زوجتي السمينة

#زوجتي_السمينة
حلقة 15

ناضت نجاح من صدمتها وهي تحاول تستجمع أفكارها شن لكان يصير
نجاح: إكرام كيف صار وأمتى
إكرام :قعمزت بجنبها تسألي فيا على أساس نعلم أنت شن بيصير
نجاح: باهي من قاللكم
إكرام :بكري جي عمي لهو بوك وعمي سعيد لهو بوها وتعاركوا هلبا وصايرة مشكلة كبيرة عريضة واضح من أصواتهم وبعدها جي أكرم وأنور وتكلموا معاهم وشن هو الكلام مش عارفة وبعدها خش علينا بوي قال عرس أكرم أسبوع الجاي يعني قدامنا أسبوع هذا ولبعده يبدأ العرس
نجاح: كيف كان شكل أكرم لما جي
إكرام: كان منهار من البكاء وكان مش طبيعي
نجاح: 🤔🤔 اها يتهنى هو وياها أنا ماليا علاقة بيه يتزوجها
إكرام: أنا أول ماسمعت جيت خبرتك لأنه مش قلتيلي انه أنتي وأكرم بتحبوا بعض
نجاح: أنا كذبت عليك كيف ماهو كدب عليه توا
إكرام: كيف مافهمتش ممكن تفهميني
نجاح: كانت اتفاقية بيني وبين أكرم انه نقول نحبك بس عشان فاطمة تسيبه بس كان هو يبي يطلعني وحدة صغيرة ويلعب لعبته هو وفاطمة
إكرام: حرام عليك مرات هو مظلوم
نجاح: لو مظلوم رفض وقال مانبيش نتزوجها ومرات هو لطلب منهم يخطبوهله
إكرام: حرام عليك ومع أنه أنتي أكثر وحدة قريبة من أكرم وأنتي أول وحدة سيبتيه بروحه في الطريق
نجاح: تعرفي يإكرام قلبي وجعني منه هو لاختاره الطريق هذا خليني في حالي وخشت للحوش ومشت قعدت تبكي
نجاح: مسحت دموعها يانجاح ليش تبكي بحد مايستاهل تنزلي عشانه دمعة وحدة منك وناضت مشت تشوف في أمها
نجاح: سمعتي أمي بعرس أكرم
سعاد: ايه توا خبرني بوك ومن توا نقولك ماليكش دخل بيهم يعرسوا أو يهرسوا
نجاح: خيره شن فيه
سعاد: لصار في عرس عمك مانبيه يصير ويتكرر
نجاح :لا أمي فيه موضوع ثاني
سعاد: ماصاير شي اطلعي من بحداي كان بتندبي على عمرك وديري حاجة وريحيني منك
نجاح: باهي أنا طالعة عجب والله عجب

في الليل طلعت نجاح برا مضايقة
قعمزت وهي سارحة وتفكر كيف صار من أول يوم خبراته فيه على فاطمة لليوم كيف صار هكي لعند ماقطع تفكيرها صوت أكرم
أكرم: نجاح يانجاح
نجاح: ها شن فيه
أكرم :وين كنتي سارحة
نجاح: ناضت وقفت هكي يأكرم أخر شي بتتزوجها بتتزوجها بعد كل لصار
أكرم: تي شن تخبزي أنتي اسمعيني
نجاح: اسمعت بما فيه الكفاية بعد لصار هذا كله شن لما قلتلي نمثلوا نحبوا بعض شن تلعب عليه وخليتني صغيرة قدامها توا شن تبي مني توا جاي فهمني
أكرم: تي غير افهمي مني شن صار قبل
نجاح: لفهمته فهمته توا مانبي نسمع منك شي خليني في حالي ياريت
أكرم: مشي وسيبها وطلع بسيارته لعند مكان خالي مافيه حد وقعد يفكر
أكرم: تي أنا بروحي مش فاهم شي تبيني نفهمها وأنا مادنبي شي ولا دخلني بشي أنا مظلوم ياربي فرج عليه ياربي فإن كان هذا خير لي فأنا ليه وإذا شر لي فأبعده عني 🥺🥺

بعد مرور اسبوع فكانت نجاح كل ماتتلاقى مع أكرم تمشي وتبتعد عنه وماكلمتاش من يومتها
وكانت عند فاطمة فرحانة بالطير وتبتت في جهازها
انه يوم الجمعة يمشوا يخطبوا خطبة وتلبيسة عشان يقعد الوضع كانه عادي قدام الناس
في العشية كانت نجاح ونوال مقعمزات مكسدات
نوال: غدوا خطبة أكرم
نجاح: كانت سارحة اه شني
نوال: قلتلك غدوا خطبة أكرم
نجاح: يتهنى أنا مش حنمشي
نوال: كيف مش حتمشي هذي
نجاح: أنا من يومي مانحبهاش فاطمة وتبيني نمشي
نوال :مشت لأمها خبرتها جتها سعاد
سعاد: شن لسمعته
نجاح: كيف ماسمعتي مانبيش ماشية
سعاد: تمشي رجليك فوق راسك مش بعدها يقولوا حاسدتها أو الولد تبيه والله لو ماتبيش تمشي لنهار الأسود اليوم على راسك
نجاح: مانبيش ماشية مريضة وماعنديش شن نلبس
سعاد: دبشك جديد شارياته في عرس عمك ماطق شهر
نجاح: مانبيش مانبيش
سعاد :شن تبيهم يحكوا لينا اااه
نجاح: يحكوا ليحكوه مايهمنيش
سعاد: بعدين تعالي جاي يافرخة ليش متغيرة وتردي في الكلام وماعاد تمشي لحوش عمك لقبل كل طبيخة غاطسة فيها
نجاح: قتلك مريضة وريحوني اطلعوا من دماغي وتو نمشي توا تهنيتوا
وطلعت برا من الحوش
نجاح: يخلوا الواحد يجري ولايدري الحاجة مش بالغصب هي
شن بيفوته غدوا وخلاص تي بنمشي لعزاء ... 🤔 تي شن الكلمة لطلعت مني كان يسمعني يحسابني ميتة عليه
وقف وراها أكرم: صدقتي مش غدوا تجي تعزيني لأنه غدوا دفينتي مش خطبتي
نجاح: تلفتتله بعيد السو عليك وعلينا 😒😒 وخشت وسيباته