ابو رعب

#_البارت21

..

ضل يباوعلي بنظرات ما عرفت شفسرها وجكارتة اسمها بيدة .. تقرب عليه وحجة بهدوء وهو يرفع ايدة على خدي ويمسح بخدودي بأبهامة

قسور: لتبجين امي وابوية انتي تراها دموعج غالية

بقيت صافنة بوجهة وعيوني تترسها الدموع
هذا ليش يحجي هيج ؟
هو قسور نفسة لو بدلوا ؟؟

يربي شلون حلو كالها ( امي وابوية انتي ) .. يمكن الله هداه وقرر يصير عندة كلب مو بس صياح وتزمخ

كرصني من خشمي وكال .. يلا حبيبتي فوتي جوة ، كام الجو يبرد لتتمرضين

بلعت ريكي ورفعت ايدي بتلقائية مسحت خشمي بظاهر كفي
.. شفتة انرسمت شبه ابتسامة على طرف شفايفة

خلاني ابتسم لا ارادي اله ...

ما خلاني الا وهو يشوفني امشي كدامة
وطبيت للبيت وهو يمشي بوراي ..
درت وجهي اباوعله

.. شلون يمشي وايدة اليسرى حاطها بجيبة
والثانية لازم بيها موبايلة ومدنك عليه ، زية العسكري وي عكدة حاجبة منطيتة جاذبية وهيبة

بحيث امشي واني ممنتبهة لنفسي وعيني عليه .. فتت كبل بالحايط وانضربت براسي

وهو فز انتبهلي وصاح

قسور: الله الله ابوية غير تنتبهين .. وين عينج ؟

حجاها وهو يتقربلي واني افرك بمكان الضربة .. احس كصتي ورمت .. حجة وهو يوخر ايدي عن كصتي

.. شو بلة ايدج اشوف

كلبي كام يدك سريع واحس انفاسي تخرطبت وما اعرف اجر نفس من قربة .. مدنك عليه حيل لأن اني اكصر منه وهو ضخم
.. ضعت جواه

بسرعة ابتعدت عنه كم خطوة واني متوترة ومرتبكة ودكات كلبي احسها ما منتظمة وهو يباوعلي مستغرب
حركتي
لبوة: ما عليها شي .. هسه اخلي ثلج وتطيب

هز راسة وهو يحجي

قسور: زين

اختفيت بسرعة من كدامة صعدت للغرفة .. راودني شعور غريب لا ارادي خلاني ابتسم واني اتذكر الموقف

جانت هاي اول بصمة تسجل لقسور بقاموسي ..
لأن ما نتلاكة اله ونتعارك اني اعاند وهو عصبي بارود

..

مر هل اسبوع بسرعة واني محاسه بيه
التهيت بدوامي وامتحانات شهرية .. وقسور من جهة يركض بالجوازات والحجز مال طيران

لحد ما كمل كلشي وحضروا جنطهم قبل بليلة من موعد طيارتهم .. و المفروض يطلعون من ال6 الصبح

مجموعين كل احنة بالصالة وكاعدين نتشاقة ونضحك واني وحور  نوصي بيهم يجيبولنة هداية

زهدية: المدهربة تريد هدية .. جا احنة رايحين ونسة وطربكة ؟
لبوة: هسه جدة وشكو بيها .. وانتي مغمضة تمشين اذكريني وياج بشي شياتين .. بربج ما استاهل ؟