🌸✴عشقي المشوه ✴🌸(كرونيك باللهجة التونسية : مكتملة )

💙❇part 42 💙❇

كان شارد وعقلو سارح ، رجع بذكرياتو للصغر متاعو مع زكرياء، وتفكر اللحظة ايلي ضربتو امهم بالسكينة ...وصوت بكاه بعدها ...هو وقتها سكت ورغم شاف كل شي ....جرى وتخبى عندها ...مايعرفش علاش بالضبط عمل اكاكا.... ممكن خوف لا تعمل فيه ديما عملت في خوه.... "انت هوني وانا نلوج عليك "
ماهوش يتخيل في صوتها ،بالفعل هي امو ايلي سألتو ، خزرلها " وعلاش تلوج عليا "
"علاش ماقتليش انو زكرياء باش يخلي الشركة ويرجع منين جاء"
"ماهوش باش يخليها ....مديدة ويرجعلها ماتفرحش"
"هاذي فرصتنا ...اذا ماخذيناش منو توا الشركة  معادش باش نلقاو فرصة اخرى "
نفخ  " امي ...انا ماعينيش فاش نحكي في هذا يلزم وهذا لا ....بالحق توا مانحب نسمع شي"
وساعت عينها " شنوة تحب تقول. ..ياخا سلمت "
"موش سلمت اما تعبت....ماانجمش نكمل نحفرلو وهو ايلي منع ولدي من الموت "
"ااااادم !؟"
جاء صوت ضياء " بابااااااتي"
"ياروح باباتو " حملو عندو وحطو فوق ركايبو ، مدلو ولدو ورقة " انا رسمت هاذي ....وما قتلي نوريهالك "
"اوووه....ولدي الذكي ...تره خلينا نشوفو اش رسم  سي ضياء"
حل الورقة المطوية ،لقاها رسمة متاع صغار بان فيها راجل شعرو واقف وشطر عينو مخبية بماسك ،استغرب ادم وقت شافها '"شكون هذا "
بفرحة " عمو زكرياء"
مستغربة " عمو ؟! "
عمل روحو عماد ماسمعهاش وسأل ولدو "' وعلاه رسمتو هكاكا "
"خاطر هو كان كيف سوبرمان ....منعني ...وانا عمتلو قناع وسميتو البطل متاعي "
قعد باهت في ولدو ، هو ملايكة وصغير وعرف انو زكرياء انسان باهي موش خايب ...وزيد سماه البطل متاعو ...يعني هو يخزرلو بعين كبيرة ...اما هو ...رغم ايلي شافو... وخالط العباد من الشمال للجنوب ...قعد ولد امو ...ويتبع فيها وين تقلو امشي يمشي....سأل روحو سؤال .. عجز انو يلقى جوابو ...هو علاش يكره زكرياء ؟ لعب على شعر ولدو من بعد باسو " و شنوة باش تعمل بيها ها التصويرة المزيانة كيفك "
خرج لسانو " مانقولش"
هالة قاعدة حالة فمهم فيهم الزوز ...سبحانو مغير الاحوال ...يعني هو منع ضياء كسب الصغير وبوه... حتى انو نساه في كرهو ليه و في رغبتو انو يورث ويرجع بي دي جي الشركة ايلي حلم يكون مالك اغلبية الاسهم متاعها تنفضت بكل غش وقامت من بحذاه " انت مخك ولى في بر اخر....اقعد مع روحك شوية وزيد خمم....احنا لازمنا نرجعو الورث موش نتبعو الحاجات التافهة " خزرت للورقة المرسوم فيها زكرياء بطريقة تضحك وخلاتو مع ولدو وخرجت .
✴❇✴❇✴❇✴

كانت مركزة بارشا فيلي تخدم فيه ، ربما عقلها كان سارح بعيد وبارشا زادا ...اش خلى اسكندر يهمزها باش ترجع للواقع "يابنت الناس شبيك...."
تبسمت " اه...صار انت "
"لا انت معادش فيك..." خزر ليلي بين يديها " شنوة تخدم في مودال جديد "
"ايه "
"ومن ببوش البحر زادا...اكيد تخمم في اياماتنا "
ضحكت " وانا انجم ننسى هاك الايامات " بمرارة " اما ماقعدو كان ذكريات حتى هوما "
"قلي ....اومورك صفا...علاش نحسك موش طبيعية ...عماد رجع لصنعتو معاك ؟ضربك "
"الضرب ماضربش"
"مالا اكيد سمعك الكلام "
"،حتى هاذي لا "
"علاش مالا حالتك هكا "
"شبيها حالتي ..."
"مانعرفش اما متبدلة ...مريضة "
رسمت تبسيمة صفراء " لاباس عليا ...كيف الجنون "
"زعمة "
لعبت بحواجبها " عندك شك "
ضحك " مالا هز على تاليفونك كي يطلبك حد "
"طلبتني"
"لا .. اما بحكم انا عاملك باج وسيت باش نشهرك ...بارشا عجبتهم خدمتك ويحبوك تكمنديلهم حاجات"
"هاذي خليها عليك انت "
"يا ...انا باش نبعث الكوموند؟! ...لا عاد ...قاعدة تستغل فيا راو ...وانت عاطيتني كان الربع ....راهو ظلم ياربي"ضحكت " تحب ع الزيادة "
"وعلاش لا. ..مثلا النص "
"موش حتى نبيعو الساعة ويكون عندنا مربوح ...."
"ايه فازي فاش تستنى هاو بارشا ناس طالبة الخدمة متاعك ...بيع ...وزيد هاك تعمل في مودال جديد ...يظهر مزيان .....تحب نعملو اشهار تو تلقاه تباع ساياي "
"لا...لا....هذا موش للبيع "
بحلق فيها" هدية "
حمار وجها " تنجم تقول "
صفق و ضيق عينو " لشكون....ليا "
شاورت براسها لا " اووو. .مالا لشكون ؟....تقليش ...لزكرياء"
خزرتلو ورجعت لخدمتها "ايوا.....وانا نقول لواه رجعت تخدم ببوش البحر...." قعد يثبت فيها ، قلبو عليها دم ...موش لاقي حل بيدو يعملو ....متمني من قلبو ها الزوز يرجعو ....كان شاهد على محبتهم ...و يعرف مليح انو الزوز يعشقو بعضم لدرجة كبيرة ...كيفاش صابرين  ومتحملين الفراق ...ولا غير هذا قراب من بعضهم ويعيشو في نفس الدار ومحكوم على كل واحد منهم انو يحقر لاخر .
❇✴❇✴❇✴