اش ترا وجرا😉(رواية بالدارجة المغربية)"مكتملة"

البارت 10

البارت 10
سمعات الغوات او هي دور: كيفاش انا هنا ولهيه لا، جات قربات لعندهوم او ليان عينيها مجميدين عليها ناضت كتقرب منها حتا تلاقاو
ليان: ليان
غيثة: غيثة
مسو بعضياتهوم او سخفو بجوجات
ادم ونوح جاو كيجريو لختهوم اما اية او رقية مشاو لغيثة محمد بقا مسمر فبلاصتو شوية او هوا يهز تليفونو عيط لومبيلونس لي تعطلات شوية هزوهوم دخلوهوم لمستعجلات
خرج طبيب او جاو كولهوم كيجريو لعندو
ادم: دكتور مال ختي او اشنو جرا
طبيب: اش غنقوليك اسيدي حالتهوم غريبة بزاف قلبهوم كيكون عادي ومن بعد كيوقف شي ثواني وارجع اخدم لحد الان وقف تلاتة المرات دقات القلب ديالهوم بجوجات منتظمة او غادية بواحد الطريقة عجيبة قلبهوم كيدق بجوج فنفس الوقت او كيوقف فنفس الوقت(شوفو دبا تخيلو معايا حاطينهوم حدا بعضياتهوم او كل الة تاع لقلب لاسقة فوحد او بجوجهوم تيت تيت تييييت القلب وقف او ها هو هدم تاني تيت تيت😂)  البنات داخلين فغيبوبة حاليا غدوم ما بين 24 ساعة لاسبوع علا حساب
اية: شنو المعمول دبا ادكتور نقدروا نديروا اي حاجة وخا نسفروهوم للخارج
الطبيب: مغادي انفعهوم والو السفر حنتاش معندهومش تا شي مشكل عضوي حتى القلب طبيعي جدا المشكل كاين غير فالحالة الغريبة
محمد: واش هاد الحالة دائمة
طبيب: الله اعلم حنا غنراقبو لحالة ديالهوم او نشوفوا خليتليكوم الراحة
ادم: شكرا دكتور
مشا الطبيب وخلاهوم مهمومين ادم او نوح لي ختهوم مابين الحياة او الموت اية لي صحاباتها او خواتاتها بجوج لداخل
اما محمد لي هاز الهم كتر خاصة مع الحيرة لي فقلبو يلاه قال صافي قلبي نجادب لليان وفجأة كتبان البنت اللي كان كيبغي ههه سخرية القدر كيف كيقولو
اية حسات بيه: محمد لباس اهئ اهئ
جرها عنقها: نتي لي واش لباس
اية: اهئ اهئ بجوجهوم اهئ لداخل محمد واش غيكونو لباس اهئ
محمد كيملس علا راسها فوق الخمار : غيوليو لباس افنكوشتي غير مسحي دموعك مغيفيدوك فولوا دعي ليهوم بزااف
اية كتمسحج عينيها بباطن ايدها بحال الدري الصغير او طبعا مستر ادم حاضيها وعينه مخرجين القلوبة(واا لعربي جمع عينيك راه غنجعر عليك محمد): ااه بصح غنمشي نصلي فلتحت او ندعي ليهوم او غنخرج حتا صدقة ياك رسول الله صلى الله عليه وسلم قال داوو مرضاكم بالصدقة
محمد: هانتي بديتي كتخدمي دماغك يلاه نهبطو
مشاو هبطو او خلاو مراهوم رقية او نوح اما ادم فخرج فاش كانو كيهضرو
نوح لرقية: عمرك شفتي ختي
رقية: هديك تيتيزة لا معمرني شفتها ݣاع. او نتوما كتعرفو غيثة
نوح: لا واش عمرها عودات ليك علا ليان حنتاش من ردة فعلهم كيبان بلي راه كيعرفو بعضياتهوم مزيان واش عمرها جات لكاليفورنيا
رقية: كاليفورنيا لا ولكن الصراحة مؤخرا كانت كدكرها وخا عمرها عتبات برا المغرب تا الباسبور معندهاش
نوح: امكن ليان شافتها فاش جات المغرب ولكن خويا قال بانه عمرها جات من عشر سنين هادي او حتا فاش كانو كيجوا كيمشيوا لاغادير عند جدي تماك
رقية: غيثة عودات ليا بانها عاشت 18 عام فحياتها فنواحي الرباط او عمرها سافرات ݣاع مفهمتش ردة الفعل لي دارت
نوح: اعلم الله اش بينهوم حتى قلبهوم خدام بحال بحال، نسيت 😅 مد ليها ايدو انا نوح خو ليان التيتيزة لي قلتي😂
رقية:😅😅 انا رقية ولكن سمح ليا مكنسلمش علا الرجال
نوح جمع ايدو باحراج: ولكن انا صغر منك ببزاف باينة نتي شحال فعمرك
رقية: باغي تصاحب معايا هنا اووف اصلا وقفتنا بوحدنا ماشي تال لهيه وخا نكون كبر منك بعقد
نوح: كيفاش
رقية: قال صلى الله عليه وسلم ما خلى رجل بامرأة الا والشيطان تالتهما هنا مشيت او قابل نتا البنات
مشات رقية او نوح كيدور الهضرة فراسو هادي مالها الا كانت عالاقل غير قد ليان فراها كبر مني بربع سنين معقدة الخرا انا مالي بقا ݣالس تما حتى جا ادم او اية او محمد جابو معاهم الماكلة بقاو شوية او باتت فلكلينيك اية او محمد او رقية
دازت تلت ايام او مزال مفاقت حتا وحدة اية ورقية غير كيبكيو محمد او ادم مرفوعين مقادرين اديرو والو او نوح الوحيد لي كيجاوب والديه حنتاش وصاوه ميقول ليهوم والو فالنهار الرابع اية ورقة حاضين البنات كيف ديما الجاج حتا كيبان ليهوم ايد ليان او غيتة تحركات فنفس الوقت غوتات اية او رقية فنفس الوقت
اية/رقية: غيثة/ليان حركات ايدها مشاو ضربوها بجرية لطبيبة فحصاتهم او قاليت ليهوم راهم بيخير دبا ولكن خاصهوم اكملو السمانة تحت المراقبة فحالة قلبهوم وقف مرة خرا
عند البنات: ليان: اااه اشنو وقع فين انا
غيثة: ااي راسي
دارو دقة عند بعضياتهوم ليان/غيثة: نتي
غيثة: السراقة سرقتي ليا جسمي اش درتي اسحارة
ليان: الله اهديك اش سرقت او اشمن سحور اوخا نحضر جنون كاملين ميمكنش ندير هكا او اجي نتي محشوماش عليك
غيثة: اش درت
ليان: حياتي كلها محافظة على نفسي او جسمي لراجلي جيتي نتي او تعريتي كي درتي ليها
غيثة: اااه داك اللباس العروبي بدلتو
ليات: 😭😭 حرام عليك عروبي بانو ليها الشباب جايين من جاج من بعد نتفاهمو
دخلو او هو ينقز ادم علا ليان: خلعتيني عليك
او غيثة لي هيا ليان كتشوف فيهوم بنص عين
ليان كطبطب علا راس ادم او نوح لي عنقوها بجوج: وا صافي اوليداتي راني لباس غا شوية روماتيزم ما شكيت عليكوم
دربها نوح : حنا كنا غنموتو عليك بالخوف او نتي كتفلاي علينا
جات رقة او جلسات حدا غيثة : كيبقيتي دابا
قلبات عينيها: 😑 لباس
ليان حسات بيها: يلاه دبا شتوني اوا دردبو خليوني ننعس
اية: مقداتكش ربع ايام
غيثة/ليان:😱 ربع ايام
اية😂😂😂 : وايه
ليان: وخا هكاك عيانة
ادم: شنو دبا كتجري علينا
ليان: اوا شوف نتا نيت
ادم جر نوح: كتجري علينا من الجنة البنات مورايا
اية😂😂😂😂: بسلامة خلينا ليكوم الراحة
خرجو من البيت او سدو الباب
ليان: اوووف دبا نهضرو علا راحتنا دارت عند ليان
غيثة: وليت عزيزة عليهوم حتا هما سرقتيهوم مني جسدي او سرقيتيه وليديا املاكي كلشي فاش غنهضرو😡
غيثة: عفاك تهدني وبلا غوات راه غيسمعونا انا كنعتادر علا كلشي وخا انا راه مدرت والو فقت ولقيت راسي هاكا دايرين بيا ناس مكنعرفهومش علاقتنا متوترة شي حد ضرب صاحبة الجسم بموس صحاب توع الزفت كيساغلوني علا قبل الفلوس وليت واحلة فهادشي كلو وزيد عليها فبلاد مكنعرف عليها غا سميتها
ليان: عالاقل نتي لقيتي ناس دايرين بيك لقيتي فلوس طنوبيل الرعاية الصحية اما انا فقت لقيت راسي مليوحة فسبيطار عمومي مع بنت وحدة لي هيا رقية او وحدة اخرة ليلى لي جات كتعنق فيا او تقول انا لي نقدتها او انا مفاهمة والو كرشي كولها غرازي الدار اللي ساكنة فيها صغر من بيتي او زيد عليها الا مخدمتش او دمرت غنبقا بالجوع او واش نتي مريضة كولشي هدوك الخدامي مكترتاحيش
غيثة: ااه انا عارفة ضروفك حنتاش داكشي لي عشتيه فتلت شهور راه عانيتو حياتي كاملة او اشنو بغيتي ندير واش بايدي انني نرجع لجسمي ومدرتش
ليان: اوا كيفاش غنرجعو
غيثة: معرفتش😂😂😂😂😂
ليان: علاش كضحكي
غيثة: لا غير غريبة😂😂 نهضر مع راسي ورد عليا😂😂😂
ليان: 😂😂 اه بصاح
غيثة: شوفي ليان غنلقا شي سبة باش نديك معايا نتي ورقية ولكن خاصك ديري واحد الحاجة هو اللول
ليان: شنو
غيثة:...
نخليكوم بسلامة 🥰