حينَ رأيتكِ "فصلية"

˹٣٧˼

˼حـــيـــنَ رأيـــتـــكِ˹

البـارت السابع والثلاثون
العنوان .. يوم الفراق . 

/ قـبل القرائـة تـصويت فضـلاً لـدعم الـرواية \

• • •

كلامها ما دخل عقلي
شنو تقصد؟ ، شنو يعني حوراء دمها ترس ممرات المستشفى؟!

بس انطتني العنوان شمرت التلفون من ايدي وركضت للكنتور لبست أي شي گدامي واخذت الي فلوس خليتها بجيبي بدون ما اخذ جنطة وطلعت من غرفتي ركض ليجوه ومن مريت من يم الصالة شفت بس نورس موجودة ابوي طالع وامي مادري وينها يمكن بغرفتها ..

نورس:: شيلان ..

ما اهتميت الها وكملت ركضي وطلعت للحوش واخذت حذائي ولبسته على السريع وفتحت الباب مال حوش وردت اطلع وسمعت صوت نورس تناديني بصوت عالي ونفس الشي هم ما انطيتها اهتمام

رحت للشارع العام واخذتلي تكسي وحته ما اتفقت على الحساب من الأستعجال ، صعدت وچنت متوترة حيل وجسمي يرجف من التوتر والخوف

الخوف چان مسيطر عليه ، خلاني اطلع بسرعة البرق من البيت واني بالعدة وطلعت بدون ما يدرون اهلي وخلاني اصعد بتكسي ويه ولد رغم اني اخاف اصعد ويه ولد بسبب منذر ..

- بلا زحمة اختي ما انطيتيني العنوان گبل صعدتي وگلتي وصلني

شيلان:: اا ا اعذرني ، رايدة توديني لمستشفى الـ_____ الصايرة على شارع _______

انطيته العنوان ومن چان يسوق چنت احسه كلش بطيء ، صحت وگلت اله سوق بسرعة والولد ما حچه شي ولا سوه مشكلة لأن تفهم وضعي

وصلني للمستشفى ودفعت اله الحساب وبسرعة نزلت ودخلت للمستشفى ، رحت للمكان الدلتني عليه ريم بالمكالمة وچان قريب يم الطورائ وبس وصلت لاحظت اكو دم صاير بالممر

انتبهت لريم گاعدة بالگاع ومتچية على الحايط وچانت تبچي ويمها زوج حوراء ومرة چبيرة اكيد هاي امه

ركضت لريم وما گدرت اوزان نفسي ووگعت يمها بالگاع ، خليت ايدي على رجلها وحچيت بصعوبة واني الهث ..

شيلان:: شصااار الهااا

شهگت ريم وحضنتني وصارت تبچي بحضني ..

ريم:: ما رايدة اخسر حوراء ، شيلان شلون انسه المنظر الشفته اجيت لصديقتي حته اشوفها واطمئن عنها اجي الگاهم مخبوصين بيها ودمها مطشر بالگاع

دفعتها عن حضني بدون وعي وجريتها من متونها وضغطت عليها ..

شيلان:: شصااااار

ريم:: وو و و وگعت من الدرج وچان اكو شگ كلش چبير براسها خلاها تفقد دم كلش هواي ..

شيلان:: وگعت؟ ، مصدگة حوراء وگعت؟!!