نجوم الحب

3

.
.
.
.
.

..صرفي منهن لتظغطين على امج خطيه ماعدها انتي ساعديها هم، ومرة ثانيه من تحتاجين شي گوليلي الي

..لا بسام اني ممحتاجه اخذهن،

..نجمممة اخذيهن ولتعيديها هذا واجبي ممسوي شي

اخذتهن ونزلت من السيارة اتلگاني حمودي اخو سارة عمره 6 سنوات مخلينه اني وسارة مضحكه النه، اجه يركض ويگلي..نجممة سارة ودتني لبيتكم وامج كالت مو هنا وسارة گالت اوكف بالباب من تجي نجمة اضربها بالحجار يلا اوكفي خل اضربج بالحجار

..ايباااه حتى اربطك بسيارة اخويه يسحلك بيها

مدت راسها سارة من الباب وگالت..حقيرة وين جنتي عوبه صايرة تطلعين من  وراي لعد اذا ما كصيت رجليج اني الج

..لابالله همزين گلتيلي مادام بعده اخويه بسيارته حتى اخلي يسحلج انتي واخوج غمزتلها أأشر لسيارته جان بالسيارة منتظرني ادخل للبيت

شهكت وايدها على حلگها..اخخ يابنت ال حلو تعاي حياتي دأتشاقه اني

..هههههههه يلا روحي بعدين اجيج خل اروح لماما باي،دخلت للبيت وسمعت سيارته تحركت، اتلگتني ماما تركض وتحضن بيه واني عصرتها بحضني شگد اشتاقيتلها ماأگدر افاركها، تعشت وشافت ملابسي بس هلگد ماحجت عليه..ماما عيب هسة يگول مصدگت تريد تستغلني

..لاماما والله هو لح واصلا گتله مااريد بس عصب وگلي هذا واجبي اخذي وانتي ساكته
مرت الايام وتعلقت ببسام حييل وصرت اعتبره ابويه اتلگاه اركض احضنه واگعد اسولف كلشي يصير وياي وهو يسمعني يبتسم ومرات يحذرني من تصرف غلط، يطلعني ويشتريلي كل شي بخاطري،دائما كانت تصدف تصير مواقف لسارة محرجة گدام بسام وهو يبقى فاتح حلگه وعيونه متفاجأ هاي شبيه البنيه مخبله هههههه،

سارة جميله وجه مدور وبيضه عيون كبار وشويه شقره ولطيييفه دائما تضحك وتضحك الهوى اسمها تنكت و الي بگلبها على لسانها مرة جان بسام عدنه بالبيت واني وماما گاعدين يمه نسولف ،سمعت صوت سارة تصيح من السياج غطيت وجهي من الفشله وهي تصيح

..هيي العوبه نجمة الفاهية الزعطوطة تعاي درسيني مابيه حيل ولج نجمممممة فهووووي ، صوتها بس ببيتنا وهي مستغله الوضع، بسام صافن يباوع للباب، وماما كاتمة ضحكتها وتأشرلي روحيلها فضحتنا،

طلعتلها خربانه ضحك ورزلتها رزاله ناشفه بس هي انقهرت من فشلتها وراحت وهي تغم بروحها، عقلت فترة ورجعت لخبالها ...

بيوم رحت لسارة ضايجه بسام صارله اسبوعين ماكو اشتاقيتله ومااعرف لليش مختفي ومااعرف رقمه ولاهو اخذ رقم ماما يمكن استحى يطلبه

سارة..نجمة شبيج ترا خبلتيني لاتصفنين صار ساعه اگلج روحي لبيت ابوح وسألي على اخوج مابيها شي