ကမ္ဘာပျက်ကပ်၏ အရှင်သခင်မလေး (ဘာသာပြန်)

(၁၃) စူပါမားကတ်

Unicode

သူမက ကြေးနီပြားများကို ကောက်ယူလိုက်ပြီးသည့်အခါ ကားရှိရာဘက်သို့ ကြည့်လို​က်ပြီး ကားနောက်ဘက်ခြမ်း၌ ကြီးမားသည့် အရွယ်အစားရှိ ခရီးဆောင်အိတ်နှစ်လုံးကို မြင်လိုက်ရသည်။

သူမက ၎င်းကို ဖွင့်လိုက်၏။ တစ်အိတ်တွင် အဝတ်အစားများ၊ ဖိသိပ်ဘီစကစ်* ဆယ်ထုပ်၊ ရေရှစ်ပုလင်း၊ အသားဘူး ငါးသေတ္တာ ပါဝင်သည်။ အခြားတစ်အိတ်တွင် ရွက်ဖျင်တဲတစ်ခု၊ အိပ်ရာအိတ်တစ်ခု* နှင့် စခန်းချမီးအလင်းတို့ ရှိသည်။

ယွင်လင်က သူ ကားမောင်းလာသည်မှာ မထူးဆန်းဟု တွေးလိုက်မိသည်။ သူ့တွင် ပစ္စည်းများစွာရှိပြီး အရာအားလုံးကို သယ်ယူရန် မဖြစ်နိုင်ပေ။ ကားမောင်းလာခြင်းမှာ သူက အရာအားလုံးကို သယ်ဆောင်လာနိုင်သည်ဟု ဆိုလိုပေသည်။

သို့သော် သူက မွန်းစတားတစ်ကောင်၏ ခြုံခိုတိုက်ခိုက်ခြင်းကို ခံလိုက်ရပြီး မတော်တဆ သူ့အသက် ဆုံးရှုံးခဲ့ရသည်။

ဖိသိပ်ဘီစကစ်များ၊ ရေပုလင်းများနှင့် အသားတို့က ထိပင်မထိရသေးပေ။ သူမက အဝတ်အစားများကို လွှင့်ပစ်လိုက်ပြီး အခြားအိတ်ထဲမှ ရွက်ဖျင်တဲကို ယူလိုက်၏။ ထို့ပြင် ယွင်လင်က အိပ်ရာအိတ်နှင့် အခြားသော လိုအပ်နိုင်သည့် ပစ္စည်းများကို အိတ်တစ်အိတ်ထဲတွင် စုပေါင်းကာ ထည့်လိုက်သည်။

သပ်သပ်ရပ်ရပ် ထုပ်ပိုးပြီးနောက် သူမက လီနင်ကျောပိုးအိတ်ထဲသို့ ထည့်လိုက်သည်။ ယွင်လင်က လမ်းလျှောက်ကြည့်လိုက်သည့်အခါ ကျောပိုးအိတ်ထဲမှ ပစ္စည်းများ၏ မည်သည့်အလေးချိန်ကိုမှ မခံစားရသည့်အတွက် စိတ်ကျေနပ်သွားခဲ့သည်။ "ထင်ထားသလိုပဲ အရမ်းအဆင်ပြေတယ်။"

သူမက အဝေးသို့ ကြည့်လိုက်သည်။ ထိုနေရာ၌ အခြားသူများ မရှိခဲ့ပေ။ ၎င်းက ဗလာဖြစ်နေသည့် မြို့တစ်မြို့ကဲ့သို့ အလွန် တိတ်ဆိတ်နေခဲ့၏။ သူမက တွေးလိုက်ပြီး စူပါမားကတ်သို့ အရင်သွားကြည့်ရန် စီစဥ်လိုက်သည်။

လမ်းထက်တွင် မြင်ကွင်းက အကြီးအကျယ် ပြောင်းလဲသွားခဲ့သည်။ အဆောက်အဦးများကို နွယ်ပင်များဖြင့် ဖုံးလွှမ်းထားခဲ့ပြီး ​ကားများက ဂျွမ်းထိုးမှောက်ခုံဖြစ်သည်က ဖြစ်ကာ အပျက်အစီးများအဖြစ် စုပုံနေသည်လည်း ရှိ၏။ လမ်းတလျှောက်ရှိ ဆိုင်တံခါးများက ပွင့်ဟနေပြီး မွှေနှောက်ရှာဖွေခံထားရသည့်ပုံ ပေါ်ပေသည်။