العوض الجميل

الجزء 28

#العوض_الجميل
#ليلى_كريم
#بقلم_فريال
الجزء 28
كملت ياماتي عادي نخدم ومينذاك نخرج انا وليندة نشري ونجهز شريت غير القش الي نلبسو اما الفراشات والتخربيقات هذوك يما ونسا خاوتي شراوهوملي ماخلاو والو كلش شراوه تقول راح يخلص القش من الحوانت وميبقاش، خاوتي ثاني شراولي حوايج تاع ذهب كل واحد وش دارلي بارير بقاط سنسلة خلخال ولمو كامل دارولي محزمة تاع ذهب يعني ماخلاو والو دارولي جهاز بالقيمة وبالطبع اصلا حالتهم المادية تسمحلهم يديرولي كلش لباس بيهم وزيد اخر لعنڨود مقلشيني حتى وراني كبيرة بصح مازالني صغيرة في عينيهم، يما تعقلت خلاص وتبدلت 180درجة ولات تعاملني كيفي كيف لبنات ولا نقولو خير منهم. فاتو ليام يجريو ولا نقولو عمرنا الي راهو يجري ليه ليه فات شهر ونص وبقا على عرسي 15 يوم جهازي واجد لميت كلش وغلفتو اصلا كريم قالي جيبي غير قشك هو دارو كاملة من كلش واجدة بصح يما مبغاتش قالتلي تخرجي كيفك كيف خواتاتك تدي كلش باش مرت عمك ماتلقى ماتقول ومتحلش فمها وتعكي عليا خليتها على راحتها اصلا راسها خشين تحب دير غير رايها نبقى نندب منا للعام الجاي ومستحيل نقنعها. كنت قاعدة في شومبرتي عيطلي كريم هذي ثاني مرة يعيطلي من لما فتحنا اول مرة كانت باش نتفاهمو على لادات تاع العرس ( ياك يقولو لازم لعريس ولعروس يحددو لادات باش يكونو مرتاحين). الو_ اهلا لباس عليك _ بخير الحمدلله وانت _ كي سمعت صوتك وليت لباس، سكت منقدرش نجاوبو نحشم خلاص حتى ونكون كبيرة بصح الموقف هذا وكلامو يحشمني منيش موالفة نحكي مع رجال صح تخطبت من قبل بصح جامي حكيت معاهم اصلا كانو ميطولوش ويبطلو بصح كريم مبطلش المرة هذي وراهو متمسك بيا ومتأكدة بلي بغاني بصح مفهمتش علاه خلا لبنات كامل وجا ليا انا بالذات، وينك رقدتي_ لا راني هنا _ شبيك سكتي _ والو _ حشمتي _ ايه _ معليش مع ليام توالفي وترجعي تحكي معايا بأريحية المهم عيطلك اليوم باش نقولك نهار الاربعاء نروحو نعقدو وجدت كلش _ باين دخلت معارفك تالي رانا نطولو بزاف _ ايه باينة هذي لوكان ماجاوش عندي معارف رانا تستنينا شهرين زيادة على التحقيق وليزاناليز وكلش _ ايه تفكرت راني درت ليزاناليز اللازمين كامل _ وانت شكون قالك عليهم _ ليندة قالتلي ياك حتى هي تزوجت واحد يخدم كيفك _ ايه وحكاتلك على خدمتنا ولا نو _ ايه حكاتلي من قبل بصح انا نخافكم تخلعو بزاف _ ههههه علاه تخافي منا راح ناكلوكم _ لا مش هكاك بصح اسمكم برك يخلع وينك يانوقف قدامكم نموت _ هاكي وقفتي قدامي وما متيش _ انت ماشي كيفهم _ علاه _ وقفت قدامك بصفتك راجلي مش كي كنت تخدم _ اااا راجلك وعلبالك براجلك وش يحب وش يكره وش يدير في حياتو _ منعرفش بصح مع لوقت نعرف كلش _ معندكش فضول تعرفي ياك يقولو النسا فضوليين بزاف وميقدروش يتحكمو في الفضول تاعهم _ ايه صح حنا فضوليين بصح انا شخصيا نقدر نصبر ونتحكم في روحي حتى ونكون راح نموت مانسقسيش _ ايه مليح حاجة مليحة تكوني هكا مع ناس بصح معايا انا مذابيك تتصرفي على طبيعتك اذا بغيتي تسقسيني على كاش حاجة سقسي معنديش مشكل ومذابيا تعرفيني من ذوك نحكو على كلش.
#فريال