آفْرُودِيتْ 🦢

الحلقة السادسة و الأربعون🧚‍♀️

🔸️حلقة 46
🔹️آنيا_تحكي:
كبست على الورقة في يدي و تبسمت...توا وين حسيت براحة بعد الستراس لي تعديت بيه من فمرة إني مانيش باش ننتقل للمستوى الثاني..كيما فرحت أكثر خاطر أغلبية المجموعة نجحت معايا...غزرت للوقت لي وفى و لميت أوراقي...غريبة كمية الفرحة لي حسيت بيها..مع أنو نجاح طفيف...أما حسيتها خطوة مهمة بالنسبة ليا...أصلا هاذي أول مرة نذوق طعم النجاح و نعرف كيفاش نحدد أهدافي و نتبعها نزلت الدروج بالزربة بعد ما ودعتهم..منعرفش علاش كان عندي إندفاع قوي باش نشارك نجاحي مع أي حد يعرفني و ليو كان أول شخص خطر على بالي خاطر يستنى فيا اللوطة..حبست مستغربة كي لقيت عكس توقعاتي منعرفش علاش جا توا و من غير ما يخبرني...و مع هكا حسيت بفرحة مختلفة...خاطرني نحب نشاركو في كلشي يخصني...خاصة أنو هو السبب الرئيسي في وجودي هوني..قربت منو شوية نحكي
أنا:متوقعتش باش تجي عندي
نوح:حبيت نخرجك شوية باش تبدل جو
تبسمت بالوقت..متوقعتش أنو يعطيني من وقتو و يجي جيست باش يخرجني معاه..خذيت نفس نحكي
أنا:فما حاجة نحب نخبرك بيها
نوح:نسمع فيك كاندي
جيت باش نحكي...سكت مع صوت تليفونو...ضيق عينيه مستغرب و هز بالوقت..بقيت نغزر لملامح وجهو لي تبدلت من غير ما نفهم شنية صار بالظبط علق على التليفون و غزرلي يحكي
نوح:أركب توا
أنا:لباس ماهو ؟
هزلي براسو إيه و حل الباب ركب...خلطت عليه من غير حتى كلمة..منعرفش علاش منجمتش نسألو مرة أخرى كيما لقيت روحي ساكتة من غير حتى كلمة طول الثنية إستغربت أكثر كي لقيتو وقف كرهبتو قدام الكلينيك نزلت وراه من غير حتى كلمة...أصلا مكانش عندي فرصة باش نحكي معاه...دخل يزرب و وقف قدام الرسيبسيون يحكي
نوح:لورا مورين
هي:في الغرفة 307 مسيو
عديت عينيا على وجهو مصدومة...متوقعتش أنو إحنا هوني على خاطرها...خلطت عليه بالوقت و دخلت للأصونصير معاه...من غير ما ننطق بحرف واحد أصلا مفما حتى شي نحكي فيه..خرج أول ما تحل الباب...و قرب من الدكتور لي خرج من غرفتها يحكي معاه..فهمت من كلامهم أنها عملت حادث أكا علاش هي هوني...دخل عندها من غير ما يتلفت عندي...خلطت عليه بعد دقايق و وقفت نغزرلهم...قعد بجنبها على السرير و عنقها بالوقت...عديت عينيا على الجرح لي مغطي في جبينها...غير الجبيرة لي في يدها...عديت دقايق نتبع في تفاصيل قعدتهم...من تعنيقتو ليها لبوستهم و لضحكتها من الكلام لي دار بيناتهم..وخرت خطوة لتالي و قعدت على الكرسي لي مقابل الحيط منحبش نتفرج فيهم أكثر..غير هكا أقنعت روحي انو اللي قاعد يصير شي طبيعي خاطرهم مع بعضهم معنديش حق باش نغير و لا ناخو موقف منو خاطر كلشي طبيعي من غير مشاعري لي ديما تتمرد عليا و متحبش تفهم و تستوعب أنو اللي قاعد يصير غالط و ميجيش و انو الشخص هذا فتحلي باب واحد..باب المستقبل مش الحب...نزلت راسي شوية و غزرت للإستمارة...تبسمت من غير ما نحس...توقعت باش نعد نهاري أحسن من هكا و نشارك الكل الخبر هذا...هو و ليو و حتى ويليام أما صار العكس..منعرفش قداش عديت وقت و أنا قاعدة في بلاصتي..غرقت في دوامة الأفكار لي قاعدة تدور في راسي..فقت من سرحتي كي حسيت بيه خرج من بيتها مروهج..كأنو تو وين تذكرني قرب مني شوية و تنهد براحة يحكي
نوح:آنيااا
أنا:الحمد الله على سلامتها
نوح:عيششك
أنا:إذا باش طول أكثر...أطلب أي حد يوصلني..تعبت هوني
نوح:مقصدتش نخليك وحدك
أنا:ميسالش
نزلت عينيا من وجهو و غزرت لطفلة أخرى تقرب ناحيتنا...فهمت من حديثهم أنو هي باش تبقى معاها و تعتني بيها زادة...قرب مني أول ما دخلت للغرفة و غزرلي يحكي
نوح:خلينا نمشيو
هزيتلو براسي باهي و وقفت...خلطت عليه من غير حتى كلمة..أصلا وجهو إرتاح و ملامحو ترخفت على بكري...عكس الجو لي تقلب برا و الدنيا بدات تظلام على بكري...عديت الثنية ساكتة...كلشي يهمني في اللحظة هاذي...إني نوصل و نبعد عليه...كان أحسن لو بقى بعيد عليا و مجاش لعندي و خلى ليو يمشي كي العادة..أول ما شد الفران..حليت الباب و نزلت معاه في نفس الوقت..سبقني بخطوات و تلفت عندي مستغرب كي مخلطتش عليه...خاطرني كنت نلوج على ليو وسط الرجال لي برا..ضيق عينيه يحكي
نوح:لباس ماهو ؟
أنا:باش نطلع بعد شوية للجناح
وخرت لتالي و قربت لواحد من الرجال..سألتو عليه و خذيت طريق المستودع بعد ما عرفت أنو هو غديكا زربت في خطواتي و تبسمت بعد ما ريتو خارج من المستودع..غزرلي مستغرب و قرب مني يحكي
ليو:آنياا...شنية صاار ؟ محبيتش نطلبك بكري باش متدخلش في مشاكل بسببي
أنا:توقعت أنو إحنا أصدقاء
ليو:بالفعل إحنا هكا
أنا:ملا كان لازم تطلبني..غير هكا أنا و نوح أصدقاء زادة...يعني مفما حتى مشكلة
تبسم بالوقت و قرب مني شوية..عدا عينيه على وجهي يحكي
ليو:طمني شنية صار في النتائج ؟
ضحكت و حطيت الورقة في يدو..قراها و غزرلي يحكي
ليو:كنت متأكد أنك باش تنجح
أنا:فرحت برشااا
ليو:علاش ماهوش واضح ملا ؟
نزلت على شفايفي شوية من غير حتى كلمة خاطرني بالرسمي مش قد بعضي...ضيق عينيه يحكي
ليو:شفما آنيا ؟ شنية صاار ؟
أنا:حتى شي...تاعبة شوية و كهو
ليو:أما أنا نشوف في العكس
مد يدو و طلعلي راسي شوية...غزرلي ندرا كيف يحكي
ليو:نسمع فيك
عديت عينيا على تفاصيل وجهو من غير حتى كلمة منعرفش من وين نبدا و لا شنوة نقول..أما أكثر شي أنا بحاجتو توا هي إني نحكي على كلشي نحس بيه توا يمكن نرتاح من الظغط هذا الكل..خذيت نفس و جبدت روحي منو شوية...عديت عينيا على تفاصيل وجهو نحكي
أنا:ميسالش نحكيو مبعد ؟ المرة هاذي انا لي منحبكش تكون في مشكلة بسببي
ليو:أنا نحب نعرف شنوة قاعد يصير معاك آنيا ؟ ياخي ماكش مرتاحة هوني ؟
أنا:أنا لباس ليو...جيست بحاجة نتعلم أكثر باش نولي نعتمد على روحي و نمشي من هوني...في الأخير أنا مجرد ضيفة كهو
ليو:وين تمشي ؟
سألني مع غزرتو لي ضاعت أكثر و هو يعدي في عينيه على وجهي...تبسمت نحكي
أنا:منعرفش...نجاوبك بعد ما نتعلم نعتمد على روحي أكثر
تبسم بالوقت و تفرهد فرد وقت...حط الورقة في يدي يحكي
ليو:إنتي تستحق مكافأة على نجاحك
أنا:يكفي أنك فرحت معايا
ليو:غدوة باش نكون على حسابك...يكفي أنك تحضر لبرنامج تحفون بعد الكور
تبسمت و هزيتلو براسي باهي...حسيت روحي تفرهدت بعد ما حكيت معاه شوية...كبست على الورقة نحكي
أنا:نشوفك غدوة ملا
ليو:رد بالك على روحك
أنا:و أنت زادة
بعدت عليه شوية و عطيتو بظهري...ضيقت عينيا كي ريتو يقرب ناحيتنا...منعرفش على روحي كيفاش زربت في خطواتي لعندي...وقفت في وجهو قبل ما يعمل أي خطوة أخرى...قحرلي يحكي
نوح:أبععد من وجهي تواا
أنا:ماكش باش تحكي معاه
هزيت عينيا في وجهو...نثبت في ملامح وجهو ل تكبست...ضحك على جنب يحكي
نوح:مفهمتكش ؟
أنا:إذا كنت باش تحكي مع ليو...متحاولش تقرب منو
نوح:ياخي باش ناخو الإذن منك ؟
خذيت نفس طويل و عديت عينيا على وجهو نحكي
أنا:إذا هو مشى من هوني...أنا زادة باش نبعد معاه
غزرلي ندرا كيف...منعرفش على روحي كيفاش قلت هكا...أما للحظة حسيت أنو معندوش الحق يحرمني من اي حد قريب مني...جيست خاطر وقف معايا طول الفترة لي فاتت...ملامحو لي كانت ما تعبر على حتى شي...خلاتني نوخر خطوة لتالي و نبعد عليه من غير ما نتلفت ورايا مرة أخرى...أصلا مسمعتش صوتو مرة أخرى...منعرفش كيفاش وصلت للقصر طلعت للجناح متاعو كي العادة..ألف فكرة إستحوذت على عقلي في اللحظة هاذي...أولها أنو وجودي معاه تحت سقف واحد غالط و مشاعري ليه غالطة زادة دخلت لبيتي و نحيت كبوطي...حطيت الأكل في صحن لوسي...لي غطست فيه بالوقت...مديت يديا زوز نحل في سلسلة الروبة من تالي...وقت حل الباب و هد عليا يحكي
نوح:شنووة كنت تقصد بكلاامك براا ؟ شقصدك تمشي معااااه فهمني ؟
عديت عينيا على وجهو و عروق رقبتو لي برزو أكثر من صياحو و غزرت لعينيه نحكي
أنا:كلامي وااضح
نوح:شنووة لي وااضح ●●●● تكلم شنوووة لي وااضح يااخي بالبساطة هاذي وليت تااثق فيه و تحب تمشي معااه ؟
بقيت نغزرلو من غير حتى كلمة...مع إني مش هذا اللي قصدتو...أما منحبش نبررلو و لا نفهمو وجهة نظري زادة رجعت شعري لتالي نحكي
أنا:أنت شبيك على أعصابك ؟ ياخي فاش يهمك إذا مشيت و لا بقيت هوني ؟
نوح:أنا فااش يهمني ؟ تسأل فيا أناا آنيااا ؟
مد يدو و شاور لروحو و هو يحكي...دقات قلبي قوات مع أسئلتو و مع هكا مجاوبتوش...و منحبش نجاوبو زادة...قربلي أكثر...يحكي
نوح:ياخي فما شي بيناتكم انا منعرفش بيه ؟
أنا:الموضوع هذا ميهمكش زادة
سكت شوية و عدا عينيه على وجهي...يحكي
نوح:و مع هكاااا جاوبني
أنا:متصيحش عليااا
مد يدو شوية و عداها على رقبتو...كأنو بدا يتحسس من وجود لوسي في البيت...هز عينيه في وجهي و قحرلي يحكي
نوح:تتكلم إنتي و لا ناخو الإجابة منو ؟
أنا:أنت ماكش باش تحكي معاه و لا حتى تحاول تبعدو من هوني
نوح:ياخي تحب تجهلني إنتي ؟ بالله من إمتى تحكي عليه هكا إنتي
أنا:من توااا...خاطر معندكش الحق تبعد كل شخص قريب مني جيست خاطرك عامل فيا مزية
نوح:ملا تعتبر اللي عملتو معاك مزية مني ؟ 
أنا:منظنش أنك تعتبرو أكثر من هكا
ضحك و عدا يدو على رقبتو مرة أخرى...يحكي
نوح:زاايد اللي باش نحكيو فيه بعد توا
أنا:أناا باش ننزل لجناح الخدم...نحب نبقى غديكا إذا مفماش ماانع
نوح:مداام هكا تكون أقرب منو...إنتي حررة آنيااا
تلفت و عطاني بظهرو...عمل خطوتين و عاود تلفت عندي يحكي
نوح:مبروك النجاح...عرفت من جوزيف أمس أما حبيتك تعرف منو وسط أصحاابك...ساعة الحادث جا في وقتو مدامك كنت تفضل تفرح معاه هو
بقيت نغزرلو من غير حتى كلمة...خرج من البيت في لحظة..مديت يدي شوية و مسحت دمعتي لي هبطت في لحظة...معادش نحب نبكي أكثر من هكا...أصلا مكانش لازم يجي عندي و لا يهتم بيا مدام هو مرتبط توا...غير هكا حسيت روحي على أعصابي منو خاطر لتوا ملاحظش إني مغرومة بيه و صدق أنو عندي مشاعر ناحية ليو...غمضت عينيا بالقاوي و عاودت حليتهم...مدام مرفضش خروجي من الجناح متاعو معناها حتى هو يحب يتخلص مني...جبدت حقيبة صغيرة و حيطت فيها الحاجات لي نستحقهم كيما لميت الكتب متاعي و ألعاب لوسي قبل ما نطلب أولجا و نعلمها بالوضع...حسيتها إستغربت و مع هكا جات مع وحدة من الخدم لي عاونتني...هزيت لوسي في حملتي و خرجت من الجناح متاعو لي معادش لمحتو فيه رغم إني حاولت نشوفو...نزلت اللوطة و دخلت للغرفة لي كانو يحضرو فيها..عديت عينيا على تفاصيلها الكل..رغم أنها كانت تتوفر على كلشي و مع هكا حسيت ببرودة غريبة فيها...يمكن خاطرني تعودت على الغرفة متاعي طول الشهور لي فاتت حطيت لوسي في السرير متاعها لي نزلتو معايا و نحيت البوت متاعي فرد وقت...أول ما خرجو الكل غطست في وسط سريري و غمضت عينيا كلشي نحب عليه إني نرتاح من ظغط النهار و كهو خاصة بعد الأحداث صارت معايا الكل.