تكون شافتها قبل ....وقت قررت اخيرا تقوم كانو هوما تقريبا في وسط البحر يخدمو ...دارت كيف المجنون ...مالقات ماتعمل ...ولا قضية عندها تضيع بيها الوقت ...قررت تعبط لسوق الحوت. .مازالت حافظة الطريق مليح ...ماكانش بعيد عليها ..هاكي علاه فيسع ما وصلت ...قعدت تدور من غير مايكون عندها هدف معين ...هي تعمل هكاكا لانو كانت تحس بالراحة لمجرد انها تحوس فم...ساعة ساعة تاقف على بياع وتملى عينها من اشكال الحوت واساميه ...قررت تقول لزكرياء يعلمهالهم ....وساعات تقعد تسأل على العدة متاع المصيد هاذي زادا لازم تقلو يحفظها اساميهم ...وقفت على صاحب نصبة صغير يبيع في اكسسوارات  ..اغلبية كانو مصنوعين ملي يخرجو البحر من ببوش وحجر وتناوش ....عجبوها بارشا وملقاتش في جيبها فلوس باش تشري وحدة منهم. ..قعدت كان تتفرج فيهم ...صنعتهم كانت ساهلة ...ماتستحقش منها تعب كبير...بدات بارشا حكايات تضرب في راسها ...علاش ما تحاولش هي زادا تصنع كيفهم...منها تقتل الوقت ومنها تستفاد في عوض تقعد لا خدمة لا صنعة ...هذا موضوع زادا لازم تاخذ فيه راي زكرياء ...فجعها صوت خشين  وراها وهو يصيح على مرا في عمر الستين " قتلك الف مرة هز الحوت الجيفة متاعك وانصب بيه بعيد...ياخا عاملتها بلعاني"
بصوت خافت رجعت عليه المرا والرعب ماكنها " لبرا شمس والحوت باش يعمل الريحة "
"تي هو ريحتو منتنة ايا هز بڨاجك وبرا "
حاولت تترجاها لعل يبدل رايو " اتو نبعد غادي ...ماتخافش ...تو ماناقفش مرة اخرى "
"تي هز عليا الهم هذا "
ضرب بساقو ڨاجو السردينة ايلي جات الكل لوطة في القاعة ، هبطت المرا تلم فيهم بلهفة  "حرام عليك رزق صغاري ...رزق يتامى "
هوني صونى راس رسيل ...هذا اسمو ظلم ...قربت منو وبراس مرفوع " ياسيد حرام عليك راو ...المرا عندها الحق هي زادا تسترزق "
فاقت ع الوضع ايلي حطت روحها فيه ،الراجل ذراعاتو برك يوزنو طرناطة وغير هذا معبيه بوشم متاع حنش والا تنين حالتها ما تسمحش باش تثبت شنوة بالضبط ، هزها وحطها " اقلب منظرك انت وهي يلا ...تجبد "
عفس ع السردينة غفصها ،لمتهم المرا وهي تغفص في دموعها ، مانجمت تقول شي غير انها تهز روحها وتمشي ...غاضها حالها و رقلها قلبها وحست انو ها المرا مظلومة من الدنيا كيفها ...قعد في بالها كلمتها " رزق صغاري ...رزق يتامى " ...حطت يدها على صدرها ...حاجات كيف هكا تخلي قلبها يفرفط و يضيق بيها ....
روحت تدز في ساقيها دزان والحكاية موش حابى تتنحى من بالها ...حضرت العشاء وهي ساهية ....وقت سمعت صوت زكرياء ونسيم وصلو جاء لبالها الحل ....علاش ماتقلوش علي راتو ليوم في السوق ...و تخليه ياخو حق المرا ....موش الناس تخاف من  فم....اما لازم تعرف كيفاش تقنعو لانو هو بعمرو مايحب يتدخل في حاجات كي هكا ويبلع في روحو في المشاكل ...استقبلتهم كيف كل المرة الفم يضحك والعين تلمع ...نحت عليهم شطر التعب ....خلاتهم بعد مادوشو وروشكو ارواحهم وحطتهلهم العشاء ايلي ريحتو فاوحة ...الشاهية كانت محلولة ونزلو ع الماكلة بلڨدا ...استنت لين يكملو وصبتلهم التاي و بقات تلوج في فرصة تجبد الموضوع .