The One I Like Is You [Own Creation]

7

Unicode

"မင်းက ဘာကို ချောင်းနေတာလဲ"

ကျောင်းထဲမဝင်သေးဘဲ ကျောင်းရှေ့မှာရပ်ပြီး ဟိုချောင်းဒီချောင်း လုပ်နေတဲ့ ခန့်ညားမောင်ကို သူ့ သူငယ်ချင်းက အော်တယ်။

"ချီး!"

ကိုယ့်အာရုံနဲ့ကိုယ် အန္တရာယ်လွတ်မလွတ် အကဲခတ်နေတဲ့ ယုန်တစ်ကောင် အခြောက် လှန့်ခံလိုက်ရသလိုပဲ ခန့်ညားမောင် ထခုန်မိသွားတော့တယ်။

"သေမလို့ ငါ့ကိုလာခြောက်နေတာလား ရဲဝင်းသားရဲ့!"

အဖေနာမည်ခေါ် တုတ်ခံလိုက်ရတဲ့ ရဲထွဋ်မျက်လုံးပဲ အရင်လှန်လိုက်တယ်။ ပြီးတော့ ခန့်ညားမောင်ကို ပြန်ကြည့်တယ်။

"မင်းကို ဟိုကောင်က စာပေးတယ်ဆို"

"ဘာ... ဘာစာလဲ"

"လားလားလားလားတွေ ပြောမနေစမ်းပါနဲ့ မင်းကိုစာပေးလိုက်တာ လူတိုင်းမြင်တယ် နောက်ဆုံးတော့ ဒီကောင်က သတ္တိတွေကောင်းပြီး မင်းညီမကို မင်းဆီကနေ တစ်ဆင့်စာပေး လိုက်တာလား"

တကယ်တော့ ကျောင်းသားတွေရဲ့ ဖြောင့်မတ်မှန်ကန်တဲ့ ဦးနှောက်ထဲမှာ ဝေယံကိုကိုက ခန့်ညားမောင်ကို စာပေးတယ်ဆိုတာ ခန့်ညားမောင်ကို ပေးတာမဟုတ်ဘဲ မြတ်နိုးမောင်ကို ပေးတာလို့ပဲ အော်တိုဘာသာပြန်ကြတယ်။ ကိုယ့်ဘာသာ မလုံမလဲဖြစ်နေတာကြောင့်သာ ခန့်ညားမောင် မျက်နှာက ချက်ချင်း နီရဲသွားတာ။

"ဟမ့်"

ခန့်ညားမောင် ဘာပြန်ဖြေရမှန်းမသိတော့တာကြောင့် နှာပဲမှုတ်လိုက်ရတော့တယ်။ စဉ်းစားကြည့်လေ။ သူ့ညီမကို သူကတစ်ဆင့် စာပေးခံရတယ်ဆိုတာရော ဝေယံကိုကိုက သူ့ကို စာပေးပါတယ်ဆိုတာရော ဘယ်တစ်ခု ကမှ သူ့အတွက် အကောင်းမရှိနိုင်ဘူးမဟုတ်လား။

"မင်းညီမက ဘာတဲ့လဲ"

ကျောင်းက ကျောင်းသားတွေတင်မဟုတ်ဘူး။ ခန့်ညားမောင်ရဲ့ သူငယ်ချင်းတွေကပါ ဝေယံကိုကိုနဲ့ ပတ်သက်ပြီး မြတ်နိုးမောင် ဘယ်လိုသဘောရှိလဲဆိုတာကို စိတ်ဝင်စားကြတယ်။ တကယ်တော့ ဝေယံကိုကိုက စံပြကျောင်းသားပေမဲ့ ပုကွကွမျက်မှန်နဲ့စာကြမ်းပိုး ညှဉ်းသိုးသိုး လိုတော့ မဟုတ်ဘူး။ သန့်သန့်ပြန့်ပြန့် ထောင်ထောင်မောင်းမောင်းနဲ့ သူ့ဘာသာ ကြည့်ကောင်း တဲ့မျက်မှန်နဲ့ စာကြမ်းပိုးတစ်ကောင်ရှိတယ်။ ပြီးပြည့်စုံမှု ဆိုတာက ဝေယံကိုကိုအတွက်လို့ လည်း ပြောလို့ရတယ်။ ကြည့်ကောင်းတယ်၊ စာတော်တယ်၊ လူကြီးတွေကို သိတတ်တယ်။