🌸 السابقات إلى الجنة 🌸..(الجزء1)

ادعي على ابني .. واكره اللي يقول آمين !!

❌ ادعي على ابني .. واكره اللي يقول آمين !!

عبارة قديمة جدا الأم بتقولها لما حد يهين ولادها ومتقبلش عليهم ولا كلمة من أي حد سواء قريب او غريب

لكن أنتوا مش ملاحظين حاجة غريبة !......... أيوة 😳
ادعي على ابني
هو ده موضوعنا النهاردة 👇

🌿دعاء الأم على أولادها

الموضوع صعب شوية .. لا صعب جدا جدا

🔸هبدأ بالابناء ... أكيد هما مش ملايكة .. يعني بيغلطوا واحيانا مستفزين
بس ياريت كل أم تقول لي ... لما تدعي على ابنك دعوة وحشة دعوات بشعة بنسمعها كدا أنت هترتاحي ؟!
صدقيني هتتعبي أكتر منهم

انا هنا بكلم كل أم ... لعل كلامي يخليها تنتبه .. ولو كانت بتدعي على ولادها تبطل وتدعيلهم بالمقابل

بتكلم من قلبي ...
ارحمي ولادك من دعائك الصعب ده
ماتدعوش على ولادكم
لأنهم مش بينسوا
ولما يكبروا مش بيرضوا يوجعوكم ويفكروكم بدعاويكم عليهم
رجاء يعني ...
ممكن ابنك او بنتك حياتهم تقف أو تكون صعبة او متعسرة ومش عارفين السبب .. في الوقت اللي ممكن السبب يكون دعوة منك عليهم ... وعلى فكرة أنتي بتتوجعي عليهم وتقولي مالكم ياولادي حالكم ليه مايل !!

نهى النبي صلى الله عليه وسلم عن الدعاء على الأولاد ، فعن جابر بن عبد الله قال: قال رسول الله صلى الله عليه وسلم: " ..لاَ تَدْعُوا عَلَى أَنْفُسِكُمْ، وَلاَ تَدْعُوا عَلَى أَوْلاَدِكُمْ، وَلاَ تَدْعُوا عَلَى أَمْوَالِكُمْ، لاَ تُوَافِقُوا مِنَ اللَّهِ سَاعَةً يُسْأَلُ فِيهَا عَطَاءٌ فَيَسْتَجِيبُ لَكُمْ .." رواه مسلم في صحيحه.

⚠️في امهات لازمة عندها إنها تدعي على ولادها قطع إيده .. كسر رقبته .. وغيرها
فكري للحظة هيحصلك انتي إيه لو دعوتك اتحققت ... ياترى هتفرحي وتقولي دعائي استجيب !!
ولا هتسترجعي فورا دعوتك وتعيشي بالذنب باقي عمرك

🚫ونفس الام متقبلش أي حد يدعي على ولادها .. مهما كان .. وممكن تولع الدنيا عشان حد قال لهم كلمة بس

سامحوني على قسوة الكلام 🌿
بس لعل حد يشوفه ويؤثر فيه

❓طيب ياماما ... تعملي إيه عشان تبطلي تدعي على ولادك ؟

#استعيذي ... استعيدي بالله من الشيطان .. أنت غضبانة والغضب من الشيطان والاستعاذة تقهر الشيطان.

#اسكتي ... أيوة ... اكظمي غيظك في اللحظة دي .. مش سهل طبعا .. لكن لازم تحاولي وده تدريب لنفسك.

#ادعي ... ادعي ربنا يصلح حالهم ويرزقك الصبر على تربيتهم ويحفظ لسانك من الدعاء عليهم .

#استبدلي ... بدل ماتدعي عليه في فورة غضبك وطالما كدا كدا عاوزة تتكلمي يبقى ادعي له احسن .. الله يهديك .. الله يصلحك .. أي دعوة فيها خير

وأخيرا ... واحنا بنربي ولادنا لازم نعرف إننا بنتربى معاهم .. بنكتسب صفات جميلة في رحلتنا
صبر .. دعاء .. تسامح .. حكمة

آخر حاجة ... قرأت إن الله لايستجيب الدعاء حال الغضب
ولكن ما أدراك إن الدعوة خرجت وأنت غضبانة .. وأنا هنا مش بتكلم في حال إن الابن معملش حاجة وبس
ولكن كمان في حالة إنه عمل ما يستحق زعلك منه
وعشان كدا بقول إننا بنتربي مع ولادنا .. مش كل ما يغلط الابن .. ادعي عليه بسرعة
سبحان الله .. لما وصفت رحمة الله (( أرحم من الأم بولدها )) وكأن الأم أرحم حد بيك في الخلق
🌴رحمة يعني متدعيش عليه .
🌴رحمة يعني تصبري على اخطاؤه

وإلا .... مين ممكن يتحمل الشخص ده اكتر من أمه .... مين !!

وشوفت كتير شباب وبنات لما بيحكوا مواقف عن والدتهم
اكتر مواقف بيفتكروها لأمهم .. صبرها عليهم وحنيتها عليهم ودعاءها ليهم
الأم بتبكي وتقول اهديهم يارب .. اهديهم يارب
حتى لو سنين تدعي .. مش بتبطل

⚠️كنت ناوية أجيب قصة بس الحقيقة لقيت كل القصص صعبة
وكل حد هيقرأ كلامي مرت بيه قصة من النوع ده

متدعوش بقى على ولادكم 😁

#مروة_المنادي