[[Completed]]ကောင်းကင်ဘုံသို့ ကြွလှမ်းစံမြန်းနေသည်၊ မနှောင့်ယှက်ရ။ ADND

အခန်း(၂၂) အတိတ် အခန္း(၂၂) အတိတ္

[Unicode]

အလင်းကိုဆန်လျက် ရတနာခန်းမဆောင်၏ တံခါးများပွင့်လာသည်။ ထိုအထဲမှ မိန်းမငယ်လေးတစ်ယောက် တောက်တောက်ပပပြုံးလျက် ထွက်လာ၏။

နှစ်ပေါင်းများစွာအသက်ရှင်နေထိုင်လာခဲ့ကြသော အကြီးအကဲသုံးယောက်တို့သည် ထိုကိစ္စမျိုးအား အကြိမ်ပေါင်းများစွာတွေ့မြင်ခဲ့ကြရဖူးသည်။ ၎င်းတို့နှင့်သက်ဆိုင်ရာအဆောင်လက်နက်ကို ရရှိပြီးသည့်နောက်ပြန်ထွက်လာကြသည့် ဂိုဏ်းသားများအားလုံးနီးပါးဟာ ထိုကဲ့သို့ ပြုံးရွှင်နေခဲ့ကြမြဲသာ။

တောက်ပ၊ ကြည်လင်၊ ရှင်းသန့်၊ ဖြူစင်စွာဖြင့်...

အချိန်ကြာသွားပြီးသည့်နောက် အချို့သောသူများဟာ တိုက်ပွဲကျသွားခဲ့ကြရသည်မျိုးရှိ၏။ အချို့ဆိုလျှင် မည်သူမျှပင် သတိမထားမိလိုက်ဘဲ အပြင်လောကတွင် သေဆုံးသွားခဲ့ကြရသည်။ အချို့ကမူ ဂိုဏ်းအတွက် ဂုဏ်သရေရှိရှိသေဆုံးသွားခဲ့ကြရသည်။ ထိုသူများ၏အဆောင်လက်နက်များသည် သူတို့သခင်များနှင့်အတူ သေပွဲဝင်သွားခဲ့ကြလျှင်သွား၊ မဟုတ်ပါက ရတနာခန်းမဆောင်ထဲမှာ ပြန်ပိတ်လှောင်ခံရကာ နောက်လာမည့်သခင်ကို ပြန်စောင့်ဆိုင်းခဲ့ကြရသည်။

ရတနာခန်းမထဲမှ အဆောင်လက်နက်အချို့ကား ယွင်ဟွာဂိုဏ်း၏ ပုံသွင်းပညာရှင်အကျော်အမော်များကိုယ်တိုင် သွန်းလုပ်ခဲ့ကြသည်။ အချို့ကမူ လျို့ဝှက်နယ်မြေများမှရရှိခဲ့ကြသည်။ အချို့ကား... ကွန်လွန်သွားပြီဖြစ်သောသူများ တစ်ကြိမ်တစ်ခါက ပိုင်ဆိုင်ခဲ့သည့်အရာများဖြစ်၏။ ဂိုဏ်းစတင်ဖွဲ့စည်းခဲ့စဉ်မှ ယနေ့အထိ ယွင်ဟွာဂိုဏ်းဟာ ဂိုဏ်းသားပေါင်းမည်မျှလက်ခံခဲ့လျက် မည်မျှဟာတိမ်ပါးသွားခဲ့ပြီဖြစ်ကြောင်း သူတို့မမှတ်မိတော့ပါ။ ထိုသူတို့ရှိခဲ့ခြင်းနှင့်ပတ်သည့် တစ်ခုတည်းသောသက်သေက လီယန်ခန်းမဆောင် အနောက်ရှိ သစ်သားအဆောက်အဦထဲမှ အရောင်မှိန်သွားပြီဖြစ်သော ကျောက်စိမ်းပြားများသာဖြစ်လေသည်။

ထိုအရောင်မှိန်သွားပြီဖြစ်သော ကျောက်စိမ်းပြားများနှင့်ယှဉ်သော် ယခုမှ အခြေခံပျိုးထောင်ခြင်းအဆင့်ရရှိထားသည့် ဤဂိုဏ်းသားများဟာ နုနုဖတ်ဖတ်ဖူးသစ်စလေးများဖြစ်ကြသည်။ အင်မတန်မှ နုနုဖတ်ဖတ်ဖြစ်ကြလွန်းသဖြင့် သူတို့ကဲ့သို့လူအိုကြီးများဟာ ထိုကလေးများအား ချောမွေ့သာယာသောဘဝများသာရရှိကြလျက် မည်သည့်အခက်အခဲနှင့်မျှမကြုံကြရစေလိုပေ။