Unicode
"ယံယံ....ယံယံရေ....''
"ဗျာ....မမ ယံယံဒီမှာ''
အိမ်၏ နောက်ဘက်ခြံထဲမှာ ယံယံပန်းစိုက်နေရင်း မမ၏ ခေါ်သံကြောင့် လှမ်းထူးလိုက်၏ ။ မမကလက်မှာ လှောင်အိမ်လှလှလေးကိုဆွဲပြီး ယံယံစီ ရွှင်ပြစွာ လျှောက်လာခဲ့သည် ။
"ယံယံ....မမဘာလေးယူလာလဲ ကြည့်ပါဦး''
လှောင်အိမ်လေးကို ယံယံရှေ့ထိုပြလာတာကြောင့် ယံယံအထဲကို စိတ်ဝင်တစားကြည့်လိုက်မိသည် ။
မြောင်.....
အဖြူရောင် အမွှေးပွပွတွေနှင့် ချစ်စရာကြောင်လေးတစ်ကောင်ဖြစ်ပြီး ယံယံအား အသံပေးလာသည် ။ ယံယံ သဘောကျလွန်းတာကြောင့် ဝိုးခနဲ ၊ ဝါးခနဲတွေပါ ဖြစ်ကုန်ရ၏ ။ နှုတ်သီးညိုလေးနှင့် ကြောင်ဖြူလေးက ယံယံအား ဂေါ်လီလိုမျက်လုံးတွေနဲ့ ပြန်ကြည့်လာသည် ။
"အား....မမ ကြောင်လေးက ချစ်စရာလေး ဒါဘယ်သူ့ကြောင်လေးလဲဟင်''
"ယံယံလေးအတွက် မမဝယ်လာတာလေ မွေးနေ့အတွက် အကြိုလက်ဆောင် ၊ ယံယံသဘောကျရဲ့လား''
"ကျတော့ပေါ့ မမရဲ့ ၊ အဟိ....ကြည့်ပါဦး ချစ်စရာလေး ယံယံအိမ်မှာနေရင် မပျင်းရတော့ဘူး မမကအရမ်းချစ်ဖို့ကောင်းတယ် မွ....မွ''
တိရစ္ဆာန်သိပ်ချစ်တတ်တဲ့ တိမ်ယံကကြောင်လေးကို မြင်တော့ အပျော်လွန်ပြီး သူ့မမအား တစ်မွမွနမ်းနေတော့သည် ။ထို့နောက် ကြောင်စုတ်ဖွားလေးကို ပွတ်သပ်ချော့မြူနေ၏ ။
မဟေသီက မောင်ဖြစ်သူကိုကြည့်ရျ် အတော်လေး စိတ်ကြည်နူးမိသည် ။ ငယ်စဥ်ကတည်းက ပိုးမွေးသလို မွေးခံရသော မောင်လေးဟာ တစ်အိမ်လုံး၏ အချစ်တော်လေးဖြစ်သလို သူမ၏ အချစ်ဆုံးလေးလည်း ဖြစ်၏ ။ငယ်ငယ်ကဆို မောင်လေးက သူမအကြိုက်တွေကို သဘောကျနေတတ်သည်မို့ သူမမငြီးမငြူးပေးအပ်ခဲ့သည် ။
မိဘတွေရဲ့ အလေးပေးမှုပိုရသော မောင်လေးအား သူမနည်းနည်းတော့ မနာလိုဝန်တိုဖြစ်ခဲ့ဖူးသည် ။ ဒါကလည်း မောင်လေး၏အပြစ်တော့မဟုတ် မိဘတွေရဲ့ ဘက်လိုက်မှုကိုတော့ မဟေသီခံပြင်းခဲ့ဘူး၏ ။ သားသမီးချင်အတူတူ မောင်လေးတစ်ခွန်းဆို မိဘတွေက လိုက်လျောပြီးသားပေမဲ့ သူမကတော့ လိုချင်တာရဖို့အရေး အချိန်တိုင်းနီးပါး ပူဆာခဲ့ရသည် ။
