قيود عشك الشيخ

قيد الثالث

.
يافگة عيون الگلب يا ميـزتي
البيها انغـر ..

مو رايدگ واتنفسگ لا يانفس شي اگبـر..!

................

ابتسمت وبعدها فرشت فراشي ونمت تذكرت اهلي ليش عافوني ليش استغلو عني زين هم اذا ما يردوني ليش جابوني للدنيا عمري ما حسيت بحان الاب

ما حسيت بس الا من بعد كم ساعة من حياتي وياهم زين معقولة بيوم ارجعلهم زين شلون ارجعلهم واني!? كرامتي كلبي الي داسو

ما تذكرت شي منهم حلو امي دائما مضيحة بية بس كون ما تسمع كلام من ابوي يكولون الام منبع الحنان زين وين الحنان بالموضوع امي جانت تشوفني اتلطش وانضرب وانهان بدون سبب وتسكت ماخذتني بيوم لحظنها دائما محتارة بروحها ومحتارة شلون ترضي الشيخ

وابوي سامعة الاب سند بس ابوي ما صارلي سند بالعكس ابوي مثل المثل الي يكول الكشة الي قست ضهر البعير وابوي كسر ضهري

خواتي?!! يكولون الاخت مثل الصديقة ليش ما حسيت بشخص صار وياي ما حسيت بصداقتهن او بالاحرى ما حسيت بوجودهن!!!

الاخ هو الوحيد الجان ساندني هو الوحيد الجان من يدخل يصيح وين زهرة اخوها!!! وبعدين?!! الزهرة بيدة شلعها من جذورها وموتها مو ذبلها لااا بل موتها قلعها وعدم حياتها ليش?!! شنو السبب?!! ليش اني بالتحديد??! شنو الغلط الي اقترفتة?!!

كلها افكار هاجمتني اريد اعرف انام ما اكدر بية طبيعة اذا ضايجة من شخص ما اعرف ابجي ما اكدر ابجي عليهم هم بايعيني برخص ليش ابجي عليهم ليش اتعب روحي

هم ما رادوني اني ليش احن الهم ما فد يوم سمعت منهم حجاية حلوة!!! ولا حظن لمني!!! ولا ايد طبطبت علية?!!! عليش هسة مخنوكة واريد اكون بيناتهم ليش هل كد مشتاقة لريحة امي ع الرغم ما شامتها ابد!!! ليش مشتاقة لخواتي رغم ما شفت منهن حنية وحب اتجاهي!!! ليش مشتاقة لابوي الي ما فد يوم شفت منة او سمعت كلمة بابة!!

ما كدرت اتنفس بقيت اجر النفس بصعوبة والدموع ما حابة تطلع ما جاي تطلع

سمعت صوتة هو يكوم ويستغفر بصوت عالي هذا شيسوي?? شعندة كايم طلع من الغرفة كلها اقل العشر دقائق وفتح الباب وراح باتجاه الميز اخذ السجادة وفرشها شجاي يسوي?!! وقت صلاة هسة حتى الفجر بعدة ما صاير الدنيا ليل بعدهي باولها

تقريبا نصف ساعة هو يصلي صلاتيش هاي!! اندار ع يمينة يستغفر ويصلي ع ائمة وع يسارة نفس الشي التفت ناحيتي وهمس بصوت ناصي::- زهرة كاعدة

نتظرتها من الله كفيت الغطة عني وكمت::- ها شيخ

ابتسم::- ليش كاعدة لحد هسة

جانت الباب شبه مفتوحة ويجي الضوة من الممر الي برة باوعلي صفن بوجهي::- شنو الي مخلي هل عيون كاتلها القلق