الفصل الثانى عشر
أيمن بإرتباك:"زى مانت سمعت كده ، جورج هينزل مصر بكره عشان يعتذرلك إنت ومراتك."
حازم بضيق:"إنت تتصل بيه فورا وتصلح الهبل إللى إنت عملته ده ، قال مراتى قال."
أيمن برجاء:"عشان خاطرى يا حازم لمره واحده شيل كبريائك ده على جنب وإنقذ الشركه."
حازم بضيق:"قلتلك مليون مره حياتى مش رهن إشارة حد ، مش عايزه يشاركنى خلاص مايفرقش معايا ، فى مليون واحد غيره يتمنوا يشاركونا."
أيمن وهو بيكمل كلامه:"بس مافيش غيره بنفس قوته وجبروته فى السوق ، عشان خاطرى ياحازم حاولوا بس تبقوا متجوزين فى الفتره إللى هو هيكون فيها هنا فى مصر."
حازم بضيق:"إنت إتهبلت ولا جرا لدماغك حاجه؟"
أيمن:"مافيش غير الحل ده عشان أنقذ الشركه."
حازم بعصبيه:"إنقذها بنفسك ، طلعنى من دماغك."
أيمن بعصبيه:"إنت السبب فى كل ده ، مانت لو كنت إتحكمت فى مشاعرك شويه مكنش ده بقى حالنا دلوقتى."
حازم بعصبيه:"دى حاجه تخصنى وماتخصش حد."
أيمن:"وأنا إللى يخصنى مستقبل الشركه حتى لو بلعب ومش بشتغل ، بس الشركه دى تعبنا أنا وإنت وتعبك إنت بالذات إنت كنت عاملها عشان تنافس والدك وبالفعل دوست عليه قدام كل المنافسين ، هتسيب كل ده يروح منك؟ هتسيب أبوك يفوز عليك تانى؟ هتسيبه ياخد أخوك أنس منك ، هتسيب...."
قطع كلامه صوته...
حازم بصوت جهورى:"كفايه كلام عنه ، ماتجبش سيرته نهائى."
أيمن:"أهو عشان كده بقا لازم تضحى وتتجوزها."
حازم بسخريه:"وإنت متخيل بقا إنها هتوافق تتجوز واحد زيي؟
أيمن:"أنا هقنعها ، وأكيد هى هتلاقى الموضوع ده فى مصلحة الشركه ، وبعدين لازم توافق دى مش هتبقى مرات أى حد ، إنت مش شايف البنات إللى هيموتوا وتعبرهم؟"
حازم بشرود:"ياريتها تعرف."
أيمن:"نعم؟"
حازم بإستيعاب:"لا مافيش."
أيمن برجاء:" عشان خاطرى يا حازم وافق ، وبعدين مش عشان إنت بتكرهها يبقى تضيع مستقبل الشركه إللى بين إيدك إنت وهى دلوقتى."
حازم بتنهيده:"مش حكايه إنى بكرهها الحكايه حكاية كرامه ، وبعدين مالهوش لازمه إننا نتجوز ، ممكن نمثل إننا متجوزين وخلاص."
أيمن بفرحه وهو بيقاطعه وبيخرج من المكتب:" جورج مش أهبل هيعرف إنتوا متجوزين أو لا بطريقته ، وبعدين بلاش نتكلم فى القديم وواضح عليك إنك موافق ، يبقى فاضل مروه وصدقنى أنا هقنعها بسهوله."
أنت تقرأ
إغتصب حقى
Romanceحبيبان لم يعرفا طعماً للحياة بدون وجود الآخر .. جمال حبه لها يتلخص فى كلمتين "أنتى حقى" .. وبعد سنوات من الحب النقى فرق بينهما القدر إبتعد عنها وإختفى نهائياً من حياتها.. حدث لها مالم يكن بالحسبان وخسرت كل شئ كانت تملكه .. فإذا جمع بينهما القدر مرة...