B-9 ရှေ့တွင် အသင့်ရပ်စောင့်နေသော Maxwell က Eric ကို မြင်သည့်အခါ ဦးညွှတ် အရိုအသေပြု၏။ ထို့နောက်
ရှေ့ကနေ လမ်းပြပြီး အခန်းတစ်ခုရှေ့သို့ရောက်တော့ Eric အတွက် တံခါးဖွင့်ပေးသည်။
နေအလင်းရောင် မတိုးနိုင်ဘဲ မှောင်ရိပ်ကျနေသည့် အခန်း။ ခြောက်ခြားစွာတိတ်ဆိတ်လျက်ရှိသော ပါတ်ဝန်းကျင်။ မှိန်ဖျော့ဖျော့ အခန်းမီးရောင်တည့်တည့်အောက်၌ ရပ်တန့်သွားသည့် ခြေလှမ်းတွေ။
ကြမ်းပြင်ပေါ် ဒူးထောက် အနေအထားဖြင့်
ခေါင်းငိုက်စိုက်ကျနေရာမှ မော့ကြည့်လာသော မျက်လုံးတွေဟာ Eric မျက်နှာကို မြင်တော့ ဂနာမငြိမ် ဖြစ်လာ၏။
"အ"
သူ့ရင်ဘတ်ကို ပစ်ကန်ကာ ရင်ညွှန့်တည့်တည့် ဖိနင်းလိုက်သည့် ခြေထောက်တစ်ဖက်။
"မင်း Noah ကို သစ္စာဖောက်ခဲ့တယ်"
Eric ရဲ့ စကားတွေက ပင်လယ်ရေပြင်ကို ဖြတ်ပြေးလာတဲ့ လေတွေလို အေးရှရှနဲ့။ Thomas တစ်ကိုယ်လုံး ကြက်သီး မွေးညှင်း ထသွားလောက်အောင် ထိတ်လန့်ရပါသည်။ ဒေါသတကြီး ပေါက်ကွဲနေတဲ့ လူထက် ယခုလို သွေးအေးအေးနဲ့လူက ပိုကြောက်ဖို့ ကောင်းတာ မဟုတ်လား။ အဆိပ်ပြင်းတဲ့မြွေတစ်ကောင်ရဲ့အကြည့်မျိုးက သူ့အာရုံတွေကိုပါ ထွေပြားနေစေ၏။
"ကိုယ့်သေတွင်း ကိုယ် တူးတဲ့ကောင်ပဲ"
ခွန်းတုံ့မပြန်နိုင်ဘဲ အာစေးမိသလို ဆွံ့အလျက်ရှိတဲ့ Thomas။
"ဒါပေမဲ့ မင်းလှဲလျောင်းဖို့ နေရာပေးရင်
ညာတာရာ ကျမှာပေါ့ ... အဲ့ဒီ့တော့ သေလူလို ရှင်သန်ခွင့်ပေးမယ်"
မျက်တောင် တစ်ခတ်စာလေးမှာတင် ခါးကြားထဲကနေ Eric လက်ထဲ ရောက်သွားတဲ့ Pistol ဆီမှ မောင်းဆွဲသံကို လှစ်ခနဲသာ ကြားလိုက်ရပြီး
"အား!"
Thomas ညာဖက်လက်မောင်းကို နစ်ဝင်သွားသော ကျည်ဆန်။
အရိုးအသားတွေ ဖွာကျဲသွားပြီလားဟု မှတ်ရကာ နောက်ပြန်ကြိုးတုပ်လျက်ဖြင့် Eric ရဲ့ ခြေဖဝါးအောက်မှာ လူးလိမ့်မရသည့် ခန္ဓာကိုယ်။
"ခွင့် လွှတ်ပေး ပါ"
"အ!"
နာကျင်မှုကြောင့် ရုန်းကန်နေစဥ္မှာပဲ ဘယ်ဖက်ပေါင်ခြံကို သေနတ်တစ်ချက် ထပ်ပစ်ခံလိုက်ရပြန်တာမို့ Thomas အသံ မထွက်နိုင်တော့ပါ။
