كان ليا صديقة ملتزمة جداً وكنا نحسبها من الصالحات يعني بس عندها صفة بتضايقني
إنها دايماً تزدري أي حد بيقع في ذنب من أصحابنا أقولها بالراحة" ولو كنت فظاً غليظ القلب لانفضّوا من حولك"
تقولي اسكتي هم مش عاوزين غير كده لازم تنفّريهم من الذنب إللي بيعملوه عشان يعودوا لرشدهم!
أياً كان مُبررها كنت بتضايق جداً بس بقيت بسكت هي حرة بقى مش كل شويه هجادلها لحد ما واحدة نعرفها قلعت الحجاب عنّفتها و فوراً قطعت علاقتها بيها ، خرجت عن صمتي وقولتلها :
_ يا فلانة بلاش الأسلوب ده ، إنتِ عاشرتيها وماشوفتيش منها وحش حجابها ده عبادة بينها وبين ربنا إللي ليكِ بس تنصحيها برفق ولين وتحتويها وتحاولي تعينيها مش تكرّهيها في نفسها وفي حياتها وفي الدين نفسه !!
_ كله إلا الحجاب ده فرض عوزاني أطبطب عليها واسقفلها وأقول شاطورة برافو كملي عري!!
_ عري!! ماقولتش كده أنا قلت تساعديها وتشدي على إيديها مش تطرديها من حياتك وتحسسيها إنك من المصطفين الأخيار و خلاص هي خرجت من الجنة!! الرحمة شوية إنتِ ماتعرفيش هي مرت بإيه قبل ما تعمل الخطوة دي ، ماتعرفيش الصراعات النفسية اللي عاشتها وإنتِ عارفاها كويس إزاي إنسانه ملتزمة فأكيد حاجة زي دي ماجتش بالساهل كده
_ بطّلي تبرري للأشكال دي
_ مش ببرر بس محدش مننا معصوم فبلاش تتصرفي كده وحطي نفسك مكانها ممكن في لحظة تدور الدايرة وتتقلب القلوب والأحوال ادعي يا مقلب القلوب ثبتنا وكفاية
_ لا مش هحط نفسي مكان حد أعوذ بالله ده أنا لو خرجت ولا حد شافني من غير البيشه أروح فيها
مر ع الحوار ده 4 سنين خلالهم ماكنتش أعرف عنها حاجة لحد ما جه قدامي الأكونت بتاعها ؛ أنا أول ما شفت الاسم والصورة فضلت أبصلهم مصعوقة!!!
فلانه حاطه صورتها من غير حجاب وبنص كم
أنا دخلت الأكونت على أمل إنه اتسرق مثلاً وحد سرّب صورها لكن الصور كانت نازله بإرادتها وبوست عندها مشيراه بتتريق ع المنتقبات وتشتمهم!
الأكونت ده كان بالنسبة ليا فيلم رعب ، استرجعت كلامها وأسلوبها وازاي كانت فاكرة نفسها معصومة ومستحيل تفكر تخرج من غير البيشة وبكيت من الخوف على نفسي....
الموضوع حقيقي مرعب ، بنفضل فاكرين نفسنا معصومين ومستحيل نقع في ذنب فلان وفجأة بنلاقي نفسنا وقعنا في نفس الذنب وبنسمع نفس الكلام إللي سمّعناه لفلان ده وقتها !!
لما حد يقع في ذنب قصادك دي مش شطارة منك إنك ماوقعتش في نفس الذنب دي رحمة من ربنا أو تقدر تقول ماتحطتش في نفس ظروفه...
المفروض تترعب عشان دي رسالة ليك تنزع كِبر قلبك ، مش مطلوب منك تبرر لحد ولا تسقفله بس بلاش تزدري مذنب عشان الدايرة هتدور والقلوب تتقلب يكفي إنك تنصح برفق وتدعي بالثبات
يا مُقلب القلوب ثبت قلوبنا على دينك وعلى الحق يا رب ❤ 😔😞
#منقول
STAI LEGGENDO
🌸 السابقات إلى الجنة 🌸..(الجزء1)
Casualeمن أجلكِ يا ملگة👑أنشأنا هذا الكتاب🙈 لتسعدي💞وترتقي💞وعلى الطاعات تثبتي💪 ومن المكاره تُحفظي🌈 وبإذن ربي في الجنان سنلتقي♥️ مع بعضنا🌷 فريق👈أنتي مـــ👑ــلگة
