#طرقات_نحو_الهلاك
بقلم #احمد
البارت_49
((#ملاحضة.. اخوان مثل ما تعرفون اليوم يبلش قيام العشر الاواخر بأذن الله وهم طلبات العيد وغيرها راح احاول اكتبلكم لان هذا واجبي تجاهكم بس اذا قصرت اتمنى تعذروني وانتو تعرفون خبصة العيد ❤️))
اسد.. دخلنا يمهم وجنا ننتظر الشيخ لحد ما يوصل علمود يعقدلي لان اتفقنا ان العقد اليوم وعقد المحكمة بعد الزواج
طبعا جنت اكدر اسويهن قبل العرس بس تكاسلت واعرف نفسي بعد العرس راح انجبر اسويهن لان راح يكون وجودهن مهم
بالنسبة لعمامي ما اعترضو لان العقد حاليا يكفي اما عقد المحكمة فهو اثبات لحقوقها اما غير هالشي فلا يقدم ولا يأخر
اجى الشيخ واستقبلناه وكعد بيني اني وعمي وبلش يعقدلنا واخذ موافقتي بعدين راح اخذ موافقة نارين وبعدها راح
جنت مستغرب انو المفروض ياخذ موافقة نارين بالبداية مو بالاخير بس يلا هي موافقة اذا بالبداية ولا بالنهاية ماكو فرق
بعدها جان لازم ادخل اللبسها الذهب انطو خبر للنسوان علمود يطفن الاغاني ويسترن نفسهن وكالولي ادخل يمها
اول ما دخلت بلشت الهلاهل واجت امي صبيحة طشت جكليت فوكي بس جكليت الضيم وحدة منهن وكعت على راسي احس دخت
لولا العيب واخاف تروح الهيبة جان انهزمت منها بس كملت طريقي بثبات علمود ما تخرب الهيبة كدام النسوان ههههههههه
كعدت يمها شوية وجابو الذهب لبستو الها وهي جانت مدنكة ويعجبني بيها ادبها وخجلها واكثر شي يعجبني بيها انها محترمة نفسها
ولاكون صريح وانطيها حقها من ناحية الادب ما تفرق عن شهد بشي ثنينهن مؤدبات بس للاسف ماكدر اجمعهن ويا بعض
بعد ما لبستها الذهب بشوية طلعت خارج وشوية ورجعنا للبيت علمود احتفل ويا جماعتي لكيتهم منتظريني بالمضيف
اول شي باركولي وتجمعو كلهم وبلشت الهوسات والاحتفالات وجان احتفال من صدك يخبل بقينا نحتفل لل 11 بالليل وبعدها تفرقنا
رحت للبيت واني تعبان ودايخ اريد بس اوصل الفراش ومن وصلت زتيت نفسي عالفراش على اساس ارتاح وبعدها اكوم ابدل
صحيت لكيت الدنيا صبح وماخذتني النومة واني بملابس الحفلة جان هسا طالع الضو كمت بدلت ورجعت كملت نومتي
اندك الباب الساعة 9 الصبح ودخل علي جايبلي وياه ريوك كال كوم تريك وراك عرس ونايم لحد الان كلتلو خرب يومك راحت النومة بسببك
وكمت غسلت وتريكنا سوا اني وياه كال اليوم راح تصير فد خبصة ما يعلم بيها الا الله كلتلو اكيد عرس ابن الشيخ مو قليل
خلصنا ريوك وبدلت ملابسي لبست زي عربي وجهزت نفسي على كولتهم على حبة ونص بحيث ما بقى اي نقص وطلعت خارج
أنت تقرأ
طرقات نحو الهلاك
Romanceتمضي الايام تلو الايام تتجدد الاوجاع والالام لم تجري الرياح بما لا تشتهي سفننا فلم يعد موجود من سفننا سوا الحطام قصة تتحدث عن طفلة لم ترى من الطفولة شيء فما هو مصيرها بين وحوش ترتدي اقنعة بشرية ...... #طرقات_نحو_الهلاك كونوا معنا ..........
