#كحل_عرب
(بيت بيوت )
((( بقلم زينب ماجد )))
الحلقة _16
(كسرة محب )
واعيش بحسرتك هايـم
اشب نوبه بعذاب الروح نوبه بلومة الايم
لــِ عريان السيد خلف||🖤
بغداد_ مدينة الثورة
الساعة الثامنة صباحاً
كواغد : تعتاز شي ؟
حاكم : شنهي من الصبح طالعة
- لزوم اكعد الوادم تغبش اعلى حصتها .. شعدي
- الله يكويج اخذي راحتج
طلعت كواغد لمحلها .. و حاكم ظل كاعد ، سألته ايمان : شكد راح تكعد ؟
-يومين وامش .. عليش ؟
- ردت احاجيك بسالفة
- شنهي ؟
- جلال خابرني البارحة وديكولي شاف جمارة بالكلية
انتفض : وشرايد منها
- الرجال رايدها على سنة الله ورسوله .. ومحاجيها كايلتله اني بت اصول و الحجاية تاخذها من اهلي، هل خابرني كالي اسألي حاكم اذا اجي اتقدم للبنية ينطوها .
- اخوج جبير وينه ووين جمارة
- اي شمنتظر تنطيها لواحد بكدها ؟ ووين تلاكي احد يلوك بيها البنية دكتورة واخوي دا يدرس دكتوراه ومستعد يخلي مهرها بيت بأسمها ، وهو خالي مختلي ، جهالة مو صغار حتى اداريهم، تلتهي بروحها .. وبيته بالمنصور وين تلكالها هيج قسمة بعد ؟
تنهد : والله ما اعرف
- اني مو لإن اخوي بس والله اهلي خير من الله وهو من زمان رايدها و ام ستار ما انطتها، صح هي رافضة اي واحد يجيها ، بس ما تلاكي هيج قسمة زينة حتى عنده معارف ما يخليها تشتغل برا بغداد ، يشغلها بمستشفى قريبة وحتى يجوز يفتحلها عيادة و تتوفق البنية احسن من كعدتها هاي .
- والله تريدين الصدك ما تلاكي احسن منه و البنية كبرت واحنه بناتنا بت ١٢ ثلثطعش نطي البت ما نخليها عدنا .. الا هاي امها دكت رجل رادتها تخلص دراسة
- يمعود اللي اتزوجن شحصلن هياني اني صايرة شوربة من ورا الجهال حتى ما الي وكت الاداري روحي بيه .
- الله كريم خل اشوفن رايها وراي امها وعود ذاك الوكت ازوجنها ، خوما اغصبها .
- لا مو غصب بس جمارة دا تضيع عمرها وهي ترفض كل قسمة زينة تجيها ، و كثرة ال لا تبور البنية تكوم الناس ما تتقدم لخطبتها كل ظنهم رافضة الزواج بأي شخص .
- الله كريم ، صبيلي جاي .
صبتله وايمان ظلت كاعدة يمه تاكل وتوكل ابتها
طلعت نوسة : صباح الخير جدي
- هلا جدو صباح النور ، اكعدي تريكي .
- حبوبتي وين ؟
- بالمحل مالها
أنت تقرأ
كحل عرب
General Fictionجيل بعد جيل .. يولد حبا جديد يواري خبث العادات و التقاليد بين نهوة و فصلية هدية و دية اولاد ضحية وشيوخ ظالمة لا تجد للإمور حلاً غير السلاح .. من العراق وعلى ارض السماوة اقدم لكم (كحل عرب )
