وعى لي نفسو وبقي بعاين ليها وهو ما عارف يعمل شنو...مشى عليها براحه وبخوف وختي سبابتو تحت انفها لقاها لسه بتتنفس...شالها هو ما قادر يمشي وقف تاكسي وبقي سايق براحه .
بزهج: يااااخ ما تمشي سريع البت حتموت .
ساق بسرعه ووصلو المستشفى .
الدكتور: في حاله طوارئ .
دخلو الغرفه وهو بقى متكل على الحيطه وقميصو ويدينو كلها دم وحتى وشو...عاين لي شنطتها وفتحها وعاين للتلفون وما كان بي باسورد...لقي اول رقم واتصل .
_ مادلين انتي وين؟
_ هي في المستشفى عملت حادث .
شهقت: حصل ليها شنو؟ .
_ انتي تعالي على مستشفى "..." وبتعرفي .
قفلت بسرعه وفي غصون دقايق هي جات ومعاها امها...
ازدهار بتبكي: عملت في بتي شنو...وهي هسي كيف .
_ لسه الدكتور ما طلع .
قعدت في الكرسي وبقت تبكي ورغد بتهدي فيها...بعد دقايق الدكتور طلع وقال للممرضه تكون معاها .
قامت: اها يا دكتور طمني .
_ هي كويسه بس يدها مكسوره و عندها ردخ في رجلها .
_ واي انا يا بتي .
رغد: بنقدر ندخل ليها .
_ لسه ما استعادت وعيها .
قعدت في الكرسي وختت يدينها في وشها وبقت تبكي .
_ يا أمي خلاص ما تبكي هي حتكون كويسه .
تبكي: واي انا يا رغد .
_ امي خلاص الله يرضى عليك...وهي حتبقي كويسه .
بقت تبكي وتتحسبن على الزول الضربها...مارون كان بعاين ليها وشايف الخوف في عيونها اتمنى انو امو تكون زي دي بس وين هي فاضيه من شغلها وصحباتها...دخل ليها جوا ولقاها راقده وبتعاين للسقف...وقت الحادث ما كان شايف وشها لانو كان مغطي بالدم...قرب منها واتزكر دي البت الكورك فيها وقال ليها غبيه...عاينت ليها ورجعت عاينت للسقف .
_ احمم...شكراً ليك لأنك...
قاطعتو: ماف داعي للشكر .
ختي يدو ورا رقبتو: حاسه نفسك كيف؟ .
_ تمام...ممكن تتصل على ناس امي .
_ اي هم قاعدين برا...عن إذنك .
طلع وقال: صحت .
قامو ودخلو ليها وهو مشى طوالي .
قعدت جمبها: يا بتي حصل ليك شنو .
_ العربيه كانت حتضربو وانا لزيتو واضربتك بدلو .
_ انتي مالك يا بتي هسي لو كان حصل ليك شي .
