العوض الجميل

الجزء 27

#العوض_الجميل
#ليلى_كريم
#بقلم_فريال
الجزء 27
رجعت نخدم كيما موالفة نروح ونجي مع ليندة والشي الغريب الي لاحظتو هو واحد راجل يظل يتبع فيا وديفوا يرميلي كلمات ويفوت باين عليه كلوشار عندو ضربة تاع موس فخدو وجاي رقيق وطويل عينيه بالسيف مايحلهم ويجي غير في الوقت الي يكون فيه لغاشي قدام لكلينيك ولا دارنا. جيت نقول لخاوتي بصح حشمت ديما بمشاكلي يكونو كرهو مني سكت وغميت لحكاية بقات بيني وبين ليندة برك. وجدت كلش للخطبة والدفوع ماما قالتلي نديرلك فلاصال خير منها نتهناو من الشغل والتعب وانا وافقت والغريب في الامر انو هي سلكت كلش انا مادرت والو بدراهمي قالتلي خبيهم تحتاجيهم وهي سلكت لاصال وكوموندات كلش جا واجد ، خرجت مع ليندة شريت روب صواغي فالغوج بريك طايحة على لكتاف جاية ستيل حوتة مع الاكسسوارات تاوعها ودومي طالو ترونسبارو  وبوشات، قالتلي ليندة بلي كانو ناوين يخطبوني لكريم قبل ماتولد ختو وحكاولو عليا وقبل وكي شافني فلكلينيك راح لراجلها وقالو اذا ماعندها حتى واحد في حياتها نتقدم نخطب ونضمنها ليا لا يطيرو بيها _ هههه مقولتيلوش بلي الخطاب الي يجي يطفش ويروح ميرجعش مشكيتش يطيرو بيا يطيرو عليا برك _ متقوليش هكا كلش بالمكتوب وهاكي صبرتي ونلتي راجل كامل مكمل حاجة ماتخصو _ ايه صح يهبل هصوصا عينيه _ ايه عجبك امالا _ ماشي غير عجبني دالي عقلي _ وقلبك_ مزال شوي _ انكري حتى تشبعي طحتي وماحدا سما عليكي. قاعدة قدامو ناس تشطح وتزغرت وانا نشوف فيه راح ناكلو بعينيا جا يهبل الكوستيم زاد فيه النص، وقف لبسلي الخاتم وانا ثاني لبستو قسمنا لاطارط وكتلو ووكلني تصورنا وخرج روحت بدلت لبست قفطان وخرجتني ليندة وختي نادية، حناتلي عجوزتي على زوج ويزات وبقاط وبارير تاع ذهب  وفاليز فيها قفطان وبوشاط تاعو وصندالة وكوسميتيك تصورت معاها ومع بناتها جاو كامل حتى لميس فاتت روعة سمية جات وبقات ساكتة سكوتها مخوفني بزاف علبالي دارت حاجة وقعدت تستنى في النتيجة لانو كل دقيقة تشوف مع تليفون وتتبسم مديتهاش فيها مستحيل نفزد فرحتي على جالها، روحو لافامي تاع كريم كامل بقينا غير حنا عمومي وعماماتي وخوالي وخالاتي كامل بولادهم شطحت حتى شبعت دخلو خاوتي وولاد خاوتي وخواتاتي شطحنا مع بعض حطوني في نص ودارو عليا بردت قلبي ومع لخر ناضت ماما ومرت عمي شطحو ويوريو في رواحهم شوفونا ياناس وش رانا لابسين مشنشنين بالذهب من لفوق للتحت وحدة تفوخ على ختها شبعنا ضحك عليهم خصوصا كي ختموها بعركة ههه تخيلو زوج عجايز متعاركين وشادين شعور بعض طايح كثر من نايض جداتي هزت عكازتها وضربتهم لزوج قالتلهم الشيب ولعيب احفادكم بولادهم ونتوما مزالكم تتعاركو زي الولاد صغار بخصتو بينا الله يبخص بيكم نتوما ذوك زرتو بيت ربي  ناعل اصلكم وفصلكم جايحات شارفات امشو تمشي بيكم لرض، بهدلتهم الطايح كثر من نايض ديما هكا فكل مناسبة يتعاركو ويختموها بمشكل وحدة ماتشوف في وجه ختها تقول ضراير مش نسا سلاف.
#فريال