البارت السادس عشر
بعد صلاة الفجر الكل جلس اللي يقرأ قران واللي يقرأ أذكاره واللي يستغفر
أبو غيم وهو يجلس جنب أبو عزيز : تقبل الله
أبو عزيز أبتسم : منا ومنك
أبو غيم : شلونك اليوم عساك طيب
أبو عزيز : ابشرك طيب وبخير ، انت شلونك
أبو غيم : ياجعله دوم ، ابد على ماتحب وانا اخوك
أبو عزيز أبتسم واعتدل : اقول ياسلطان
أبو غيم : سم يامحمد
أبو عزيز : وش رايك نخلي الملكة يوم الاربعاء خير البر عاجله وش قلت وانا اخوك
أبو غيم أبتسم : مهيب شينة لكن خلنا نشوف راي المعرس اخاف انه مايعجبه يوم الاربعاء
أبو عزيز : صحيح خلني اناديه ونسمع قراره ، هذال وانا ابوك
هذال اللي كان جالس جنب نايف وعزيز : سم امرني
عزيز ضحك : ايه صاروا يجتمعون من ورانا يانايف وفالمسجد بعد
نايف مات ضحك : ايه والله صدقت
ضحك أبو غيم : خلاص مايخفى عليكم شي تعالوا وانا ابوك
ضحك نايف : لا لنا الحق نزعل ولا لا ياعزيز
عزيز اللي ميت ضحك : صح عليك لازم نزعل
أبو عزيز أبتسم : انتم مالكم شي نبي العريس بكلمة راس وش دخلكم
انصدم عزيز من كلام ابوه وضحك : افا يالغالي
نايف : الله يسامحك ياعمي كسرت قلوبنا
هذال : اقول ماودكم تسكتون انت وياه خلوني اشوف ابوي وعمي وش يبون مني
عزيز قام وسند على نايف : يحق لك ياعريس خذ راحتك مع ابوك وعمك يلا يانايف مشينا
نايف ضحك : يلا خل العريس مع عمه
ضحكوا عليهم ولا استغربوا لانهم عارفين انهم يمزحون
أبو عزيز : هذال وانا ابوك
هذال : سم
أبو غيم أبتسم : ياولدي أبوك يقول خلنا نخلي الملكة الاربعاء وودنا نسمع ردك ونشوف هاليوم مناسب لك ولا لا ، ولا ودنا بعد نخطط بشيء من وراك وانا عمك
أبو عزيز : هذا عمك سلطان وقال لك وش دار بيني وبينه وش قلت وانا ابوك
هذال انصدم ماتوقع ان ابوه مستعجل على عرسه : والله يا ابوي انت حددت وانا اقول على بركة الله والعرس بيكون بعد ثلاث أسابيع قبل تنتهي الاجازتي وانشغل بدوامي
أبو غيم أبتسم : على بركة الله وانا عمك
أبو عزيز : على بركة الله ، الله يوفقك ياولدي ودوامك لاحق عليه ان شاء الله لا تشيل همه
أنت تقرأ
"ضاع الغزل من ضحكة شفاها"
General Fictionانها أول رواياتي اتمنى تنال اعجابكم للكاتبة : أمواج قراءة ممتعة ?
