🌹❤عيناها سبب عشقي 🌹❤

27

🌸الحلقة 27🌸:
بعد ما تفاهمو انو العرس راح يكون بعد شهر
الكل فرح وخاصة اكرام اللي و اخيرا راح تجتمع بحبيب قلبها ومعشوقها معاذ فرحتها ماكنت تعطيها لحد تمنات يكون واحد من افراد عيلتها معاها بصح الدنيا توجور عاكسة

جازت 15مع التعب والجري والجهاز راكم تعرفو تعب العرس وكنل عليهم الڤاطو وفي هاذا الوقت اكرام ماكانتش تشوف معاذ بحكم لالة حميدة قالت ممنوع يتشاوفو قبل العرس حاوزاتو لدارو 😂😂 (لالة حميدة التحريميت كون جا بنادم)
المهم جا وقت يجو الاحباب راكم تعرفو الخالات والعمات و الجيش العثماني 😂 (هاذي تسمية نتاع الاطفال كي يتلايمو فالعيد في دار جدهم يستاهلو لقب الجيش بجدارة)
المهم كاين اللي فرحلهم وكاين اللي حسدهم وجات معاهم وحدة اختصاصية فالقصف امام الجميع كانو محتافلين مع بعض كانت اكرام لابسة جبة تفتق عليها وحكمت شعرها بطلب من لالة حميدة لانها تعرف عينين الناس واش يديرو

حياة (اخت لالة حميدة السم لمان حا بنادم): تهدر و تسمع: انا جامي شفت عروسة تخرج من دار العريس ههههههههه تضحك بتسوميم
قحرتلها لالة حميدة: ونتي واش من مرقة حرقتلك شواربك هاذي بنتي وحبيبتي الغالية انا باباها وامها واختها وكل عيلتها فهمتي
حياة:هههه جامي كنت متخيلة تجيبي وحدة مالزنقة وتسكنيها دارك اختي
اكرام دموعها على خدها ماقدرت تحكي حتى حاجة
لالة حميدة:اسكتي يسكت حسك عجبك الحال اقعدي من فم ساكت ماعجبكش الباب يفوت جمل
حياة:هاذي عليك اختي تحاوزي ختك على جال بنت الزنقة معليه راني رايحة

راحت وريحو منها واكرام مسكينة كانت فرحانة قلبتلها حالتها هدرت لالة حميدة وبحلاوة لسانها بدلت الجو و ضحكت عروستها بلسانها المعسل مخلية الناس يصلو على النبي ويباركو لعروستها اللي لكان جات وحدوخرا في بلاصتها تهدر لكنها احتارمت حياة لانها اكبر منها (❤ العبرة من هاذي الشي انو. اللي بغا. خليه. يهدر. ️ يسكت وحدو ❤️او بالاحرى ينبح وحدو 😉😉)