I'll Be (The Greatest Fan of Your Life)

Chapter 41 - Payback Time

Dalawang putok ang umalingawngaw sa kapaligiran. Ang lahat ay napatigil sa loob ng ilang segundo para malaman kung saan napadpad ang bala na kumawala sa baril ni Cailean.

Wala. Walang natamaan.

Ngunit kita ng mga tao na nakahandusay sa daan ang lalaki na may taklob na timba sa ulo. Basang-basa ang buong katawan nito dahil sa tubig na nagmula sa timba.

***

pagbabalik-tanaw

"Papatayin ko siya! Kung hindi ka rin lang babalik sa akin Mark, papatayin ko na lang kayo parehas!" Ikinasa ni Cailean ang baril at itinutok na sa kanila.

Bago pa man maiputok ni Cailean ang baril ay sinugod siya nina Aling Simona at Aling Nena. Pinagtulungan ng mga itong itaas ang mga kamay ng binata.

Pumailanlang ang nakabibinging tunog. Mabuti na lang at sa ere naiputok ng lalaki ang baril kaya walang natamaan.

Hinampas ni Aling Cecilia ng tabo ang kamay ni Cailean kaya tumilapon ang baril sa damuhan. Matapos iyon ay binuhusan niya ang lalaki ng tubig na mula sa timbang dala-dala. Pagkaubos ng laman ay kaniyang itinaklob ito sa ulo ng binata.

Pansamantalang tinalian nina Aling Nena at Aling Simona ang mga kamay ng binata habang nag-aabang ng responde.

Hindi nagtagal ay dumating na ang patrol car ng barangay. Dinampot ng mga tanod ang puno't dulo ng lahat.

"Let go of me!" pagpupumiglas ni Cailean na noo'y nakaposas na.

Tiningnan lamang ng mga tanod ang nagwawalang binata.

"Ano ba?! Bitiwan n'yo ako!" Nilingon niya si Mark. "Babe, please help me."

Binigyan lamang ni Mark ng isang matalim na titig ang dating katipan. Iginiya niya papasok sa bahay ang katabing si Jem.

"Mark!" Tuluyan nang ipinasok si Cailean sa loob ng patrol car.

***

Nahimasmasan na at nagkaroon na ng malay si Aling Rita. Kasalukuyan silang nasa sala ng bahay. Kaaalis lang din ng mga pulis na nag-iimbestiga sa kaso. Kasabay din noon ay ang paglabas nina Aling Nena, Aling Simona, at Aling Cecilia na kinuhanan din ng statement sa nangyari. Labis ang pasasalamat sa kanila nina Jem at Mark.

Nang makaalis na ang mga bisita ay nagharap-harap sina Mark, Jem, at ang mga magulang ng dalaga.

"Iho, maraming salamat sa pagtatanggol mo sa aming anak. Hindi ko alam kung paano namin mababayaran ang ginawa mo," buong pasasalamat na sambit ni Mang Ponciano.

"Hindi n'yo po kailangang gawin 'yun Mang Ponciano, Aling Rita. Ginawa ko po 'yun dahil gusto ko siyang protektahan. At poprotektahan ko siya hanggang sa aking huling hininga."

Napangiti ang mga magulang ni Jem sa tinuran ng binata.

"Ako ay nagtataka lamang iho. Ano ba ang pakay ng lalaking iyon? Bakit sinundan niya kayo hanggang dito?" tanong ni Aling Rita.

Tumingin si Mark kay Jem. Nang makahugot ng lakas ng loob ay saka niya ikinuwento ang lahat. Lahat-lahat mula sa pagkakaroon niya ng relasyon kay Cailean. Pati kung paano niya nakilala si Jem at kung ano ang nararamdaman niya para sa dalaga.

Matapos niyang magkuwento ay nagkaroon ng ilang sandaling katahimikan.

"Iho, thank you for being honest. I admire you for that. Wala akong pakialam sa nakaraan mo. As long as your intention to my daughter is pure, we're good," ani Mang Ponciano na nag-thumbs up kay Mark.