نجوم الحب

2

.
.
.
.

اهوووو حبابه سارة اسكتي لاتضلين تعيبين انتي هم رزلتج

سارة...انجبي انجبي ست نجمة اني طيحت حظها بس انتي فاهية واكفه ترزل بيج البنيه وانتي واكفه مبرطمة تردين تبجين لا والاقوى من گلتيلها ..عيب عليج تغلطين عليه أني ممسويه شي، والله بوكتها تمنيت اكتلج انتي مو هية على فهاوتج

...هههههه حتى يروحن لماما يگوللها وتزعل مني بعدين عيفي عنج هالمواضيع وانتبهي لدروسج بدل المشاكل السنه احنه ثالث متوسط يعني لازم نشد حييييلنا، طالعين من المدرسه اني وسارة ونتناقش بموضوع بنات ويانه مشكلجيات بس يعاركن وسارة تهد عليهن، بالعادة نرجع ويه ماما بالخط لأن احنه نداوم بمدرسة الي تداوم بيها هي بس اليوم تعبانه وممداومة نزلنه الخط ع الشارع وكملنه طريقنه نمشي مدنگين وسارة مستمرة تحجي

..اكلج نجمة بليل اجي يمج نقرة امتحان
..اممم بس مو تتأخرين ست تنبل هههههه،

حسيت احد واكف بطريقنه رفعت راسي وجان ولد واكف قاطع طريقنه باوعلي مبتسم وسارة فتحت حلكها على اناقته، التفت للشارع فارغ دنيا الظهر گال..شلونج نجمة

دمي نشف ومتت خوف هذا منو يمامااا همستلي سارة وهي تحاول تتشجع..اكلج الزمي ايدي وخلينا نطگها ركضه للبيت هذا راح يخطفنه
لزمت ايدي وردنه نمشي وقطع الطريق علينا مرة ثانيه وكال

..نجمة بس لحظه لازم نحجي ضروري، باعي تعالي سيارتي هناك نكعد نحجي بيها لأن زحمة بالشارع هسة شتكول الناس
..هو يحجي واني ارجف ودمعتي بأي لحضه توگع، رجعت سارة تحجي وياي ومدت ايدها لجنطتها طلعت مسطرتها الحديد ...لااا هذا منو مغششه وگايله احنه غبيات؟ يريد ياخذج لسيارته ويصير الخطف اسهل هلا هلاا، طلعت المسطرة ولزمتني وهدت بوجهة تصيح ..هييي امشي منا والله اذا ترا بالمسطرة مو عبالك بنات وتگدرلنه شايف هاي المسطرة ترا توجع والله يلااا مناا ماتستحي

..باوعلها فاتح عيونه بوسعهن وتلفتت للشارع وگال بعصبيه ...انتي شبييج انتي منو يمج احترمي نفسج واسكتي، جاي احجي ويه اختي انتي اطلعي منها
صفنت افكر بكلامه شنو اختييي؟
سارة فتحت حلكها وعيونها تباوعله من فوك لجوة وباوعتلي وگالت..ياعوبه ياخاينه هذا اخوج وماتگليلي انتي صدك خاينه وينها صداقتج ماتوقعتها منج ابببد؟
..درت وجهي الها وكفت گدامها وهي واكفه گدامي ونحجي..ولج عوبه شبيج بسرعة صدگتي قابل اني شمدريني مو تشوفين كاعده يمج اربعه وعشرين ساعه
..هم صدك بس شنو عود هو ليش يگول اخوج، معقولة امج تزوجت من وراج وعندج اخ وانتي ماتدرين؟

..ياا يااا وشوكت تزوجت واني وين رحت عنها؟ اكلج سارة ترا فتيتي اعصابي الزمي غبائج واسكتي
..ولج لااا ترا علمودج
قاطعنا صوته صاح ..بسسسسس
درنه عليه لگينه واكف فاتح عيونه يباوع علينه ويفر براسه ..شنو انتن تسكتن وتفتهمن مني لو شلووون
سكتنه ورجع گال..نجمة اعرف انتي مامصدگه ومتفاجأة بس اني لازم احجي وياج وهذي هويتي تأكدي منها مو هذا اسم ابوج؟