اتبعني

بارت اول

مرحبا ورودي ان شاء الله مساءكم او صباحكم خير وسعاده .

صباح الخير عمه
صباح النور حبيبتي
وين جدو وبيبي بعدهم مكاعدين
لا كعدوا وراحوا يسيرون على بيت ام احمد يكولون ناوين يخطبون لابنهم ورايدين جدج وبيبيتج وياهم وراحولهم من الصبح
عمه اكو خطابه من الصبح شسالفه
لا حبيبه بس همه كايليلهم نريدكم من الصبح يمنه
اها خوش وبابه ومامه وينهم
امج تغسل بالملابس وابوج راح لشغله خطيه ميلحك
جا وعمو ابراهيم ميساعدهم اشو بس كاعد هوه ومرته وبناته نهار كله نوم واكل والشغل على عمو اوس وعمو رسول وبابه
حبيبه عيب هيج تحجين هذه مهما يكون عمج وعمامج وابوج ممقصرين وبعد يومين يجي عمج رضا وعمج سامي
اوي فدوه مشتاقتلهم صار شهر مشايفتهم
ياعمه غير جدج شغله ميخلص ولدنه ميكعدون من وره الشغل
الله يساعدهم عمه ان شاء الله يرجعون بالسلامه
ديله كومي كعدي البنات وتريكو حته نبلش شغل وشوفي ولد عمامج واخوانج شنو ماعدهم شغل شي ندري جمعه بس مو هيج خل يكومون
ماشي عمه تدللين من عيوني

خل اعرفكم على العائله
اني اسمي يقين عمري ١٦ سنه رابع عندي ثنين خوات سرى عمره ١٥ ومريم ١٣ وثنين اخوان جواد عمره ٢٥ وسيف عمره ٢٢ الفرق بينه احنه واخوانه جبير لان بوكته بابه جان مسافر فتره ومن رجع اجينه احنه البنات
مامه اسمه هدى عمره ٤٥ سنه وبابه اسمه علي عمره ٤٧ سنه يعني بعدهم اهلي صغار ربي يحفظهم
عندي خمس عمام واربع عمات وحده منهن ممزوجه وجدو وبيبي احنه عائله جبيره اذا اعرفكم عليهم كلهم دوخون كاعدين سوه بيت مساحته ٥٠٠ متر جدي صاحب شغل وخير وعمامي وبابه مقصروا كبروا الشغل اكثر واكثر همه و ولدهم
عندي هواي ولد عمام وعمات وبنات هم

رحت كعدت خواتي وبنات عمامي كلهم كعدوا  ماعدا بنات عمو ابراهيم لو اشلعهن شلع ميكومن
بنات حبابات كل وحده تكعد اخوانه بسرعه كليلهم عمه سهى تكول كعدوا
ماشي بس ولي جنج ديج بس انتي من بينه تكعدين من الصبح
هههههه ياا فوك ما اكعدكم ولن خل اروح يمه عمه انتوا متفيدون
صرنه منفيد مو
يي متفيدون اشو ذني كامن يركضن وراي واني اركض ونضحك
ونسمع ذيج العيطعه من الولد ههههه
ولجن ركدن جنجن ثواره من الصبح متكولن اكو ناس تعبانه تريد تنطمر
والله عيني عمه سهى كالت كلكم تكعدون كافي نوم
اشو ذوله نزلوا كلهم جنهم حصونه واحد وره الاخ وكصصهم معقجه من العصبيه ههههه
ماعدا ثنين مروان و حمزه ذوله يرجعون مهلوكين ثنينهم رتبه نقيب فمحد يتقرب عليهم
عمه كعدتهم كلهم بقوا بس حمزه ومروان
ولج يقين اني مو كلتلج كلهم تكعديهم
عمه غير خطيه تعبانين
يي واذا روحي كعديهم معليج
واذا ترزلت شسوي
ميسولج شي بس روحي خل اكمل الاكل

رحت لغرفه مروان دكيت الباب مفتح مره مرتين دخلت
ظلمه وريحه الجكاير تكتل وملابسه مال دوام بلكاع ومامعروف راسه من رجله ههههه
مروان ... مروان اكعد عمه سهى تكول كوم خل يكعد كافي نوم
مروان كوم
هذه بس لا ميت رحت ظليت احرك بجتفه وجان اسمع صوته
شتردين
عمه تكول كوم اكعد يله
كليله تعبان
والله كالت خل يكعد متقبل هسه اترزل من وراك
يقين تولين لو شلون
بكيفك خل اروح اكعد حمزه احسن منك بلكت يكعد جنكم مواته اشو هذه كام وعاكد حواجبه
يابه شكد تلحين وروحي اني اكعد حمزه بدربي لان هذه ميكوم اذا مو دفره
خوش مو تتأخرون
يي فهمت والله يابه شكد تلحين
اوي عيني ازعجناك 😒

نزلت لكيتهم كلهم بالصاله متجمعين ودك سوالف وضحك يي عيني شكو ضحكونه وياكم
جواد ولج صايره عود جبيره وماخذه الرئاسه من عمتي دولبتينه مكعدتنه من الصبح
اني شعليه هذيج عمه وعود كلله اريد انام 😌
محمد  ديله كعدي لا ظلين واكفه فوك روسنه
اوي عابت ولا اكعد يمكم اروح يم البنات احلالي شعدي يم الولد اشو سوالفكم محلوه مبيه حش
امير دكولي هيج تردين تحشين بالناس
هههههه
رحت يم البنات وكعدنه نسولف على المدرسه وعن هاي وذيج لحد مصارت الصلاه وطبعا البيت تنظيفه على امهاتنه والبنات الكبار واحنه علينه نعدل غرفنه ونساعد اذا يحتاجونه
كمت توضيت ولبست الجادر مال صلاه وبنص الهول اني والبنات وامي ونسوان عمامي وعمتي كلنه نصلي بنفس المكان والولد بالاستقبال
كملنه صلاه رحت صعدت للغرفه سبحت قبل الغده داريد اشسور وطفت الكهرباء
عمه عمه ليش طفت
حبيبتي هسه تجي ليش شبيج
اريد اشسور شعري
انتظري شويه وتجي

طبعا كلهم جوه عدنه بالطابق الثاني هم هول وبي مرجوحات يعني مكان مال كعده كلش حلو رحت كعدت على المرجوحه
وخليت سماعات باذني اسمع اغاني
اخذني الوقت واني ادندن وجانت شمس وفتحت البرده وكدام المرايه اتمايل على الاغنيه كاعد ادير وجان اشوف مروان ستحيت وتلبكت
نزعت السماعه وهوه يباوع عليه عاكد حاجبه احنه بالبيت نلبس شال لان كله ولد وعيب فهسه ملابسه شال وشعري مبلل ستحيت وين اودي عيوني منه
يقين شسوين هنا
ها ا ا
شنو ها شسوين هنا وشبيج كله جوه
مو سبحت وردت اشسور وطفت فضليت هنا شويه
ماشي ولبسي شال لا احد يشوفج هيج
تمام هسه البس ظل يباوع عليه لدرجه نظراته قيدتني اريد امشي ومن كثر ما متلبكه عثرت ولزمني من زندي
شبيج يقين
مبيه شي بس ايدك اريد اروح
يي روحي
رحت بسرعه للغرفه وكلبي يركض ركض اجت الكهرباء شسورت وخليت عطر ومرطب ولبست تراك يغطي الورك لونه ماروني كلش حلو وخليت الشال على راسي ونزلت

كله كاعده عمامي وبابه كلهم جايين من الشغل وعمو ابراهيم ومرته وبناته اوي شكد ما احب تصرفاتهم
والعائله لتم شمله يوم الجمعه كلعاده وكل الايام مو بس الجمعه ربي يحفظ هل لمه الحلوه
يمه يقين صيحي البنات وتعالن خل نصب غده يله
يي يي عمه جايين
يله بنات كومو عمه تكول تعالوا نصب غده
رحنه للمطبخ اخذت السفره ورحت فرشته
يمه يقين خل يصبن هنه بالماعين وانتي خلي على السفره
ماشي عمه
وصدك هنه يجيبن واني ارتب على السفره واجوا الولد دائما اتقيد لان شالي ينزل واني اخلي على السفره اخواني ميضوجني عدهم عادي لان يكولون ذوله ولد عمج مثل اخوتج بس مهما يكون اكبر مني كلهم ولازم البس حجاب واجه مروان زاد تقيدي بس مهتميت الهم كملت
ورحت جبت الكلاصات والبن والمي والعصاير

حسيت دوخه والم براسي كلش قوي لدرجه مكاعد اتوازن وماردت اخوفهم لان عمتي ومامه وبابه واخواني يخافون عليه
بنات كملوا بدالي شويه واجي
ليش يقين بيج شي
لا مبيه بس شوي واجي
تمام
صعدت علكيف وبالكوه طبيت للغرفه حسيت بخفقان وتنفسي ضاق
نمطلت وغمضت عيني والدوخه معافتني
شويه واجت اختي مريم
يقين يله تعاي تغدي
مريم حبابه ماريد مجوعانه كليلهم راح تنام اوك
ماشي
شويه وصعدت عمتي
يمه بيج شي
ها عمه لا مبيه بس شويه تعبانه
يمه سلامتج خل اكول لابوج خاف بيج شي
لا عمه والله ماكو داعي هسه انام شويه واصير زينه
يمه حبيبتي اذا تردين شي بس صيحي ماشي
ماشي عمه

نهايه بارت اول اتمنه تستمتعون 🌹
1053 كلمه
ولاتنسون التصويت 😊