قيود عشك الشيخ

قيد العشرون

ظليت افتر ع نفسي لحد ما حسيت راسي يريد يطك من كد التفكير والارق كعدت ع جرباية تمددت عليها وروحي رايحة جسمي كلة يرجف بصورة مو طبيعية رفعت ايدي اباوع الها ترجف حيل منظرها مرعب

دخل للغرفة اجة باتجاهي بقيت متمددة ما حركت ساكن عيونة مغمضة حجة بهدوء

::- حبيبتي كومي اكلي يلا علمود تاخذين علاجج

بقيت ع وضعي احس بالذنب كلما يزيد اهتمام يزيد تأنيب الضمير لحد هسة اتذكر كلامة من يكول لا ضمين علية شي

اختنكت وضاك النفس علية ظليت اعصر بروحي ووجهي حسيتة كب نار

اجة ملهوف خلة ايدة ع جبيني فتحت عيوني بتعب اباوعلة بنظرات خايفة اريد التمس الامان منة

هو بدورة رفعني وضمني لحظنة مثل الطفل التظم ابوها حاوطتة ونزلو دموعي لكن سرعان مسحتهن ومثلت الثبات حجة بخوف

::- عليتي كلبي ولله عليتي مالج بوية ليش هيج حالج شنهو الوصلج لهل حال

سكتت ابلع بريقي وعيوني تدور ع ملامح وجها وجها وحدة مريح للنظر مجرد واحد يباوع لملامحة يرتاح

ابتسمت وبلعت غصتي::- ما بية شي بس التعب هلك جسمي احس بخمول مو طبيعي

تنهد تنهيدة شكت كلبة::- لا تخافين بوية طبيعي هلشي من النوم مال المستشفى اكيد تكسرتي وانتي عندج نقص حاد بالحديد وفقر دم والدنيا مليوصة عندج بوية تاكلين بالدين مخلصة باقية بالحلقة الاخيرة

ضحكت علية وهو ابتسم اخذ راسي وباسة وحجة بنظرات ترجي::- زهرة ديري بالج ع نفسج لخاطري بوية اذا صارلج شي انا وين اروح

ابتسمت ع كلامة باس عيوني ثنينهن ونزلنا حتى ناكل

جنت كاعدة يمة خاوية ما عندي كل طاقة تعبانة حد الهلاك والتعب باين ع ملامح وجهي

::- اكلي يلا

مديت ايدي الترجف اريد اشيل الخاشوكة وكعت مني?!!

تركتها متنفرزة ودرت اكوم عن الاكل جرني وثبتني بمكانة وكام يوكل بية شوي شوي ويسولي لكم

اخر شي دفعت ايدة عني وحجيت::- ثقيف شبعت كافي

::- ماكو كافي تخلصين هل صينية كلها وبعدها كولي كافي ما اجبرج ع صينية ثانية

باوعت للصينية مليانة اكل بلم كبير تمن وعلية نص دجاجة وقطعة لحم كبيرة

::- لا ولله!!

::- وداعتج

ضحكت بتعب::- ما اكدر ولله شبعت

::- ماكو شبعتي اكلي يلا يلا

صار يوكلني كوة علية حسيت انتخمت ما اكدر بعد اكل ولكمة من يرفعها اباوعلة بعيوني اتوسلة وهو يخزرني ويدخلها بحلكي كوة