ابو رعب

#_البارت15

بيان: تعالي للبيت

مصطفى: لبيتج؟ وين اجيج يمعودة

بيان: هاي شبيك وشكو بيها ؟ البيت فارغ وبس اني هنا .. نكعد نسولف شوي واضوكك طبخ ايدي حتى بعد متعيب علية وتكولي مايعة متعرفين تطبخين

هي تحجي وتضحك واني صفنتلها شوي
.. ما مقتنع بالموضوع

..  ألوو مصطفى وينك ؟

مصطفى: ها وياج .. بس عوفي سالفة اجيج للبيت لأن ابد ما راهمة وبعدين اهلج من جهة

بيان: هاي شبيك لتصير نحس .. مو كتلك بس اني بالبيت اهلي مو هنا راحوا زيارة لعمتي مريضة بمنطقة ال....

ضلت هواي تلح وتحجي وياي لحد ما وافقت ،
مدري شلون كدرت تقنعني بيومها وتواعدت وياها ورحتلها للبيت .. وصار اللي صار
ما جنت محسب حساب للي جايني

..

بيوم الدوام اول ما حليت من المدرسة رجعت للبيت بسرعة سبحت وبدلت

صار بوجهي يوسف يباوعلي مستغرب

يوسف: وين رايح ؟

مصطفى: طالع

يوسف: ادري طالع ووين ؟؟

مصطفى: وي صديقي شبيك

يوسف: بربك هو هسه وكت طلعة ؟ اكعد ارتاح اكل ونام وراك روحة للمحل العصر

تنرفزت من كلامة
ورديت بانفعال

مصطفى: شو جاي تحسسني انت ولي أمري وكل فوتة وطلعة طالع بوجهي وتبدي تحقيق ..  احد كلك اني جاهل؟؟
شفتة تفاجأ من تهجمي عليه
كال

يوسف: روح ولي وين متريد تروح رووح

عافني ومشة من كدامي
واني هم طلعت

تمشيت للشارع العام اجرت تكسي وصعدت

..

وصلت للمنطقة اللي كالت عليها .. خليت ابو التكسي يوكفني براس الشارع
حاسبتة وراح

طلعت تليفوني خابرتها
كتلها وينج
..  كالت هسه راح اطلعلك بالباب

مشيت شوي ليكدام وهناك وشفتها واكفة باب البيت ومادة راسها ،
.. دنيا الظهر حارة ومحد بالشارع

شافتني اشرتلي بيدها وفوتتني للبيت
بعدنة بالطارمة وحجت
بيان: عفية هاي ليش تأخرت
مصطفى: لج بنت الاوادم احنة متفقين ع ال1 ونص واجيتج بال1 وربع

بيان: ههههه اي ميخالف هم تأخرت

ابتسمت لضحكتها
.. هل بنية مطيرتلي عقلي ، بيها شي عجيب
كالت ،

.. شنو حنضل واكفين بالباب ؟ فوت جوة

طبيت للبيت واباوع للمكان ،
كعدت ع التخم واهز برجلي بتوتر