كحل عرب

الحلقة 49

#كحل_عرب
(الفوضى )

((( بقلم زينب ماجد )))

الحلقة_49
(الاء في ورطة )

وحسرتك
للموت تبگه
ابهرش گلبي اتعت
((لعريان السيد خلف))

سرحان : ها بوية وين ؟

مروان ؛ غير كعدوني حتى اودي البنات

- هااا اي خطية ما ظللهن شي ، وصلهن و جيب وياك ريوك و صمون .

- تؤمر يابه .

وكف سرحان بالباب و هو بشوف مروان يلوف سيارته ، وبنات حاكم طلعن من البيت صعدن وياه ، تمشى بالفرع وراح وكف اباب المخزن ، ام ستار واكفة ، والبسطية مال لالة خالتها جدام ، حجه : ها اصباح الخير

- هلا اصباح النور ، شلونك يمه .

- على الله ، يكولون الامريكان مسوين انزال ليلة امس بالفرع الورانه .

- سمعنا والليل كله ما نمنا حارة و فوك السطح الطلق يتلاعب فوكنا ، وعبيس مامش دولبنا هالولد .

- ليش تخلونه يا ام ستار

- خالة انا شنهي واحجي واحط روحي ، عايزة الجلمة الخشنة ؟ وحاكم مريض اعلى ساعة يطيح ، ظالة بس امهم مبتلية بيهم .. وامهم امسيجينة ، الويلد بهالزمن صعب تكضه مرة .

- الله يساعدها ، الولد صعب ما ينكض ، مريوان هاذ انا ومأمون و هدوة ويانا ، وما يرد ولا نكدرله .. هالكاعد بطال لجن وعلي مستعد اصرف عليه و على عايلته ولا يطلع ويسويلي مصيبة .

- لا مريوان خوش ولد ماله غرض بهالسوالف

- هو ماله غرض بسوالف الدين والمقاومة وللسياسة كلها بس يا ام ستار ما يكض السانه ، وسرسري اطي ركص وشرب ونسوان .. بغيرهن لا تسولفله .. هسه طلعولنه الموامنه ومأمون روح بروح حاطها وياه بس كون ما يشرب برا .. ويوصي بمرته حتى لو تسويله كعدة الشرب بيدها ولا يطلع يشرب برا .

- الله يستر عليهم ان شاءالله

جاي يحجون والراديون مشتعل بالقران ، خلص القران حول اغاني ، ضحك سرحان : من القران للاغاني شلون هاي

اندارت كواغد راد تفر الراديون ، حجه سرحان : هدي يمكنه صوت حسين نعمة هاذ .
ظل يستمع لحد ما وصلت الأغنية (بين علية الكبر وأشتاكت عيوني ... وين الأحبهم جنت وجانوا يحبوني من كثر صب الدمع ما اظن يعرفوني ، من كثر صب الدمع مو راحن عيوني )

تنهد سرحان و عيونه دمعن وهو ( يا خوية يا خنجر اشتاكن عيوني ) دار وجهه لكه كواغد تبجي  مسحت دمعها من عاينلها

- ولون حرام الاغاني لجن حسين نعمة ما يغني .. يداوي الكلوب بحسه .

- حيل حلوة الأغنية يمكنها جديدة .
كمت منها والاغنية طبعت براسي .. حيل وجعة كلبي .. ردتني لذيج الايام الجنت اكعد بالجول وانا وخنجر و ربعه يدندنون باغاني حسين نعمة ونغني بيهن .. يا حريمة نباكن الجلمات من فوك الشفايف ، يا حريمة يا خوية ضيعيتك وخليتني مفرد .. كل هلي وعمامي وعشيرتي حذاي واحس بروحي مفرد بلياك .