" بنّي سليمان ' ملحمة شياطين الأنـس ' لــ زينب سميـر "

.. الفصل الثاني عشر ..

بسم الله نبدأ..
بنّي سليمان •• ملحمة شياطين الأنـس ••

_الفصل الثاني عشر .

.. ! شـرط ! ..

' فالغيرة.. هي الترادف الأعظم لـ الحب.. '
. . . . . . . . . . . . . . . . . . . . . . . . . . . . . . . . . . . . . .
لم تمر علي مغادرة ناني سوي دقائق، كانت خلالهم قد عادت الي فراشها واستلقت عليه، كادت تغلق جفونها لتحاول النوم، لعلها تعوض الساعات الفائتة التي لم تستطيع ان تنام فيها، لكن صوت الجرس الذي عاود التعالي من جديد منع عنها النوم، نهضت وهي تتأفف، وفي ظنها ان الطارق هي ناني، التي من عادتها تناسي أشيائها وقد تكون تناست شيئًا الأن بالفعل، توجهت نحو الباب وفتحته وهي تهتف:-
_كالعادة نسيتي حاجة...
قاطع حديثها رؤيتها له أمامها، سليمان كما هو دون تغيير، ملابس مهندمه.. طلة مميزة، يباشرها بنظرات بها لمعة لم تخفو بعد.. تحفزت جميع حواسها وهي تنطق بعصبية:-
_انت اية اللي جايبك هنا؟
قال ببسمة خفيفة:-
_مش هتقوليلي اتفضل!
بيسان بنفي وسخرية:-
_لا مش هقولك.. وهطردك كمان
أمسك ذراعها الذي كانت قد احاطته بالأخر أسفل صدرها ودفعها برفق لتدخل الي المنزل ودخل خلفها.. أغلق الباب خلفهم ثم نظر لها و:-
_دا انتي طلعتي بخيلة اوي بقي
بيسان بعيون قد بدأت تطلق شرارات الغضب:-
_انت هنا لية، وبأي عين أصلًا تيجي هنا، انا مش قولتلك مش عايزة أشوف وشك تاني..؟
سليمان:-
_وانا مش قولتلك مستحيل أسيبك؟!
تنهدت في محاولة منها أن تهدي أعصابها و:-
_اطلع برة
قال بعناد و.. اصرار:-

_مش هطلع قبل ما نتكلم
بروده.. هدوئه.. حديثه، كل هذا يزيد من عصبيتها، أنه بارد بينما هي تغلي من الغضب، هو يقول بأفعاله ان لا شى قد حدث، بينما هي منذ اخر لقاء حياتها أنقلبت رأسًا علي عقب
صاحت بعصبية:-
_نتكلم في اية؟ انا قولتلك مفيش كلام ما بينا
امسكها برفق من ذراعها:-
_لا في.. انا عايز أتجوزك يابيسان..
قاطعته ساخرة بمرارة:-
_في السـر
قال في محاولة منه ان يستعطفها ويفهمها وجه نظره:-
_اها في السر.. ودا بس لحد..
_ما تزهق مني وتسيبني، ويبقي يادار ما دخلك شر، اللي عايزه أخدته ومحدش حاسس بحاجة، فلما تطلق لا يطلع عليك لا سين ولا جيم وتفضل سليمان توفيق الدنجوان
نفي برأسه و:-
_لا.. مش دا قصدي، انا ميهمنيش كلام الناس..
قاطعته بعصبية وهي تنفلت من بين ذراعيه:-
_لما ميهمكش كلام الناس، اية اللي مانعك انك تتجوزني في النور؟ اية طلعت فعلا مستحقش اطلع معاك في الصورة؟
_بيسان افهميني..
رفعت اصبعها في وجهه، وقالت بتحذير:-
_لا افهمني انت واسمعني، انا مش زي غيري ياسليمان باشا، اللي ترمي نفسها تحت رجلك علشان فلوسك ونفوذك ومركزك، انا مش هرضي بطلبك دا ولا هوافق عليه وان كنت بحبك.. انا اللي يحبني يتجوزني في النور مش في الضلمة
_دا بس، لفترة.. والله لفترة وهعلنه قدام الكل، اطمن بس ان كل حاجة بخير
بنبرة رافضة.. قالت:-
_اسمي ميبقاش علي اسمك لدقيقة واحدة في السر، ولو سمحت اطلع برة