انا المذنبه وانت البريء

الـذنب الـ ٤٨

#انا المذنبه وانت البريء .

- قراءه ممتعه لخدودكم الحلوه .
-علقوا بين الفقرات عيوناتيي .
- كاتبتكم فاطمه جميل .

________________

قبل اربعه اشهر ..

كاعده ومخليه ايدي ع خدي ودموعي تنزل بغزاره يتسابقن منو تنزل اول ..

فزيت ع واحد يحجي وياي

- خويه بيج شي محتاجه شي؟

غزال : لاء لاء ماريد شي

عافني وراح تمشيت شوي واني اسحل بالجنطه لمن شفت رصيف والدنيا وشكت ع ضلام ..

كعدت ع رصيف اصفن ومالي احد ..

واني بروحي بقيت امشي وامشي وماعرف وين رايحه اباوع لدنيا مضلمه وصوت الاذان اعتل الشوارع ..

وكفني رجال ضخم ملامحه مألوفه بس بنفس الوقت خفت منه

- خويه وين رايحه ؟

غزال : مالك دخل

- تعاي وياي اضيفج اليوم وتصيرين ضيفتي

غزال : منو انت وين تعرفني ؟

- اني نبيل حماج اخوهم الجبير

صفنت يالله هذا يضححك عليه لو شنو ! صفنت بس اي صدك يشبه عقيل يشبه عمي فردوس الله يرحمه ..

ماصدگت واحد يلفني من الشارع وياخذني اخذ الجنطه خلاها بسياره بس حديثه ..

ومشى بيه واني نفسي مگطوع اجر بي وماكو ورجليه يطكطك خوف مأمنه وبنفس الوقت خايفه ..

وكف ببيت بسيط نزل ونزلت دخلني لجوه اجت بوجهي مرته اعرفها بس ماعرفه ما شايفته او شايفته بس نسيته ..

استقبلتني هذاك الاستقبال الحلو سوولي غرفه ونمت بيها اول ماخليت راسي ع مخده ماريد اذكر اي شي مريت بي ولا اذكر بشنو راح امر ..

فزيت ثاني يوم ع اصواتهم لبست شالي وطلعت لكيتهم فارشين سفره بنص الصاله الي محتويه ع تلث غرف وحده اني بيها وهذنيك الهم ..

سفره بيها صمون وبيض بطاوه وماعون خيار وزيتون وليمون وكاسات مي سفره بسيطه همه بسطاء ..

غزال : صباح الخير

ريحانه : صباح النور حبيبتي ردت اكعدج بس كلت خاف تعبانه

رحت غسلت واجيت كعدت يمهم هو كاعد براس السفره ومخلي طفله بحضنه يوكل بيها ويضحك وكاعد ولد جبير يطلع عمره بالـ ١١ سنه هيج او ١٠ ..

وبنيه صغيره يطلع عمرها ٥ سنين ..

نبيل : خويه كعدي تريكي

كعدت تريكت وياهم وهمه هدوء

نبيل : حابه تحجيلي شصار وياج لو شنو ؟

غزال : اساساً وين لگيتني ؟