طرقات نحو الهلاك

البارت (11)

#طرقات_نحو_الهلاك
بقلم #احمد
البارت_11

شهد.. الساعة صارت 7 المغرب والدنيا ظلمة والبيت مابيه نفس ما حسيت الا صار صوت اطلاق نار وصوت الشبابك وهي تتكسر

متت من الخوف بذيج اللحظة وصار صراخي يرج الغرفة ومن الخوف بدال ما ابقى بمكاني طلعت اركض خارج الغرفة وطلعت للحوش مقابيل الطلق

وخلال ركضتي ماعرف شنو صار وياي بس اتذكر من وكعت عالكاع وبعدها فقدت الوعي ومادري شنو صار بعدها

كعدت لكيت نفسي بالغرفة بس جان كلبي يدك بسرعة ويوجعني من قوة دكاتو وخايفة بشكل هستيري وفجأة انفتح الباب ودخلت سماح

سماح.. ها كعدتي

شهد.. عوفنييييي عوفييننييييي والله ما سويت شيييي

نسرين.. هاي شبيها

سماح.. ماعرف حتى ما حجيت وياها

شهد.. سحبت نفسي لزاوية الغرفة .. عوفوني ابتعدو عني الله يخليكم عوفوني

نسرين.. باوعت لسماح باستغراب.. لج هاي تخبلت

سماح.. طبها مرض ختولي هسا عوفيها

شهد.. سكرن الباب وعافني بالغرفة متخبلة رسميا دا اشوف اشكال واشخاص ما الهم وجود وماعرفهم علمود اكول اتخيلهم

جنت احجي ويا نفسي ووياهم بس ما يجاوبون مرة اضحك مرة ابجي مرة اصرخ مرة احجي بهدوء فعليا ما بقى براسي عقل

بس من احد يدخل للغرفة اتخبل وصراخي يملي البيت حتى سماح صارت تجي بس تحطلي الاكل وتطلع ومبين عليها مثل الخايفة مني

جانت من تحط الاكل وتطلع اسكت والاشخاص الي دا اتخيلهم او دا اشوفهم يتجمعون عند الصينية واروح اكعد وياهم اكل

جنت اشوفهم ياكلون وياي من نفس الصينية بس ما جان ينقص شي من الاكل بس الي اكلو انا ينقص بس ما جنت انتبه لهالشي

من تجيبلي كاكاو ابدي اقسم الكاكاو علينا كلنا اكسر شوية منها وانطي للشخص واتخيلو ياخذها بس بالواقع اني دا اكلها مو انطيه

مرن يومين والثالث دخلت علي سماح ووياها جنطة ونفس الشي هم صرت يزاوية الغرفة وصرت اصرخ من الخوف

هالمرة ما اهتمت لصراخي حاولت تسحبني بس جنت اقاومها بكل قوتي اخير شي عافتني لان صرت اتملص منها

شوية ورجعت هي وعمتي واخذني للحمام غصب عني سبحني ورجعني بس ما خلصن الا طلعت روحهن وضربني الا شبعن

بعدها اخذني للغرفة سماح كتفتني وعمتي مشطت شعري ولبستني شال وعباية وصاحت بدر كالتلو جاهزة تعال اخذها

جنت تعبانة شكد ما قاومت سماح وعمتي وفوكها بدر اقوى بهواي مني فجنت مقاومتي الو شبه معدومة وسحبني لخارج البيت