العوض الجميل

الجزء 07

#العوض_الجميل
#ليلى
#بقلم_فريال
الجزء 07
دخلو مشنفين زي عوايدهم وراسهم ديما في السما عند نهار يطيحو يتكسرو. فاتو نحاو قشهم وحطو الصاشيات في الصالة وبداو يوريو وش شراو باش زعما يخليوني نغير وشوفي يما وش شراتلنا وتحبنا ومقلشتنا وهذو كامل بدراهمها ربي يحفظهالنا تخطينا نضيعو ربي يحفظهالنا ويخليها تاج فوق راسنا ( قولت في قلبي الدراهم تاوعي نخطيكم تضيعو قالو دراهم يما لوكان جاو تاعها وحدها والله ماتمدلكم يما عندها دراهم اهم من لعباد لمزية جا بابا برزقو وخلالها بزاف تالي راهي تخبي وتصرف بالطرف). حطي لخواتاتك ياكلو راهم تعبانين من صباح برا مساكن _ ايه صح عندك الحق من صباح وهوما يطايشو ويدورو في الزنق تعبو من التزوقيل والتلوهيط مساكن وانا كنت راقدة مدرت والو مساكن بناتك يخدمو فدار وبرا ويسيقو وينشفو ويطبخو ويغسلو بزاف عليهم _ بلعي عليا فمك وروحي حطيلهم ياكلو لا نوض ليك ليلة نقلب الدار عليك، نطقت ختي سمية هذي تكرهني في الدم تقول سرقتلها راجلها ولا كليتلها حقها في الورث _ خليها برك تشرك فمها اماما الغيرة قتلتها كعاد راكي تخرجينا وتشريلنا وتقلشينا وهي تظل في دار كي الخدامة خلي تنفعها قرايتها تظل تقول قرايتي قرايتي هاي قرات وش ربحت نعيها تظل زي الخدامة تهنبر ليل ونهار وهكاك ومبردش قلبي بغيتلها الذل والميزيرية ان شاء الله طيح في راجل يحبسها في دار الضو تاع ربي متشوفوش _ زيدي اهدري زيدي قلبك راهو معمر من جيهتي هذا كامل كي مكملتيش قرايتك وروحتي تزوجتي على عكسي انا الي تحديت الكل وكملتها ومنيش ندمانة ولوكان يرجع بيا الزمان للور نقرا ونكمل قرايتي مكرة فيكم كامل _ انا كنت قادرة نكمل بصح ياحنونة رضاية ماما اهم من كلش وهي كي قالتلي اتزوجي تزوجت ماناقشتها ماقلقتها ماحرتش بابا عليها، جيت ننطق ونسبها نطقت ماما وقالتلها خليك منها وش يجيك من الهاملة وش تعرف في رضاية الوالدين اذا يماها متسمعلهاش الهدرة خليك منها صحيتي بنتي المرضية العاقلة تاعي ربي يحفظك ويفتحها في وجهك وين مارحتي تلقايها من قدامك خضرة ومن وراك خضرة راني راضية عليكم كامل ياولادي بلبنات بلولاد غير الصغيرة فيكم الي عصاتني وخرجت على شوري منسمحلهاش قولتلها الله لاسمحتي لا جات القراية والخدمة معصية للوالدين خليها ومنيش ندمانة قريت وخدمت وراني نسلك والحمد لله واذا منيش عاجباتك نخرج من دار عادي معنديش مشكل نخليك مع بناتك يقومو بيك ونشوفو تراه اذا يرفدوك ولا لا، نطقت سمية قالتلي نرفدوها علاش لا يمانا علاه العين وراس نقومو بيها وتحبي تروحي روحي ربي يخرج روحك ان شاء الله _ ايه ترفدوها كيما رفدتوها كي دارت العملية شفتكم وشفت شطارتكم _ وش تقصدي، سكتنا يما وقالتلي حطي لخواتاتك ياكلو بزايد من مشاكلك من نهار زدتي ماشفت الربح الله يديك ونتهنى منك _ ان شاء الله من فمك لربي نموت ونتهنى منك ومن ظلمك بصح متخافيش جاي نهار وين نروح ومنرجعش ونخليهالك _ تخرجي من دار منسمحلكش ونتبرا منك. روحت للكوزينة حطيتلهم يتعشاو وخرجت اصلا وش راح نزيد نحكي ديما يما تسكتني بالجملة هذي تاع نتبرا منك باش تسكتني ومتزعفش بناتها لانو تعرف لساني خاطيني نهار ننطق مانسكتش ونغسل العبد الي قدامي غسيل الدوارة منسكتلوش وطول حياتي شخصيتي قوية مع ناس كامل غير دارنا عفسو عليا وهذا كامل بساب الي تتسمى يما.
#فريال