الملتزم السادي ♡بالدارجة♡

الجزء 2

♥4♥
الضغط لي كان غيتقسم مثلا على كثر من جوج بنات جا فيها هي كامل وهوما معارفينش ان هادشي ازمها لا نفسيا ولا صحيا .
من بعدما سدات الشرجم خرجات تاني تتسلت تغسل فمها ويديها لي ولاو تيتلسقو غسلات وجمعات شعرها شفينجة وهبطات لقات باها جا مشات باستو
فؤاد:افين كنتي مخشية نتي تاني
ملاك (حادرة عينيها):غي فبيتي
الغالية:علاه مالكي ماراضياش بينا ولا
ملاك (بلعات ريقها):راغي حيت توسخ ليا الزيف بالغبرة قبيلة فاش شطبت
يالله غيدوي باها وهو يقاطعو تاني طارق مبغاش تمشي ليها فرحة الصوفة لي بانت ليه قبيلة غطير بالفرحة
طارق (بضحكة):واشتكم نسيتوني ونا لي جاي كنجري نقوليكم واحد الخبار
وهنا الانتباه تسلط عليه شي لي وترو
فؤاد:الله يسمعنا خبار الخير
طارق (بان عليه التوثر وبعض الخجل قاد الجلسة وجمع يديه قدامو):احم كل الخير الوليد احم دابا انا احم اه انا دابا جيت اه فكرت لا لا انا جيت
فؤاد (شاداه الضحكة بحالا فهمو):امالك بارك تمتم عليا هنا
طارق (تنفس بالجهد وخرجها بالزربة):بغيت نتزوج
تسمع الصقيل وملاك مبتاسمة بفرحة حتى كسر الصمت تزغريتة من الغالية وناض طارق تيسد ليها فمها وتيطلب
طارق:هالعار بلا شوهة اميمتي
قاطعو فؤاد
فؤاد:ايوة اسيدي شكون هاد تعيسة الحظ لي غتقبل بيك
طارق (طلق مو وضار عندو):واحد بنت الناس شي عامين باش تعرفت عليها ضريفة وبانت ليا داخلة سوق راسها وبغيتها تكون مولات داري فقلت علاش منزعمش وراه قلت ليها السبت غنجي لدارهم
قاطعو فؤاد
فؤاد(بتخنزيرة):اييه كبرتي ووليتي دير لي فعقلك
طارق:ماشي هكاك غير
فؤاد(قاطعو تاني):ايوة سير شوف لي يخطب معاك
الغالية:اوليدي مدرتي فيها ميصلاح ايويلي عالم الدرية وحنا كيغنديرو نوجدو داكشي في ثلثيام
طارق (هبط راسو):الوليدة رالخير موجود كلشي غنشريوه غاهنيو بالكم

♥️5♥️
فؤاد (تنهد):منك من خوتك انا لي غنخلص كلشي ماشي صافي خدمتو ودرتو ديك الشركة ومسك عليكم الله تسحابوني غنخليكم بغيت نفرح بيك بحالهم وكيفما خسرت عليهم نخسر عليك تانتا ومتعولش ليا بحالهم السانتيم الواحد ميخرجش من جيبك داكشي لي غتخسرو خليه ديرو بيه حاجة اخرى
جا تاني يهضر ووقفو
فؤاد (بابتسامة):وايه عارف مخاصك خير ولكن بغيت نكون انا مول فرحتكم(هز راسو بتعالي)تقدر تقول غرور باش نبان عليكم
طارق ضحك وتاباه ضحك ببشاشة
فؤاد:هه الله يكمل بالخير اولدي ايييه اليام بحالا عاد البارح كنتي تفيقني بغواتك فيك الجوع وباغي ترضع
ضحك وناض عنق باه وضار شاف فملاك
طارق:ونتي اشنيولة شتك غاساكتة
ملاك ناضت عنقاتو وعينيها غرغرو حيت تاهو غيبني حياتو وسير فين تبقا تشوفو تاهو غيوليو عندو مسؤوليات باركات ليه وخلاتهم جالسين كيعاود ليهم على العروسة طلعات تاني لبيتها لكن هاد المرة بحزن ماشي بحال قبيلة داخلة فرحانة كرهات حياتها مزال من لي كانت كتقرا كانت كتلف واخا كانت تديها مها وتجيبها وكتسمع تنمر وضحك قرانها عليها حيت كتجي معاها وكتسناها فاش كتبغي تخرج اما من لي خدات الباك بميزة حسن بغات طير بالفرحة ضنا منها انهم غيخليوها تكمل قرايتها فمدينة اخرى كيف خوتها لاكن هيهات من لي كان جواب باها بالرفض وتا مها بالمثل رغم محاولات خوتها باقناعهم الى ان جوابهم كان ديما
ولديها:صافي شغدير بشي قراية اخرتها غتمشي لدار راجلها
هاد الكلام كان ديما كيق/تلها خصوصا لجات شي مرة وكانت بنتها صغر منها ومزوجة تما الغالية كتبقا دق عليها بحالا منحوسة وكيغيديرو يشوفوها الناس وهي مكتخرج مكدرج تامن التيلي كيعطيوه ليها مرة مرة وخا كان جابوليها خالد الى انهم مكيخليوهاش خايفين تلعب مور ضهرهم طاحت دمعة ملي تفكرات والديها كيفرحانين قبيلة ياترى تاهي الى كانت غتزوج غيفرحو

...يتبع

♥6♥
غيفرحو بحال هاكا ولا غتشوف فعيونهم بحالا عبئ وتزاح عليهم فاش خرجات من القراية ولا حلمها تزوج ويكون راجلها متفتح ويخليها تكمل قرايتها وتخدم ولات كتفكر فالزواج على اساس هو المخرج الوحيد لي غيحررها من قيود والديها وفعلا غيكون
ملاك غاع الدراري لي فالدرب جاو خطبوها بدون استثناء لكن كانو كيلقاو الرفض من طرف الاب وشحال من خاطب من غيرهم جا وكيرفض شي لي كيخلي الغالية تعصب وتبغي تستفسر لكنو كان ديما كيقوليها ماتدخلش فهاد الموضوع
نفضات تفكيرها وناضت تقابلات مع المراية كتشوف فحالتها كيف النويويرة لكن غادة وكدبل حلات العقاد تاع البيجامة وحيداتها كاملو وكتشوف فراسها بابتسامة رضى على جسمها المنحوت خصر محفور فخيضات تريمة صدر واقف الكريشة تاهي عندها شوية شي لي عطى لمنضرها انوثة كانت لابسة غي سليب فالكحل مكديرش سوتيامات مها مكتخليهاش وكتقوليها بلي صدرها كبير متحتاجهمش لاكن بدا كيبان ليها لابقا على هاد الحال غيترهل ليها وغيولي مدلي خنزرات وهي كتخايلو غيولي بحال ديال شي بقرة ومشات جبدات حوايج اخرين كانو تاهوما كبار عليها بدلات وهبطات تاني توجد مع مها الغدا كملو وجلسو كياكلو وجل حديثهم على تحضيرات الخطبة
طارق وخوتو دايرين شركة ديال التصدير والاستيراد وقفوها وولاو كيدخلو الزبابل تاع الفلوس بالرغم من هادشي الى ان الاب مبغاش يمشي يعيش ففيلا كانو شراوها ليهم يعيشو فيها مبغاش يخلي لبلاصة لي كبر فيها السي فؤاد لي شد التقاعد كمدرس فالجامعة بغا يعيش كيما كان بالرغم من غنا ولادو
نخليوهم ونمشيو لمكان اخر فالضواحي تاع المدينة كانت فيلا كبيرة شوية وزوينة فبيت فالطابق العلوي كان ناعس على كرشو وعريان من الفوق خاشي وجهو فالمخاد كتبان غي لحيتو الزعرا الكثيفة وشعرو كدلك تحل الباب ودخلات تتسلت تانقزات ليه على ضهرو

....يتبع