🌺 ﻳﻮﻡ ﺟﺪﻳﺪ 🌺
ﻛﺎﻧﺖ ﻧﺎﻋﺴﺔ ﻓﻔﺮﺍﺷﻬﺎ ... ﻓﺎﻳﻘﺔ ﻭ ﻣﺴﻄﺤﺔ ﻋﻠﻰ ﻇﻬﺮﻫﺎ ... ﺗﻠﻔﺘﺎﺕ ﺟﻬﺔ ﺍﻟﻨﺎﻓﺬﺓ ﻣﻘﺪﺭﺍﺵ ﺗﺸﻮﻑ ﺃﺷﻌﺔ ﺍﻟﺸﻤﺲ ﺍﻟﻲ ﻛﺎﻧﺖ ﺗﺰﻋﺠﻬﺎ ﻛﻞ ﺻﺒﺎﺡ ... ﻛﻞ ﻳﻮﻡ ﻛﺘﺤﻞ ﻋﻨﻴﻬﺎ ﻣﺘﺄﻣﻠﺔ ﺃﻥ ﺍﻟﻲ ﻭﻗﻊ ﻳﻜﻮﻥ ﻣﺠﺮﺩ ﻛﺎﺑﻮﺱ ... ﻭ ﺃﻥ ﺣﻴﺎﺗﻬﺎ ﻣﺨﺪﺍﺗﺶ ﻫﺎﺩ ﺍﻟﻤﻨﺤﻰ ... ﺍﻟﻲ ﺷﺎﻓﻬﺎ ﻫﺎﺩﺋﺔ ﻫﺎﻛﺔ ﻳﻘﻮﻝ ﺭﺍﻩ ﺗﻘﺒﻼﺕ ﻭﺿﻌﻬﺎ ...
ﻟﻜﻦ ﻫﻲ ﻣﺰﺍﻝ ﻓﻤﺮﺣﻠﺔ ﺍﻟﻨﻜﺮﺍﻥ ... ﻣﺎﺑﻐﺎﺗﺶ ﺗﻔﻜﺮ ﻣﺎ ﺑﻐﺎﺗﺶ ﺗﺨﺮﺝ ﺍﻟﻲ ﻓﻘﻠﺒﻬﺎ ... ﺳﺎﻋﺘﻬﺎ ﻳﻤﻜﻦ ﺗﻨﻬﺎﺭ ...
ﺳﻤﻌﺎﺕ ﺍﻟﺪﻗﺎﻥ ﻣﺠﻬﺪ ﻓﺎﻟﺒﺎﺏ ... ﺗﺤﻞ ﻭ ﻛﻴﻒ ﺩﺧﻼﺕ ﻋﺮﻓﺎﺗﻬﺎ ﺷﻜﻮﻥ ... ﺯﻳﻨﺐ ﺗﻼﺣﺖ ﻋﻠﻴﻬﺎ ﻓﻮﻕ ﺍﻟﻨﺎﻣﻮﺳﻴﺔ ...
ﺯﻳﻨﺐ : " ﻛﺘﺒﻮﺱ ﻓﻴﻬﺎ " ﺻﺒﺎﺡ ﺍﻟﻨﻮﻭﻭﻭﺭ
ﺟﻮﻻﻥ : ﺻﺒﺎﺡ ﺍﻟﺨﻴﺮ
ﺯﻳﻨﺐ : ﻓﻴﻘﺘﻚ ﻭ ﻻ ﻛﻨﺘﻲ ﻓﺎﻳﻘﺔ ﻭ ﻣﺴﺨﺘﻴﺶ ﺑﺎﻟﻤﺎﻧﻄﺔ ... ﻧﻮﺿﻲ ﺍﻟﻤﻌﮕﺎﺯﺓ ﺗﺎﺑﻌﻨﺎ ﺷﻼ ﻣﻴﺪﺍﺭ
ﺟﻮﻻﻥ : ﺷﻨﻮ ﺗﺎﺑﻌﻚ ؟
ﺯﻳﻨﺐ : ﺃﻧﺎ ﻭﻳﺎﻙ ﻏﺎﺩﻳﻴﻦ ﻟﻮﺍﺣﺪ ﻟﺒﻼﺻﺔ ﺯﻭﻳﻨﺔ
ﺟﻮﻻﻥ : ﻓﻴﻦ ؟
ﺯﻳﻨﺐ : ﻧﻮﺿﻲ ﻏﺴﻠﻲ ﻭﺟﻬﻚ ﻭ ﻫﺒﻄﻲ ﺗﻔﻄﺮﻱ ... ﻭ ﺩﻳﻚ ﺍﻟﺴﺎﻉ ﻏﻨﻘﻮﻝ ﻟﻴﻚ ﻓﻴﻦ ... ﻫﺎﻧﻲ ﻫﺒﻄﺖ ﻋﻨﺪﻱ ﻭﺍﺣﺪ ﺍﻟﻤﻬﻤﺔ ﺻﻌﺒﺔ ﻫﻬﻬﻪ
ﺟﻮﻻﻥ : " ﺑﻌﺪﻡ ﻓﻬﻢ " ﻋﻼﺵ ﻛﺘﻬﻀﺮﻱ ؟
ﺯﻳﻨﺐ : ﺩﺍﺑﺔ ﺗﻌﺮﻓﻲ ... ﻳﺎﻻﻩ ﻧﻮﺿﻲ ﻧﻮﺿﻲ ﺍﻟﻤﻌﮕﺎﺯﺓ
ﻧﺎﺿﺖ ﺟﻮﻻﻥ ﻟﻄﻮﺍﻟﻴﺖ ﻭ ﺯﻳﻨﺐ ﺭﺟﻌﺎﺕ ﻫﺒﻄﺎﺕ ﻟﺘﺤﺖ ... ﺩﺧﻼﺕ ﻟﻜﻮﺯﻳﻨﺔ ﻋﻨﺪ ﺣﻔﻴﻀﺔ ...
ﺯﻳﻨﺐ : ﺧﺎﻟﺘﻲ ﻣﻤﻜﻦ ﺗﺠﻲ ﻭﺍﺣﺪ ﺍﻟﺪﻗﻴﻘﺔ
ﺣﻔﻴﻀﺔ : ﺷﻨﻮ ﻛﺎﻳﻦ ﺍﺑﻨﺘﻲ ؟
ﺯﻳﻨﺐ : ﻏﻴﺮ ﺁﺟﻲ ﻣﻌﻴﺎ ﻟﺼﺎﻟﻮﻥ ﺑﻐﻴﺖ ﻧﻬﻀﺮ ﻣﻌﺎﻛﻢ ﻧﺘﻲ ﻭ ﻋﻤﻲ
ﻣﺸﺎﺕ ﺣﻔﻴﻀﺔ ﻣﻊ ﺯﻳﻨﺐ ﻟﻔﻴﻦ ﺟﺎﻟﺲ ﺍﺑﺮﺍﻫﻴﻢ ... ﻛﺎﻥ ﺍﻟﻔﻄﻮﺭ ﻣﺤﻄﻮﻁ ﻓﺎﻟﻄﺒﻠﺔ ﻭ ﻫﻮ ﻛﻴﺸﺮﺏ ﻓﻜﺎﺱ ﺩﻳﺎﻝ ﺃﺗﺎﻱ ... ﺳﻠﻤﺎﺕ ﻋﻠﻴﻪ ﺯﻳﻨﺐ ﻭ ﭼﻠﺴﺎﺕ ...
ﺯﻳﻨﺐ : ﺑﻐﻴﺖ ﻧﻬﻀﺮ ﻣﻌﺎﻙ ﻓﻮﺍﺣﺪ ﺍﻟﻤﻮﺿﻮﻉ
ﺇﺑﺮﺍﻫﻴﻢ : ﺇﻟﻲ ﻫﻮ ؟
ﺯﻳﻨﺐ : ﺟﻮﻻﻥ ﻛﻨﻌﺮﻓﻬﺎ ﻣﻦ ﺃﻳﺎﻡ ﺍﻟﺪﺭﺍﺳﺔ ... ﻣﺎﻛﻨﺎﺵ ﺻﺤﺎﺑﺎﺕ ﻣﻲ ﻏﻴﺮ ﻛﻨﻘﺮﺍﻭ ﻓﻨﻔﺲ ﺍﻟﻜﻼﺹ ... ﻛﻨﺖ ﺩﻳﻤﺎ ﻛﻨﺘﻤﻨﻰ ﻧﻜﻮﻥ ﺻﺪﻳﻘﺘﻬﺎ ... ﻭ ﻣﺎﺷﻲ ﻏﻴﺮ ﺃﻧﺎ ﮔﺎﻉ ﻟﺒﻨﺎﺕ ... ﺑﻨﺖ ﻣﺮﺑﻴﺔ ﻣﻮﺍﻇﺒﺔ ﻭ ﺩﺍﺧﻠﺔ ﺳﻮﻕ ﺭﺍﺳﻬﺎ ... ﻧﺸﻴﻄﺔ ﻭ ﻗﻠﺒﻬﺎ ﺑﻴﺾ ... ﺍﻹﺑﺘﺴﺎﻣﺔ ﻣﻜﺎﻧﺘﺶ ﻛﺘﻔﺎﺭﻗﻬﺎ ... ﻣﻦ ﺑﻌﺪ ﻭﻗﻊ ﻟﻴﻬﺎ ﺩﺍﻙ ﺍﻟﻤﺸﻜﻴﻞ ... ﻣﺴﺘﺴﻠﻤﺎﺗﺶ ﻭ ﺑﻐﺎﺕ ﺗﺮﺟﻊ ﺣﻘﻬﺎ ... ﻭﺍﺧﺔ ﺗﺂﺫﺍﺕ ﺑﺸﻜﻞ ﻛﺒﻴﺮ ...
ﻓﻬﺎﺩ ﺍﻟﻔﺘﺮﺓ ﺭﺟﻌﻨﺎ ﺻﺤﺎﺑﺎﺕ ﻭ ﺣﺎﻭﻟﺖ ﻧﺴﺎﻋﺪﻫﺎ ﻣﺎ ﺃﻣﻜﻦ ... ﻭ ﺭﺑﻲ ﻭﻗﻒ ﻣﻌﻬﺎ ﻭ ﺭﺟﻊ ﻟﻴﻬﺎ ﺣﻘﻬﺎ ... ﻣﺎﺣﻘﺪﺍﺗﺶ ﻭ ﻛﻤﻼﺕ ﺣﻴﺎﺗﻬﺎ ﻛﺄﻧﻬﺎ ﻣﺘﻐﺪﺭﺍﺗﺶ ﻣﻦ ﺃﻗﺮﺏ ﺍﻟﻨﺎﺱ ﻟﻴﻬﺎ ... ﻫﻲ ﻣﻦ ﺍﻟﻨﻮﻉ ﺍﻟﻲ ﻛﻴﺸﻮﻑ ﺩﻳﻤﺎ ﺍﻟﺨﻴﺮ ﻓﺎﻟﻨﺎﺱ ... ﻋﻤﻲ ﺟﻮﻻﻥ ﻭ ﻧﻌﻢ ﺍﻹﺑﻨﺔ ﻋﻤﺮﻫﺎ ﺩﺍﺭﺕ ﺷﻲ ﺣﺎﺟﺔ ﺍﻟﻲ ﺗﺨﻠﻴﻜﻢ ﻣﺘﻔﺘﺎﺧﺮﻭﺵ ﺑﻴﻬﺎ ...
ﺍﻟﻲ ﻭﻗﻊ ﻟﻴﻬﺎ ﻛﺎﻥ ﻣﻜﺘﺎﺏ ... ﻟﻜﻦ ﺃﻧﻬﺎ ﺗﻔﻘﺪ ﺟﺰﺀ ﻣﻨﻬﺎ ﻛﺎﻧﺖ ﺻﺪﻣﺔ ﻛﺒﻴﺮﺓ ﻟﻴﻬﺎ ... " ﺷﺎﻓﺖ ﻓﺎﺑﺮﺍﻫﻴﻢ " ﻭ ﺍﻧﻬﺎ ﻣﺘﻠﻘﺎﺵ ﺍﻟﺪﻋﻢ ﻣﻦ ﺍﻟﻨﺎﺱ ﺍﻟﻮﺣﺪﻳﻦ ﺍﻟﻲ ﻛﺘﻤﻠﻚ ﻓﻬﺎﺩ ﺍﻟﺪﻧﻴﺎ ... ﺯﺍﺩ ﺍﻟﻄﻴﻦ ﺑﻠﺔ ... ﺃﻧﺎ ﻣﺘﻔﻬﻤﺔ ﻣﻮﻗﻔﻚ ... ﻟﻜﻦ ﺟﻮﻻﻥ ﻣﺤﺘﺎﺟﺔ ﺩﻋﻤﻜﻢ ﻭ ﺇﻳﻤﺎﻧﻜﻢ ﺑﻴﻬﺎ ... ﻧﻔﺴﻴﺘﻬﺎ ﻓﺎﻟﺤﻀﻴﺾ ﻭ ﺣﺎﻟﺘﻬﺎ ﻏﺘﺰﻳﺪ ﺗﺴﻮﺀ ﻻ ﺧﻠﻴﻨﺎﻫﺎ ﻫﺎﻛﺔ ... ﻻ ﺑﻘﺎﺕ ﻓﺪﻳﻚ ﺍﻟﻐﺮﻓﺔ ﺳﺎﺩﺓ ﻋﻠﻴﻬﺎ ﺃﻏﻠﺐ ﺍﻟﻮﻗﺖ ... ﺟﻮﻻﻥ ﺍﻟﻲ ﻛﻨﻌﺮﻓﻮ ﻋﻤﺮﻫﺎ ﺗﺮﺟﻊ
ﺣﻔﻴﻀﺔ : " ﺑﻌﻨﻴﻦ ﻣﻐﺮﻏﺮﻳﻦ " ﻭ ﺷﻨﻮ ﺍﻟﻤﻌﻤﻮﻝ
ﺯﻳﻨﺐ : ﻭﺍﺧﺔ ﻛﺘﻘﻮﻝ ﻟﻴﻨﺎ ﻧﺨﻠﻴﻮﻫﺎ ... ﻣﺨﺎﺻﺶ ﻧﺨﻠﻴﻮﻫﺎ ... ﻋﻨﺪﻱ ﺍﻗﺘﺮﺍﺡ ﻭ ﺑﻌﺪ ﺇﺫﻧﻜﻢ ﻃﺒﻌﺎ ﻻ ﻭﺍﻓﻘﺘﻮ
ﺇﺑﺮﺍﻫﻴﻢ : ﺷﻨﺎﻫﻮﺍ ؟
ﺯﻳﻨﺐ : ﻋﻨﺪﻧﺎ ﺩﺍﺭ ﺟﺪﻱ ﻓﺎﻟﺒﻼﺩ ﻓﻨﻮﺍﺣﻲ ﺍﻟﻤﺪﻳﻨﺔ ... ﻛﻨﻤﺸﻲ ﻟﺘﻤﺎﻙ ﻭﻗﺘﻤﺎ ﺑﻐﻴﺖ ﻧﺮﺗﺎﺡ ... ﻳﻤﻜﻦ ﺍﻟﻄﺒﻴﻌﺔ ﻭ ﺗﻐﻴﻴﺮ ﺍﻟﺠﻮ ﻳﺴﺎﻋﺪﻫﺎ ... ﺧﺪﻳﺖ ﺷﻲ ﺃﻳﺎﻡ ﻓﺎﻟﺨﺪﻣﺔ ﻭ ﻏﻨﺪﻳﻬﺎ ﻣﻌﻴﺎ ﻻ ﻭﺍﻓﻘﺘﻮ
ﺣﻔﻴﻀﺔ ﺷﺎﻓﺖ ﻓﺎﺑﺮﺍﻫﻴﻢ ﺑﺘﺮﺟﻲ ...
ﺟﻮﻻﻥ : " ﻭﺍﻗﻔﺔ ﻋﻨﺪ ﻟﺒﺎﺏ " ﺃﻧﺎ ﻣﻐﺎﺩﺓ ﻓﻴﻦ
ﺣﻔﻴﻀﺔ : " ﺟﺎﺕ ﻋﻨﺪﻫﺎ " ﻋﻼﺵ ﺍﺑﻨﺘﻲ ... ﺳﻴﺮﻱ ﻣﻊ ﺻﺎﺣﺒﺘﻚ ﻓﻮﺟﻲ ﺷﻮﻳﺔ ... ﻭ ﻣﻨﻴﻦ ﺗﺮﺟﻌﻲ ﻧﻤﺸﻴﻮ ﻋﻨﺪ ﺍﻟﻄﺒﻴﺐ ... ﺭﺍﻩ ﻗﺎﻝ ﻟﻴﻨﺎ
ﺟﻮﻻﻥ : " ﻗﺎﻃﻌﺎﺗﻬﺎ " ﻗﻠﺖ ﻟﻴﻚ ﻣﻐﺎﺩﻳﺔ ﻓﻴﻦ
ﺿﺎﺭﺕ ﻣﺘﺎﺟﻬﺔ ﻟﺪﺭﻭﺝ ﻭ ﻫﻮ ﻳﻮﻗﻔﻬﺎ ﺻﻮﺕ ﺑﺎﻫﺎ ...
ﺇﺑﺮﺍﻫﻴﻢ : ﺟﻤﻌﻲ ﺣﻮﺍﻳﺠﻚ ﻭ ﺳﻴﺮﻱ ﻣﻊ ﺻﺎﺣﺒﺘﻚ
ﺍﺑﺘﺎﺳﻤﺎﺕ ﺯﻳﻨﺐ ﻭ ﻧﺎﺿﺖ ﻋﻨﺪ ﺟﻮﻻﻥ ﻛﺘﺠﺮﻱ ... ﺟﺮﺍﺗﻬﺎ ﻃﻠﻌﻮ ﻟﻔﻮﻕ ... ﺩﺧﻠﻮ ﻟﺒﻴﺖ ﻛﻴﻒ ﺳﺪﺍﺕ ﺯﻳﻨﺐ ﻟﺒﺎﺏ ﻭ ﻫﻲ ﺗﻨﻄﺮ ﻣﻨﻬﺎ ﺟﻮﻻﻥ ...
ﺟﻮﻻﻥ : ﻋﻼﺵ ﻛﺪﻳﺮﻱ ﻫﺎﺩﺷﻲ ... ﻭﺍﺵ ﺃﻧﺎ ﺷﻜﻴﺖ ﻋﻠﻴﻚ
ﺯﻳﻨﺐ : ﺑﻐﺘﻴﻨﻲ ﻧﺒﻘﺎ ﻧﺸﻮﻑ ﻓﻴﻚ ﻫﺎﻛﺔ ... ﻳﻮﻡ ﻋﻦ ﻳﻮﻡ ﻛﻨﺸﻮﻑ ﺟﻮﻻﻥ ﺍﻟﻲ ﻛﻨﻌﺮﻑ ﻛﺘﺬﺑﻞ " ﺷﺪﺍﺕ ﻓﻴﺪﻫﺎ " ﺃﻧﺎ ﺑﻐﻴﺖ ﺻﺎﺣﺒﺘﻲ ﺟﻮﻻﻥ ﺗﺮﺟﻊ
ﺟﻮﻻﻥ : " ﻧﺰﻻﺕ ﺩﻣﻌﺔ ﻣﻦ ﻋﻨﻴﻬﺎ " ﺟﻮﻻﻥ ﺩﻳﺎﻝ ﺷﺤﺎﻝ ﻫﺬﺍ ... ﻋﻤﺮﻫﺎ ﻏﺘﺮﺟﻊ
YOU ARE READING
السفاح العاشق
Teen Fictionﺭﻭﺍﻳﺔ ﻛﻠﻬﺎ ﻏﻤﻮﺽ .... ﺃﺣﺪﺍﺙ ﻣﻠﻴﺌﺔ ﺑﺎﻟﺘﺸﻮﻳﻖ .... ﺷﺨﺼﻴﺎﺕ ﻣﻌﻘﺪﺓ .... ﻋﺸﻖ ﻣﻬﻮﻭﺱ ﻣﺘﻤﻠﻚ .... ﺣﻴﺎﺓ ﻣﺰﺩﻭﺟﺔ .... ﻋﺎﻟﻢ ﺍﻟﺨﻄﻴﺌﺔ .... ﺟﺮﺍﺋﻢ ﺑﺎﺳﻢ ﺍﻟﺤﺐ .... ﺍﻟﻈﻐﻴﻨﺔ ﻭ ﺍﻻﻧﺘﻘﺎﻡ ... ﺍﻟﺤﻘﺪ ﺍﻟﺨﻴﺎﻧﺔ ﻭ ﺍﻟﻐﻴﻴﻴﻴﺮﺓ .... ⭐⭐⭐ ﻣﺰﻳﺞ ﺑﻴﻦ ﺍﻟﻮﺍﻗﻊ ﻭ ﺍﻟﺨﻴﺎﻝ ⭐⭐⭐ ﺗﺄﻟﻴﻒ : 🌸 ﻣﻮﺭﻱ 🌸 ﺑﻌ...
